މިހާރު ނަގަނީ ބިލް ކުރުމުގެ އައު މަރުހަލާ ފެށުމަށް ނަގާ ރީޑިން؛ ފުރަތަމަ ބިލް ލިބޭނީ ނޮވެންބަރުގައި: އެމްޑަބްލިޔުއެސްސީ

އައްޑޫ ސިޓީ އަދި ފުވައްމުލައް ސިޓީގައި އެމްޑަބްލިޔުއެސްސީން މިހާރު ނަގަމުންދާ މީޓަރުގެ ރީޑިންގްތަކަކީ، ބިލް ކުރުމުގެ އައު މަރުހަލާގެ ފެށުމުގެ ގޮތުގައި ބަލާނެ ރީޑިންގްތަކެއް ކަމަށާއި، ކަސްޓަމަރުންނަށް ފުރަތަމަ ބިލް ލިބޭނީ ނޮވެންބަރުގެ ބިލިންގ ސައިކަލުގައި ކަމަށް މާލޭ ވޯޓަރ އެންޑް ސެވަރޭޖް ކޮމްޕެނީ (އެމްޑަބްލިޔުއެސްސީ) އިން ހާމަކޮށްފިއެވެ.

އެމްޑަބްލިޔުއެސްސީން ނެރެފައިވާ ނޯޓިސްއެއްގައި ވާގޮތުން، ދެކުނުގެ ދެ ސިޓީގެ ފެނުގެ ޚިދުމަތް އެ ކުންފުންޏާ ހަވާލުކުރެވިފައިވާއިރު، މިހާރު ކުރިއަށްދަނީ އައްޑޫ ސިޓީ (ހުޅުދޫ އަދި މީދޫ ހިމެނޭހެން) އަދި ފުވައްމުލައް ސިޓީގެ ގޭބިސީތަކުގެ މީޓަރު ރީޑިންގ ނެގުމުގެ މަސައްކަތެވެ. މިއީ ބިލް ކުރުމުގެ އައު މަރުހަލާ ފެށުމުގެ ގޮތުން ކަނޑައެޅޭ "ބޭސް ރީޑިންގ" އެވެ.

އެ ކުންފުނިން ބުނީ، ފުރަތަމަ ނެގޭ މި ރީޑިންގް އަށް ފަހު ބޭނުންކުރެވޭ ފެނުގެ މިންވަރަށް ބިނާކޮށް، އެމްޑަބްލިޔުއެސްސީގެ ފުރަތަމަ ބިލްތައް ކަސްޓަމަރުންނަށް ފޮނުވޭނީ ނޮވެންބަރު 2026 ގެ ބިލިންގ ސައިކަލުގައި ކަމަށެވެ.

މީގެއިތުރުން، މީޓަރ ރީޑިންގ ނެގުމުގެ މަސައްކަތް ނިމުމުން، "ފުރަތަމަ ރީޑިންގ" ގެ ގޮތުގައި ރެކޯޑުކުރެވުނު އަދަދު ކަސްޓަމަރުންނަށް އެސްއެމްއެސް (SMS) މެދުވެރިކޮށް ފޮނުވާލެވޭނެ ކަމަށް އެމްޑަބްލިޔުއެސްސީން މައުލޫމާތުދެއެވެ.

އަދި މިކަމާ ގުޅޭ އެއްވެސް އިތުރު މައުލޫމާތެއް ސާފުކުރައްވަން ބޭނުންފުޅުވާނަމަ، އެ ކުންފުނީގެ ކަސްޓަމަރ ސަރވިސް ނަންބަރު 1575 އަށް ގުޅުއްވުމަށް ވެސް ވަނީ އެދިވަޑައިގެންފައެވެ.

އެ ސިޓީތަކުގެ ފެނާއި ނަރުދަމާގެ ޚިދުމަތް ކުރިން ފެނަކައިން ދިން ނަމަވެސް، އެކުންފުނި އުވާލާތީ ޚިދުމަތް ވަނީ، އެމްޑަބްލިޔުއެސްސީގެ ދަށަށް ބަދަލުކޮށްފައެވެ.