ތުލުސްދޫ ކައިރިން ދަތުރުކުރި ދެ ލޯންޗް ޖެހި ނުރައްކާތެރި އެކްސިޑެންޓެއް ހިނގައިފި

ތުލުސްދޫ ކައިރިން ދެ ލޯންޗް ޖެހި ނުރައްކާތެރި އެކްސިޑެންޓެއް ހިނގައިފިއެވެ.

ފުލުހުން ބުނީ މި އެކްސިޑެންޓް ހިނގާފައިވަނީ މިރޭ 19:55 ހާއިރުކަމަށެވެ. އެކްސިޑެންޓްގައި ދެ މީހަކަށް އަނިޔާވި ކަމަށް ފުލުހުން ބުންޏެވެ. ނަމަވެސް ފަހުން މެރިން ފުލުހުން ވަނީ މި އެކްސިޑެންޓްގައި 5 މީހަކަށް އަނިޔާވިކަމަށް ބުނެފައެވެ.

އަނިޔާވި މީހުންގެ ތެރޭގައި ހިމެނެނީ ލޯންޗްގެ ބައެއް ފަޅުވެރިންގެ އިތުރުން އެއް ލޯންޗުގެ ކައްޕިއަކަށެވެ. އެގޮތުން އަނިޔާވި ބައެއް މީހުންގެ ބޮލަށް ބިއްލޫރި ހެރިފަ ހުރިކަމަށްވެސް މައުލޫމާތު ލިބެއެވެ. އަދި އެކެއްގެ ފައި ބިންދައިގެން ގޮސްފައިވާކަމަށް ފުލުހުން ވަނީ ބުނެފައެވެ.

މެރިން ފުލުހުން އާންމުކުރި ފޮޓޯތަކުން ފެންނަ ގޮތުގައި މި އެކްސިޑެންޓްގައި ދެ ލޯންޗަށްވެސް ވަނީ ގެއްލުންތަކެއް ލިބިފައެވެ. އޭގެ ތެރޭގައި ލޯންޗްގެ ބިއްލޫރިތައް ތަޅައިގެން ދިއުމުގެ އިތުރުންވެސް ޝީޓްތަކާއި ހަލްގަނޑަށްވެސް އެކިވަރުގެ ގެއްލުންތައް ލިބިފައިހުއްޓެވެ.

މި އެކްސިޑެންޓް ހިނގަން މެދުވެރިވި ސަބަބެއް އަދި ސާފެއް ނުވެއެވެ. ވޮއިސްއަށް މިހާތަނަށް އެނގިފައިވާ ގޮތުގައި އެކްސިޑެންޓް ހިނގި އެ ސަރަހައްދަކީ މީގެ ކުރިންވެސް މިފަދަ ނުރައްކާތެރި ހާދިސާތައް ހިނގާފައިވާ ސަރަހައްދެކެވެ.