މޮރޮކޯ ކުޅުންތެރިންނާއި ސަޕޯޓަރުންގެ ފަރާތުން އުފާވެރި މަންޒަރުތަކެއް

އިއްޔެ ކުޅެވުނު ވޯލްޑްކަޕްގެ މެޗުތަކުގެ ތެރެއިން ގިނަ ބައެއްގެ ސަމާލުކަން އަތުލީ ދުނިޔޭގެ ރޭންކިންގ ގައި މިވަގުތު ދެވަނައިގައި އޮތް ބެލްޖިއަމް ބަލިކޮށް ރޭންކިންގ ގައި 22 ވަނައިގައި އޮތް މޮރޮކޯ ކުރި ހޯދުމެވެ.

މުޅި މެޗުގައިވެސް ރަނގަޅު މޮޅު ކުޅުމެއް ދެއްކި މޮރޮކޯ، ބެލްޖިއަމް ގެ މައްޗަށް ކުރި ހޯދީ 2-0 ނަތީޖާއަކުންނެވެ.

މޮރޮކޯ މި ހޯދި ތާރީޚީ ކާމިޔާބީގެ އިތުރުން، އެޓީމުގެ ކުޅުންތެރިނާއި ސަޕޯޓަރުންގެ ކިބައިން ގިނަ މީހުންނަށް އުފާވެރިކަން ގެނުވާނެފަދަ މަންޒަރުތަކެއް ފެނިގެން ދިޔައެވެ.

އެގޮތުން އެންމެ ފާހަގަ ކޮށްލެވުނު އެއް ކަމަކީ، މެޗުން މޮޅުވުމާއި އެކު މޮރޮކޯގެ ކުޅުންތެރިއެއް ކަމަށްވާ ހަކީމް ޒިޔެޗް، އެ މެޗު ބަލަން ސްޓޭޑިއަމް އަށް ގޮސް އިން އޭނާގެ މަންމަ ކައިރިއަށް ގޮސް، މަންމަ އަށް އޭނާ ލައިގެން ހުރި ޖާރޒީ ދިނުމަށްފަހު، މަންމަގެ ނިތްކުރީގައި ލޯބިން ބޮސްދިން މަންޒަރެވެ. ގިނަ ބައެއްގެ ލޮލުން ކަރުނަ ހިލުވާލި މި އުފާވެރި މަންޒަރާއި ގުޅޭ ފޮޓޯ އާއި ވީޑިއޯ މީސްމީޑިއާގެ އެކި މަންސަތަކުގައި ދައުރު ވަމުންދާއިރު، ވަރަށް ގިނަ މީހުން އަންނަނީ ޒިޔެޗް ގެ މި ޢަމަލަށް ތަޢުރީފް ކުރަމުންނެވެ.

ޒިޔެޗް ވަނީ އިއްޔެގެ މެޗުގައި ހިލޭ ޖެހުމަކުން ގޯލެއްވެސް ކާމިޔާބު ކޮށްފައެވެ. އެހެން ނަމަވެސް އެ ގޯލް ވީ އޮފްސައިޑް ގޯލަކަށެވެ. އެހެންނަމަވެސް، އޭގެ ފަހުން، ދެވަނަ ހާފުގައި މޮރޮކޯގެ ކުޅުންތެރިއެއް ކަމަށްވާ ޒަކަރިއާ އަބޫޚްއަލް އެ ޓީމަށް ކާމިޔާބު ކޮށްދިން ދެވަނަ ލަނޑު ޖެހިއިރު، އޭނާއަށް އެ ފުރުސަތު ތަނަވަސް ކޮށްދިނީ ޒިޔެޗްއެވެ.

އިއްޔެ މެޗުން ދެން ފެނިގެން ދިޔަ ފާހަގަކޮށްލަންޖެހޭ އަނެއް ކަމަކީ، އެ މެޗުގެ ދެވަނަ ލަނޑު ކާމިޔާބު ކޮށްދިން ބަދަލު ކުޅުންތެރިޔާ ޒަކަރިއާ އަބޫޚްއަލް މެޗަށް އެރުމުގެ ކުރިން ދެއަތް ނަގައި ދުޢާކޮށް، އަދި ދެވަނަ ލަނޑުޖެހުމާއި އެކު ޝުކުރުގެ ސަޖިދަ ޖެހި މަންޒަރެވެ. އަދި ހަމަ އެހެންމެ، އެ ޓީމުގެ ފުރަތަަމަ ލަނޑަށްފަހުވެސް ކުޅުންތެރިންވަނީ ޝުކުރުގެ ސަޖިދަ ޖަހާފައެވެ.

މީގެ އިތުރުން، މޮރޮކޯގެ ސަޕޯޓަރުން، ޖަމާޢަތް ހަދައިގެން އިއްޔެގެ މެޗު ކުރިއަށްދިޔަ ސްޓޭޑިއަމްގެ ބޭރުގައި ނަމާދުކުރާ މަންޒަރު ފެންނަ ފޮޓޯ އަކީވެސް ގިނަ ބައެއްގެ ސަމާލުކަން އަތުލާފައިވާ ފޮޓޯ އެކެވެ.