ހަމަހަމަ ކަމަށް ގޮވާލައި އަނގަމަތީ އަތް އެޅި ޖަރުމަނުގެ މުނާފިގުކަން ދުނިޔެއަށް ހާމަކޮށްދީފި

އެއްޖިންސުން ގުޅުން ހިންގާ މީހުންގެ ހައްގުތައް ހޯދައިދީ ހަމަހަމަ ކަމަށް ގޮވާލައި އަނގަމަތީގައި އަތް އެޅި ޖަރުމަނުގެ ޓީމުގެ ދެފުށް ދެގޮތް ކަން ދުނިޔެއަށް ހާމަކޮށްދީފިއެވެ.

ޖަރުމަނު ޓީމުން ކުޅުނު ފުރަތަމަ މެޗުގައި އެއްޖިންސުން ގުޅުން ހިންގާ މީހުންގެ ހައްގުގައި، "ވަންލަވް" އާމްބޭންޑް އަޅާނެ ކަމަށް އެމީހުން ދިޔައީ ބުނަމުންނެވެ. އެހެންނަމަވެސް، އެކަމާއި ގުޅިގެން އެމީހުންނަށް ލިބުނު އިންޒާރާއި އެކު އެކަން ނުކޮށް އެމީހުން ވަނީ އެހެން ގޮތެއް ޚިޔާރު ކޮށްފައެވެ.

އެގޮތުން، ޖަރުމަނު ކުޅުނު ފުރަތަމަ މެޗު ފެށުމުގެ ކުރިން ފޮޓޯއަށް ހުއްޓުނުއިރު، އެޓީމުގެ ހުރިހާ ކުޅުންތެރިން ވަނީ އަނގަމަތީގައި އަތް އަޅާފައެވެ. އެއީ ގަތަރުގައި އެއްޖިންސުން ގުޅުން ހިންގުން ޕްރޮމޯޓް ކުރުމާއި، ސްޓޭޑިއަމް ގައިވެސް އެކަން ރަމްޒުކޮށްދޭ އެއްވެސް ދިދައެއް ބޭނުން ކުރުމުގެ އިތުރުން، 'ވަން ލަވް' އާމްބޭންޑް އެޅުންވެސް މަނާ ކުރުމާއި ގުޅިގެން ފީފާ އާއި ގަތަރާއި ދެކޮޅަށް އެމީހުން ހިންގި ހަމަހިމޭން ހަޅުތާލެކެވެ.

ޖަރުމަނު ޓީމުން މިފަދައިން ކަންކުރުމާއި ގުޅިގެން ގިނަ ބައެއްގެ ފާޑުކިޔުންތައް އެ ޓީމަށް ވަނީ އަމާޒުވެފައެވެ. އަދި އެޓީމުން ހަމަހަމަ ކަމަށް ގޮވާލި އިރު، މުސްލިމް ކުޅުންތެރިއަކަށް އޮޒިލް ވުމުން އޭނާއާއި މެދު އެ ޓީމުން ގެންގުޅުނު ތަފާތު ކުރުންތައް ހަނދާންކޮށް، ޖަރުމަނު ޓީމުގެ މުނާފިގު ކަމުގެ ވާހަކަ ގިނަ ބަޔަކު ވަނީ ދައްކާފައެވެ.

އަދި އެކަން މުޅި ދުނިޔެ އަށާއި އެ ޓީމަށްވެސް ހަނދާން ކޮށްދިނުމަށް ރޭގައި ސްޕެއިނާއި ޖަރުމަން ބައްދަލުކުރި މެޗުގައި ޤަޠަރުގެ ސަޕޯޓަރުންވަނީ މަސްއޫދު އޮޒިލްގެ ފޮޓޯތަކާއެކު ދަނޑަށް ގޮސް އަގަމަތީގައި އަތްއަޅައިގެން ތިބެ، ޖަރުމަނު މީހުންގެ 'ސްޓައިލް' އިން އެމީހުންނަށް ރައްދު ދީފައެވެ.

ޖަރުމަނުގެ ޓީމަށް ކުޅުނު އެންމެ މޮޅު އެއް މިޑްފީލްޑަރު ކަމުގައިވާ އޮޒިލް ޖަރުމަން ޓީމުގައި ނުހިމަނަން އެ ޓީމުން ނިންމާފައިވަނީ ޗައިނާގައި ތުރުކީ ދަރިކޮޅުގެ އުއިޣުރު މުސްލިމުންނަށް ކުރާ އަނިޔާތަކާ ދެކޮޅަށް އަޑުއުފުލި މައްސަލައެއްގައެވެ. އޮޒިލް އަކީ ތުރުކީގެ ނަސްލަަށް ނިސްބަތްވާ ކުޅުންތެރިއެކެވެ.

ޖަރުމަނު ޓީމުން އޮޒިލް އާއި މެދު ގެންގުޅުނު ތަފާތު ކުރުންތަކާއި ގުޅޭގޮތުން ވާހަކަ ދައްކަމުން އޭނާ ބުނެފައިވާ ގޮތުގައި، ޖަރުމަނަށް މެޗެއް ކާމިޔާބުވެއްޖެނަމަ އޭނާއަކީ ޖަރުމަނު ރައްޔިތެއްކަމަށްވާ ކަމަށާއި، ޖަރުމަނު މެޗަކުން ބަލިވެއްޖެނަމަ އޭނާއަކީ ޖަރުމަނަށް ހިޖުރަ ކޮށްގެން އުޅޭ މީހެއް ކަމަށެވެ.