މި ފަސް އަހަރު ނިޒާމީ ވޯޓު ނަގާނެ ވާހަކައެއް މެނިފެސްޓޯއަކު ނެތް: ރައީސް
މި ފަސް އަހަރު ނިޒާމީ ވޯޓު ނަގާނެ ވާހަކަ މެނިފެސްޓޯގައި ނޯންނާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް މިހެން ވިދާޅުވީ، މިއަދު ހަވީރު ރައީސް އޮފީހުގައި ނޫސްވެރިންނާ ބައްދަލުކޮށް ވާހަކަ ދައްކަވަމުންނެވެ.
ރައީސް ނަޝީދުގެ އެންމެ ބޮޑު ޝަކުވާއަކީ، ވެރިކަމަށް އައިއިރު، ނިޒާމު ބަދަލު ކުރުމަށް ވޯޓު ނަގާނެ ކަމަށް ވައުދުވުމާއި އަދި ނިޒާމު ބަދަލު ކުރާ ވާހަކަ ނުދައްކާ ޕްރައިމަރީއަކަށް ދިއުން ކަމަށްވުމާއެކު މި ފަސް އަހަރު ތެރޭގައި ނިޒާމީ ވޯޓެއް ނަގާނެތޯ ނޫސްވެރިޔާ ކުރި ސުވާލަށް ޖަވާބު ދެއްވަމުން ރައީސް ޞާލިހު ވިދާޅުވީ އެމަނިކުފާނު ކެނޑިޑޭޓަކަށް ވުމާއެކީގައި ރައްޔިތުންނާ ހިސާބަށް ދިއުމުގެ ކުރިން މެނިފެސްޓޯއެއް އެކުލަވާލި ކަމަށެވެ. އަދި އެ މެނިފެސްޓޯ އެކުލަވާލީ ކޯލިޝަނުގަ ހިމެނޭ ހުރިހާ ޕާޓީތަކެއްގެ މަޝްވަރާގެ މަތިން ކަމަށެވެ.
"އެ މެނިފެސްޓޯގަ އެއްގޮތަކަށްވެސް ނޯންނާނެ ނިޒާމީ ވޯޓެއް މި ފަސް އަހަރު ތެރޭގަ ނަގާނެ ވާހަކައެއް. އަޅުގަނޑު ތަންފީޒު ކުރަމުން މި ގެންދަނީ، އަޅުގަނޑާ ހަވާލުވެފާ އޮތް، އެ މެނިފެސްޓޯ. އޭގަ އޮތް ގޮތަށް މި ކުރިއަށް ގެންދަނީ. އެއްވެސް ހާލެއްގަ އެ މެނިފެސްޓޯ މަސައްކަތްތަކު ތެރެއަކު، މި ދެންނެވިހެން ނިޒާމީ ވޯޓެއް މި ފަސް އަހަރު ތެރޭގަ ނަގާ ވާހަކައެއް ނެތް،"
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވިއެވެ.
މެނިފެސްޓޯގައި ނެތް ކަމެއް ކުރަން ވެއްޖެ ނަމަ ދެން ކުރަން ޖެހޭނެ ކަމަކީ، ކޯލިޝަންގައި ތިބި އެންމެންނާ މަޝްވަރާ ކުރުން ކަމަށާއި އެންމެންގެ ލަފަޔާއެކީގަ ނޫން ގަޮތަކަށް މި ދައުރުގައި އެކަމުގައި ކުރިއަށް ދެވޭނެ ފުރުސަތެއް އޮތް ކަމަށް ނުދެކޭކަމަށް ރައީސް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
