އަޅުގަނޑު މި ކުރިމަތި ލަނީ ރާއްޖޭގައި އަނެއްކާވެސް އިސްލާމީ ވެރިކަމެއް ކުރުމަށް: ރައީސް ނަޝީދު

އެމްޑީޕީގެ ރިޔާސީ ޕްރައިމަރީގައި ވާދަކުރައްވަން ނިންމެވީ އެ ޕްރައިމަރީ އާއި ކުރިއަށް ރިޔާސީ އިންތިޚާބުވެސް ކާމިޔާބު ކުރައްވައި، ދިވެހިރާއްޖޭގައި އަނެއްކާވެސް އިސްލާމީ ވެރިކަމެއް ގާއިމް ކުރެއްވުމުގެ ނިޔަތުގައި ކަމަށް، އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

"އަންނި 2023" ނަމުގައި، މިރޭ ސަލްޓަން ޕާކުގައި  ކުރިއަށް ދިޔަ ރައީސް ނަޝީދުގެ ރިޔާސީ ޕްރައިމަރީގެ ކެންޕެއިން   ޖަލްސާގައި ވާހަކަ ދައްކަވަމުން ނަޝީދު ވަނީ، ރިޔާސީ ޕްރައިމަރީގައި ވާދަކުރައްވަން އެމަނިކުފާނު ނިންމެވި ސަބަބުތައް ހާމަކޮށްދެއްވާފައެވެ.

އެގޮތުން، އެމަނިކުފާނު ވަނީ، ޕްރައިމަރީގައި ވާދަކުރައްވަން ނިންމެވީ، ކުރިއަށް އޮތް ރިޔާސީ އިންތިހާބުގައި އެމްޑީޕީ އަށް ވެރިކަން ހޯއްދަވައި ދެއްވައި، އެމްޑީޕީ އެ ޕާޓީގެ މެންބަރުންނާއި ހަވާލުކުރެއްވުމަށް ކަމަށެވެ.

އަދި، ކުރިއަށް އޮތް ރިޔާސީ އިންތިހާބުގައި، އަދުގެ ސަރުކާރުގެ ކޯލިޝަންގައި ހިމެނޭ ޕާޓީތަކުގެ ލީޑަރުންވެސް ވާދަ ކުރައްވާނެކަން އެމަނިކުފާނަށް ޔަގީންވެވަޑައިގަންނަވާ ކަމަށާ، އެފަދައިން އެކަން ެޮ އޮއްވައި އެ އިންތިހާބުގައި އެމްޑީޕީގެ ފަރާތުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވާދަކުރައްވައިފި ނަމަ، ޖުމުލަ %20 މީހުންގެ ވޯޓުވެސް ނުލިބޭނެ ކަމަށް އެތައް ފަހަރަކު ތަކުރާރުކޮށް ނަޝީދު ވިދާޅުވިއެވެ.

އޭގެ ސަބަބެއް ކަމުގައި ރައީސް ނަޝީދު ވިދާޅުވީ، ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް އަށް ކުރިއަށް އޮތް ރިޔާސީ އިންތިހާބުގައި ބައިވެރި ނުވެވޭނެ ކަމަށާ، އެހެންކަމުން އެމަނިކުފާނުގެ ޕާޓީގެ އެއްވެސް މެންބަރެއް ރައީސް ޞާލިހަށް ވޯޓު ނުދެއްވާނެ ކަމަށެވެ. ވުމާއެކު، އިންތިޚާބުން ދެން ކުރި ހޯއްދަވާނީ އެހެން ބޭފުޅުން ކަމަށާ، އޭގެ ސަބަބުން އެމްޑީޕީ އަށް ވެރިކަން ކުރުމުގެ ފުރުސަތު ނުލިބި އިންތިހާބުން "ކަޓައިގެން" ދާނެ ކަމަށް ނަޝީދު ވިދާޅުވިއެވެ.

މީގެ އިތުރުން، ރައީސް ނަޝީދު ޕްރައިމަރީގައި ވާދަކުރައްވަން ނިންމެވި އިތުރު ސަބަބެއްގެ ގޮތުގައި އެމަނިކުފާނު ވިދާޅުވީ، ރާއްޖޭގައި އިސްލާމީ ވެރިކަމެއް ގާއިމް ކުރުން ކަމަށެވެ.

"އަޅުގަނޑު މި ކުރިމަތި ލަނީ ދިވެހިރާއްޖޭގައި އަނެއްކާވެސް އިސްލާމީ ވެރިކަމެއް ކުރުމުގެ ނިޔަތުގައި. އަޅުގަނޑުމެން އެދޭ، އަޅުގަނޑުމެން ބޭނުންވާ ވެރިކަމެއް ގާއިމް ކުރުމުގެ ނިޔަތުގައި." ރައީސް ނަޝީދު ވިދާޅުވި އެވެ.

ނަޝީދު މިފަދައިން ވިދާޅުވެފައި ވާއިރު، އެމަނިކުފާނަށް ވެރިކަމުން އިސްތިއުފާ ދެއްވަން ޖެހިވަޑައިގެންނެވި އެންމެ ބޮޑު އެއް ސަބަބަކީ، ވެރިކަމުގައި ހުންނެވި އިރު، ގެންގުޅުއްވި ދީނާއި ބީރައްޓެހި ލާ ދީނީ ސިޔާސަތު ކަމަށް ގިނަ ބަޔަކު ދެކެއެވެ. އެގޮތުން، ރާއްޖެ އާއި ރާއްޖެ އިން ބޭރުގައިވެސް، އެކި ޕޯޑިއަމްތަކުގައި ދީނާއި ޚިލާފް ވާހަކަ ދައްކަވައި، ސުންނަތުން ސާބިތުވާ ކަންކަމަށްވެސް ފާޑުވިދާޅުވުމާއި ގުޅިގެން ވަރަށް ގިނަ ޢިލްމުވެރިންނާއި އާއްމުންގެ ނުރުހުން އެމަނިކުފާނަށް އަމާޒުވެގެން ދިޔައެވެ.