ރަނިން މޭޓަކާއިމެދު އަދި ނުވިސްނަން؛ އެކަމާއިމެދު އެއްވެސް ގައުމަކުން ޕްރެޝަރެއް ނުކުރޭ: ރައީސް

އެމްޑީޕީގެ ރިޔާސީ ޕްރައިމަރީއާ ކާމިޔާބު ޖުރެވޭނެ ކަމާއިމެދު ޔަގީންކަން އޮތަސް ރަނިންމޭޓަކާ މެދުގައި އަދި ނުވިސްނަވާ ކަމަށާ، އެކަމާއި ގުޅިގެން ބޭރުގެ އެއްވެސް ގައުމަކުން ޕްރެޝަރު ނުކުރާ ކަމަށް ރައީސް އިބްރާހިމް މުހައްމަދު ޞާލިހް މިއަދު ވިދާޅުވެއްޖެއެވެ.

ރައީސް ޞާލިހު މިފަދައިން ވިދާޅުވީ، ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ރަނިންމޭޓަކަށް ފޮރިން މިނިސްޓަރު ޝާހިދު ހަމަޖެއްސުމަށް އިންޑިއާއިން ނުފޫޒު ފޯރުވަމުންދާ ކަމަށް ތުހުމަތު ކުރެވޭ ކަމަށް ބުނެ، ވާހަކަ ދެކެވޭ ކަމަށާއި، ޝާހިދަކީ ރަނިންމޭޓަކަށް ވުމުގެ ފުރުސަތު އޮތް ބޭފުޅެއްތޯ  ނޫސްވެރިއަކު ކުރި ސުވާލަށް ޖަވާބު ދެއްވަމުންނެވެ.

އެ ސުވާލުގެ ޖަވާބު ދެއްވަމުން ރައީސް ވިދާޅުވީ ރަނިންމޭޓަކާ މެދު ނުވިސްނަވާ ކަމަށާ، އަދި އެކަމުގައި ބޭރު ގައުމަކުން ނުފޫޒުވެސް ނުފޯރުވާ ކަމަށެވެ.

"ރަނިންމޭޓެއް އަދި ކަނޑައެއް ނާޅަން. އަޅުގަނޑަކަަށް ނާދޭ އެކަހަލަ އެއްވެސް ޕްރެޝަރެއް. ޚާއްސަކޮށް ވަކި ގައުމަކުން ރާއްޖޭގެ ސިޔާސީ ކަންކަމާ ނުބެހޭނެ. އެކަމުގެ ޔަގީންކަން އަޅުގަނޑުގެ އެބައޮތް." ރަަަަައީީީސް ޞާލިހުު ވިދާޅުވިއެވެ.

ރައީސް ވިދާޅުވި އެމްޑީޕީގައި ރިޔާސީ ކެންޑިޑޭޓުންނަށާއި އަދި ރަނިން މޭޓުންގެ ގޮތުގައި އެކަށީގެންވާ ބޭފުޅުން އެބަތިއްބެވިއެވެ. އެހެންނަމަވެސް، ރަނިން މޭޓެއް އަދި ކަނޑަނާޅުއްވާ ކަމަށާ އެކަން ކުރައްވާނީ ރިޔާސީ ޕްރައިމަރީއަށްފަހު، އިންތިޚާބުގައިިިިި އެމަނިކުފާނާއި އެކު ބައިވެރިވާ ކޯލިޝަންގައި ހިމެނޭ ޕާޓީތަކާއިވެސް މަޝްވަރާ ކުރެއްވުމަށް ފަހުގައި ކަމަށް ވިދާޅުވިއެވެ.

ރައީސް ޞާލިހުގެ މި ދައުރުގެ ނައިބު ރައީސް ފައިސަލް ނަސީމް ރަނިން މޭޓަކަށް އޭރު ހަމަޖެއްސީ ޖުމްހޫރީ ޕާޓީގެ ކައުންސިލުން ނެގި ވޯޓު ކާމިޔާބު ކުރައްވައިގެންނެވެ. ފައިސަލް ނަސީމް އަކީ މިހާރުގެ ވެރިކަން ކުރާ ކޯލިޝަންގައި ހިމެނޭ ޖުމްހޫރީ ޕާޓީގެ މެންބަރެކެވެ.