މާލީ ބަޣާވާތް ނާކާމިޔާބުވީ އެމްއެމްއޭގެ ގަވަރުނަރު ބަދަލުކުރެވުނު ކަމުން: ނާޒިމް

ބޭންކް އޮފް މޯލްޑިވްސް (ބީއެމްއެލް) އިން ނިންމި ނިންމުމަކާ ގުޅިގެން އިދިކޮޅު ފަރާތްތަކުން 'މާލީ ބަޣާވާތެއް' ހިންގަން މަސައްކަތްކުރި ކަމަށް ތުހުމަތުކުރެވޭ މައްސަލަ ނާކާމިޔާބުވެގެން ދިޔައީ، އޭގެ ކުރިން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަލީ ހާޝިމް މަޤާމުން ދުރުކުރެވިފައި އޮތުމުގެ ސަބަބުން ކަމަށް ރައްޔިތުންގެ މަޖިލީހުގެ ނައިބު ރައީސް އަޙްމަދު ނާޒިމް ވިދާޅުވެއްޖެއެވެ.

"ސަން" އޮންލައިނަށް ދެއްވި ޚާއްސަ އިންޓަވިއުއެއްގައި ނާޒިމް ވިދާޅުވީ، ކުރީގެ ގަވަރުނަރު އަލީ ހާޝިމް މަޤާމުން ވަކިކުރަން ޖެހުނީ ޑޮލަރުގެ މައްސަލަ ފަދަ ބޮޑެތި މައްސަލަތައް ހައްލުކުރުމަށް އަމިއްލަ އިސްނެގުމުގައި މަސައްކަތް ކުރައްވާފައި ނުވާތީ ކަމަށެވެ. އަދި މިހާރު އެކަމަކީ ރަނގަޅު ނިންމުމެއްކަން ޔަޤީންވާ ކަމަށް ވެސް އޭނާ ފާހަގަކުރެއްވިއެވެ.

ބީއެމްއެލްގެ ނިންމުމަކީ ވަރަށް ޒިންމާދާރުކަން ކުޑަ ނިންމުމެއް ކަމަށް ވިދާޅުވި ނާޒިމް، އެފަދަ ނިންމުމެއް ނިންމާއިރު އެކަމަށް ވަގުތު ދޭންޖެހޭނެ ކަމަށް ވެސް ފާހަގަކުރެއްވިއެވެ. ނަމަވެސް، އެމްއެމްއޭއިން އެޅި ފިޔަވަޅުތަކަކީ ވަރަށް މުހިންމު އަދި ރަނގަޅު ފިޔަވަޅުތަކެއް ކަމަށް އޭނާ ވިދާޅުވިއެވެ.

މީގެއިތުރުން، ރައީސް ޑރ. މުޙައްމަދު މުޢިއްޒު އިޢުލާންކުރެއްވި ސިޔާސަތުތަކާ ގުޅޭގޮތުން ވާހަކަދައްކަވަމުން ނާޒިމް ވިދާޅުވީ، އެއީ ރައްޔިތުން ފަޚުރުވެރިވެ ޝުކުރުވެރިވާންޖެހޭ ވަރުގެ ނިންމުންތަކެއް ކަމަށެވެ. އަދި މި ފިޔަވަޅުތަކާއެކު ބީއެމްއެލްއަށް ދިމާވެފައިވާ ޑޮލަރުގެ ދަތިކަމަށް ހައްލެއް ލިބޭނެ ކަމަށް ނާޒިމް ގަބޫލުކުރައްވާ ކަމަށް ވެސް ވިދާޅުވިއެވެ.

ނާޒިމް މިފަދަ މޭރުމަކުން ވާހަކަފުޅު ދައްކަވާފައިވާއިރު، ބީއެމްއެލްގެ އެ ނިންމުމާ ގުޅިގެން ފުލުހުން ވަނީ ޤާނޫނީ ގޮތުން އުފެދިފައިވާ ވެރިކަމެއް ވައްޓާލަން މަސައްކަތްކުރި ކަމަށް ބުނެ ޖިނާއީ ތަޙްޤީޤެއް ފަށާފައެވެ.

އަދި ރައީސް ޑރ.މުޢިއްޒު ވެސް ވަނީ އިދިކޮޅު ފަރާތްތަކުން ބަޣާވާތް ކުރަން އުޅުނު ކަމަށް ތުހުމަތުކުރައްވާފައެވެ.