ކުރީގައި ހުރެ ލީޑު ކުރެވޭނީ ފަހަތުގައި ހުރެގެންވެސް ލީޑު ކުރެވޭ މީހަކަށް: ޢިމްރާން
މީސްތަކުންގެ ކުރީގައި ހުރެ ލީޑް ކުރެވެނީ ލީޑަރެއްގެ ފަހަތުގައި ހުރެ ލީޑްކުރަން އެނގޭ މީހަކަށް ކަމަށް އަދާލަތު ޕާޓީގެ ރައީސް އަދި މި ސަރުކާރުގެ ހޯމް މިނިސްޓަރު އިމްރާނު ވިދާޅުވެއްޖެއެވެ.
އިމްރާން މިހެެން ވިދާޅުވެފައި ވަނީ އިއްޔެ ބޭއްވުނު އެމްޑީޕީގެ ރިޔާސީ ޕްރައިމަރީގައި އެމްޑީޕީގެ ރައީސް އަދި ކުރީގެ ރައީސް، ރައީސް މުހައްމަދު ނަޝީދާއި ވާދަކޮށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކާމިޔާބު ހޯއްދެވުމާއި ގުޅިގެން މިއަދު ކޮށްފައިވާ ޓްވީޓެއްގައެވެ.
އިއްޔެ ބޭއްވި ރިޔާސީ އިންތިޚާބުގައި ރައީސް ނަޝީދުގެ މައްޗަށް ރައީސް ޞާލިހު ކުރި ހޯއްދަވާފައިވާއިރު، ރައީސް ޞާލިހަކީ ވެރިކަމަށް ވަޑައިގެންނެވުމުގެ ކުރިން ޕާޓީގެ ކަންކަމުގައި ރައީސް ނަޝީދުގެ ފަހަތްޕުޅުގައި މަސައްކަތް ކުރައްވާފައިވާ ބޭފުޅެކެވެ. އަދި ހަމަ އެހެންމެ، އެމަނިކުފާނަކީ ގިނަ އަހަރުތަކެއް ވަންދެން ރައްޔިތުންގެ މަޖިލީހުގައި އެމްޑީޕީ ތަމްސީލު ކުރައްވާފައިވާ ބޭފުޅެއްވެސް މެއެވެ.
ރައީސް ޞާލިހާއި ޚިލާފަށް ރައީސް ނަޝީދަކީ ވެރިކަމަށް ވަޑައިގެންނެވުމުގެ ކުރިންވެސް އެމްޑީޕީގެ ރައީސްގެ މަގާމުގައި އިސް ލީޑަރެއްގެ ރޯލު އަދާކުރެއްވި ބޭފުޅެކެވެ. އެއަށްފަހު ވެރިކަމަށް ވަޑައިގެން ގައުމުގެ ލީޑަރެއްގެ މަގާމުގައި ހުންނެވިއިރު، އެމަނިކުފާނު މިހާރު ހުންނެވީ މަޖިލީހުގެ ރައީސްގެ މަގާމުގައެވެ.
އެހެންކަމުން ޢިމްރާން މި މޭރުމުން ވިދާޅުވެ ޓުވީޓް ކުރައްވާފައި މިވަނީ، ރައީސް ނަޝީދާއި ރައީސް ޞާލިހްގެ ތެރެއިން، ލީޑަރެއްގެ ހުންނަންޖެހޭ ސިފަ ބޮޑަށް ފުރިހަމައީ ރައީސް ޞާލިހު ގެ ކަން ހާމަކުރެއްވުމަށް ކަމަށް ބެލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
