މިއީ ރިޔާސީ އިންތިޚާބު ކާމިޔާބު ކުރުމަށް އެކުގައި މަސައްކަތް ފަށަންވީ ވަގުތު: ރާއީސް ޞާލިހް
މިއީ އެމްޑީޕީގެ ހުރިހާ މެންބަރުން ރިޔާސީ އިންތިޚާބު ކާމިޔާބު ކުރުމަށް އެކުގައި މަސައްކަތް ފަށަންވީ ވަގުތު ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
އިއްޔެ ކުރިއަށް ދިޔަ އެމްޑީޕީގެ ރިޔާސީ ޕްރައިމަރީގައި އެމްޑީޕީގެ ރައީސް މުހައްމަދު ނަޝީދާއި ވާދަކޮށް %61 ރައީސް ޞާލިހު ވަނީ އިންތިޚާބު ކާމިޔާބު ކުރައްވާފައެވެ.
އެކަމާއި ގުޅިގެން، ރައީސް ޞާލިހް މިއަދު ކުރެއްވި ޓުވީޓެއްގައި ވަނީ އެމްޑީޕީގެ މެންބަރުން އެމަނިކުފާނަށް ދެއްވި ތާއީދާއި ކުރެއްވި އިތުބާރަށް ޝުކުރު އަދާކުރައްވާފައެވެ.
އަދި މިއީ އެމްޑީޕީގެ ހުރިހާ މެންބަރުން ރިޔާސީ އިންތިޚާބު ކާމިޔާބު ކުރުމަށް އެކުގައި މަސައްކަތް ފަށަންވީ ވަގުތު ކަމަށްވެސް އެމަނިކުފާނު ވަނީ ވިދާޅުވެފައެވެ.
އެމްޑީޕީގެ ރިޔާސީ ޕްރައިމަރީ ކާމިޔާބު ކުރެއްވުމަށްފަހު ރޭ ބޭއްވެވި އުފާ ފާާޅުކުރުމުގެ ޖަލްސާގައި ވާހަކަފުޅުދައްކަވަމުން ރައީސް ވަނީ، މަސައްކަތް ފެށުނީ އަދި ކިރިޔާ ކަމަށް ވިދާޅުވެފައެވެ.
އަދި މިހާރު ވާދަވެރިކަން ނިމުނީކަމަށް، ވާދަވެރި ކެންޑިޑޭޓް ރައީސް ނަޝީދާއި އެމަނިކުފާނުގެ ޓީމަށް ވެސް ރައީސް ޞާލިހް ވަނީ އަންގަވާފައެވެ. އަދި އެއްވެސް ކަމެއް ހިތްޕުޅުގައި ނެތްކަން ފާހަގަ ކުރައްވައި ރައީސް ވަނީ، އެމްޑީޕީ ކުރިއަށް ގެންދިއުމުގައި ކުރާ މަސައްކަތުގައި ބައިވެރިވުމަށް ދައުވަތު ދެއްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
