އެމްޑީއެން އުވާލީ ރަނގަޅަށްކަމަށް ސިވިލް ކޯޓުން ކަނޑައަޅައިފި

ކީރިތި މާތް ނަބިއްޔާ މުޙައްމަދު صلى الله عليه وسلم އަށް ފުރައްސާރަކޮށް ރިޕޯޓު ނެރުނު މޯލްޑިވިއަން ޑިމޮކްރަސީ ނެޓްވޯކު (އެމްޑީއެން) އުވާލާފައިވަނީ ރަނގަޅަށްކަމަށް ސިވިލް ކޯޓުން ކަނޑައަޅައިފި އެވެ.

ޕްރިލިމިނަރީ އެސެސްމަންޓް އޮފް ރެޑިކަލައިޒޭޝަން އިންދަ މޯލްޑިވްސްގެ ނަމުގައި އެމްޑީއެންއިން ނެރުނު ރިޕޯޓުގައި އިސްލާމްދީނުގެ ހުކުމްފުޅުތަކަށް ގޮންޖަހާފައިވެ އެވެ. އަދި ސުކޫލުތަކުގައި ދަރިވަރުންނަށް ކިޔަވައިދޭ ދީނީ މުގައްރަރު ބަދަލުކުރުމަށް ގޮވާލާފައިވެއެވެ.

އެ ރިޕޯޓާއި ދެކޮޅަށް ރާއްޖޭގެ 100 އަށްވުރެ ކައުންސިލުން ބަޔާން ނެރެ އެމްޑީއެން އުވާލުމަށް ގޮވާލާ ރާއްޖޭގެ އެކި ކަންކޮޅުތަކުގައި މުޒާހަރާކުރުމާއި ގުޅިގެން އެ ޖަމުއިއްޔާ އުވާލާފައިވަނީ 2019 ވަނަ އަހަރުގައެވެ.

އެފަހުން ހޯމް މިނިސްޓްރީގެ ދަށުގައި ރަޖިސްޓްރީކޮށްގެން ހިންގަމުން އަންނަނިކޮށް އެމްޑީއެންގެ ރަޖިސްޓްރީ ބާތިލްކުރަން ނިންމައި، ޖަމިއްޔާ ރަސްމީކޮށް އުވާލަން ޔޫތު މިނިސްޓްރީން ނިންމީ ޖަމިއްޔާތައް ހެދުމުގެ މިނިވަންކަމާއި، ޖަމިއްޔާތަކާ ބެހޭ ގާނޫނާ ހިލާފަށް ކަމަށް ކަނޑައަޅައިދިނުމަށް އެދި އެމްޑީއެންގެ ފައުންޑާ ޝަހިންދާ އިސްމާއިލް ވަނީ ސިވިލް ކޯޓަށް މައްސަލަ ހުށައަޅާފައެވެ.

ޔޫތު މިނިސްޓްރީން އެ ދައުވާއަށް އިންކާރުކޮށް ބުނެފައިވަނީ ޖަމުއިއްޔާ އުވާލީ އެ ޖަމުއިއްޔާއިން އާންމު ކުރި ރިޕޯޓުގައި އިސްލާމްދީނުގެ އަސްލުތަކާއި ޚިލާފުކަންކަން ހިމަނާފައިވާތީ ކަމަށެވެ. އިސްލާމްދީނާއި ޚިލާފުވާ ކަންކަން ކުރަމުންދާނަމަ ޖަމިއްޔާގެ ރަޖިސްޓްރީ ބާތިލުކުރުމަކީ މިނިސްޓްރީއަށް ލިބިގެންވާ ބާރެއްކަމަށާއި، އެމްޑީއެން އުވާލީ އެ ބާރުގެ ބޭނުން ހިފައިގެންކަމަށް މިނިސްޓްރީން ވަނީ ބުނެފައެވެ.

އެމްޑީއެންގެ ރިޕޯޓަކީ ކީރިތި މާތް ނަބިއްޔާ މުޙައްމަދު صلى الله عليه وسلم އަށް ކުޑައިމީސްކޮށް އިސްލާމްދީނަށް ގޮންޖަހާ ލިޔެފައިވާ ނުރައްކާތެރި ރިޕޯޓެއްކަމަށް ރާއްޖޭގެ 100 އަށްވުރެ ދީނީ އިލްމުވެރިން ވަނީ ވިދާޅުވެ، އެކަން ބަޔާންކުރާ ޕެޓިޝަނެއްގައި ސޮއިކޮށްފައެވެ.

އެ ރިޕޯޓާއި ގުޅިގެން ދީނީ އިލްމުވެރިން ނިންމަވާފައިވާ ނިންމުންތަކަށް ރިއާޔަތްކޮށް ސިވިލް ކޯޓުން ނިންމީ އެމްޑީއެން އުވާލަން ޖަމިއްޔާތަކާ ބެހޭ ރަޖިސްޓްރާ ނިންމި ނިންމުމަކީ ގާނޫނާ ހިލާފު ނިންމުމެއް ކަމަށް ކަނޑައަޅާނެ ޝަރުއީ އަދި ގާނޫނީ ހަމައެއް ނެތް ކަމަށެވެ.

2019 ވަނަ އަހަރު އެމްޑީއެން އުވާލާފައިވީ ނަމަވެސް މިހާތަނަށް އެމްޑީއެން ރިޕޯޓު އެކުލަވާލުމުގައި ޝާމިލުވާ އެއްވެސް ފަރާތަކަށް ފިޔަވަޅު އަޅާފައެއް ނުވެއެވެ. އޭގެ އިތުރުން ސަރުކާރުގެ އިސް ބައެއް މަޤާމުތަކުގައިވެސް އެމްޑީއެންއަށް ނިސްބަތްވާ ބޭފުޅުން ތިއްބެވިކަން ފާހަގަކޮށްލެވެއެވެ.

އެމްޑީއެން އުވާލާފައި ވީނަމަވެސް، އެ ޖަމުއިއްޔާގެ ސޯޝަލް މީޑިއާ އެކައުންޓުތަކާއި ވެބްސައިޓު އަދިވެސް އެކްޓިވްކަން ފާހަގަކޮށްލެވެއެވެ. އަދި އެ މަންސަތައް ބޭނުންކޮށް އެ ޖަމުއިއްޔާއިން ގެންދަނީ ތަފާތު ހަރަކާތްތައްވެސް ހިންގަމުންނެވެ.