"ޗޯރު އިބުރޭ" ކިޔަން ބޭނުން މީހާއަށް އެހެން ކިޔެން ޖެހޭ: އީވާ

ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހަށް ފާޑުކިޔަން ބޭނުންވާ މީހާއަށް، ނުވަތަ ވަނަމުން ގޮވަން ބޭނުންވާ މީހުންނަށް އެ ފުރުސަތު އޮންނަން ޖެހޭކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުالله ވިދާޅުވެއްޖެ އެވެ.

އީވާ މިފަދައިން ވިދާޅުވެފައިވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަކީ "ކަނޑު ފޭރޭ ޗޯރު" ކަމަށް ސިފަކޮށް ޗެނަލް-13 އިން ގެނެސްދިން ގެނެސްދިން 3 ލަވައެއްގެ މައްސަލަ ބަލަންފަށާ، ޖަވާބުދާރީވުމަށް ބްރޯޑްކާސްޓިން ކޮމިޝަނުން އެންގުމާއި ގުޅިގެން، އެއީ މީޑިއާއަށް ބިރުދެއްކުމުގެ އަމަލެއްކަމަށް ސިފަކުރައްވާ މަޖިލީހަށް ހުށައެޅި ކުއްލި މައްސަލަ ބޭރުކޮށްލުމުން ނުރުހުން ފާޅުކުރައްވާ މިއަދުގެ ޖަލްސާގައި ވާހަކަދައްކަވަމުން ނެވެ.

"ޗޯރު އިބުރޭ. މިހެން ގޮވާލީއޭ ކިޔާފައި ބޮޑުސިންގާ ޓީވީ ޗެނަލެއް ސެންސަރުކުރަނީ"

އީވާ އަބްދުالله

އީވާ ވިދާޅުވީ އިދިކޮޅުގައި އޮންނަ މީޑިއާތަކުގެ އެންމެ ބޮޑު އަސާސަކީ ފާޑުކިޔުންކަމަށެވެ.

ޚުދު އެމްޑީޕީއަކީ އިދިކޮޅުގައި އޮތްއިރު ވެރިކަމުގައި ތިއްބެވި ފަރާތްތަކަށް ވަނަން ކިޔައި، ލަވަހަދައިގެން ސިޔާސީ މަސައްކަތްތައް ކުރިކަމުގެ ތާރީޚު އޮތް ބައެއްކަން އީވާ ވަނީ ހަނދާންކޮށްދެއްވާފަ އެވެ.

"އަޅުގަނޑުމެންނަކީ މިތާގައި އަގުލަބިއްޔަތު ލިބިގެންވާ އެމްޑީޕީއާއި އަދި އަޅުގަނޑުމެން މިވަގުތު އެމްޑީޕީއާއި ދުރުވެފައި ތިބި އެންމެންނަކީ 30 އަހަރުގެ ވެރިކަމެއް ބޮޑެސިންގާހާ ޝެހެންޝާހެއްގެ ވެރިކަމެއް ގޮޅާބޯ ގޮޅާބޯ ގޮޅާބޯ ކީ ކީނުން ގޮސް އޮފުކަނޑުވާލައިގެން ސައިޒަށް ތިރިކޮށްލައިގެން ވެރިކަން ބަދަލުކުރި ބައެއް"

އީވާ އަބްދުالله

އެމްޑީޕީގެ ފުރަތަމަ ވެރިކަމުގައި ރައީސް މުޙައްމަދު ނަޝީދު އިސްތިއުފާދެއްވުމުން، ދެން ވެރިކަމާއި ހަވާލުވި ޑރ މުހައްމަދު ވަހީދު ހަސަންމަނިކުގެ ވެރިކަމަށް ފާޑުކިޔުމަށް "އެބޭސިޑިން ވެއްޓިދާނެ" ލަވަހަދައިގެން ކިޔާފައިވާ ކަމަށާއި، އެފަހުން ރައީސް އަބްދުالله ޔާމީން އަބްދުލްގައްޔޫމުގެ ވެރިކަމުގައި ވެސް އެމަނިކުފާނަށް ނިސްބަތްކޮށް ތަފާތު ވާހަކަތައް ދައްކާފައިވާ ކަމަށާއި، އޭރު އެފަދައިން އެއްޗެހި ކިޔުމަށް ފުރުސަތު އޮތްކަން އީވާ ފާހަގަކުރެއްވި އެވެ.

އީވާ ވިދާޅުވީ، ލަވަހަދައިގެން ކިޔުމާއި، ވަނަން ކިޔުމަކީ ސިޔާސީ އުކުޅެއްކަމަށެވެ. އެހެންކަމުން، ރައީސް ޞާލިހަށް ފާޑުކިޔާ ފަރާތްތަކުން އެ މޭރުމުން އަމަލުކުރަން ބޭނުންވާނަމަ އެ ފުރުސަތު އޮންނަންވާނެކަމަށް އޭނާ ވަނީ ވިދާޅުވެފަ އެވެ.

"ޗެނަލް-13 އެއް އަޅުގަނޑެއް ނުބަލަން. އަޅުގަނޑަކަށް ބަލާކަށް ނުކެރޭ، އޭގަ ދައްކާ ވާހަކަތަކަކަށް އަޅުގަނޑު އެއްބަހެއް ނޫން. އެކަމަކު ޗޯރު އިބުރޭ ޗޯރު އިބުރޭ، ޗޯރު އިބުރޭ އެމީހުން ގޮވަން ބޭނުމިއްޔާ އެމީހުން ގޮވުމަކީ އެމީހުންގެ ހައްގެއް"

އީވާ އަބްދުالله

އީވާ ވިދާޅުވީ ރައީސަށް ފާޑުކިޔާ ހަދާފައިވާ ލަވައެއް ދައްކާތީ ޗެނަލް ސެންސަރުކޮށް، މަޖިލީހުގައި ރައީސަށް ފާޑުކިޔާތީ ދައުލަތުގެ މީޑިއާއިން މަޖިލިސް ލައިވްކުރުން ހުއްޓާލުމަކީ ޚިޔާލުފާޅުކުރުމުގެ މިނިވަންކަން ފަހަތަށް ސޮއްސާލުން ކަމަށެވެ.

ފެހި ގާނޫނު އަސާސީން ރައްޔިތުންނަށް ލިބުނު އެންމެ މުހިންމު އެއް ހައްގަކީ ޚިޔާލު ފާޅުކުރުމުގެ މިނިވަންކަން ކަމަށާއި، އެ ހައްގު ގެއްލޭގޮތަށް ނުވަތަ އުނިވާގޮތަށް ކަންކަން ބައްޓަންވެގެން ދިއުމަކީ ޑިމޮކްރަސީގައި ފަހަތަށް އަޅާ ފިޔަވަޅެއްގެ ގޮތުގައި އީވާ ސިފަކުރެއްވި އެވެ.