ނަޝާތު އިތުރު ދައުރަކަށް އީސީއަށް އައްޔަނު ކުރަން މަޖިލިސް އަށް
އިލެކްޝަންސް ކޮމިޝަންގެ މެންބަރެއްގެ ގޮތުގައި މިހާރު ވެސް ހުރި އަލީ ނަޝާތު އައްޔަން ކޮށްދިނުމަށް އެދި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ރައްޔިތުންގެ މަޖިލީހުގައި އެދިވަޑައިގެންފިއެވެ.
ނަޝާތުގެ ދައުރު ހަމަވާތީ އިލެކްޝަންސް ކޮމިޝަނަށް މެންބަރަކު އައްޔަން ކުރަން ކުރި އިއުލާނަށް އިޖާބަދިން ފަރާތްތަކުގެ ނަންތައް މިއަދު ރައީސް ސޯލިހް މަޖިލީހަށް ފޮނުވާފައިވާއިރު، އެނަންތަކުގެ ތެރެއިން ރައީސް ސޯލިހް އިސްކަންދެއްވާ ނަމެއްގެ ގޮތުގައި އޮތީ ނަޝާތު އެވެ. ނަމަވެސް އިލެކްޝަންސްގެ މެންބަރު ކަމަށް ކުރިމަތިލި އެހެން ބޭފުޅުންގެ ނަންފުޅުތައް ވެސް މަޖިލީހަށް ފޮނުވިއެވެ.
ނަޝާތާއި ކުރިމަތިލި އެހެން މެންބަރުންގެ ނަން ދިރާސާ ކުރެއްވުމަށްވަނީ ރައްޔިތުންގެ މަޖިލީހުގެ މިނިވަން މުވައްސަސާ ތަކާއިބެހޭ ކޮމެޓީއަށް ފޮނުވާފައެވެ.
ނަޝާތު އިލެކްޝަންސް ކޮމިޝަންގެ މެންބަރު ކަމަށް އައްޔަން ކުރީ ކުރީގެ ރައީސް އަބްދުالله ޔާމީންގެ ވެރިކަމުގައި 2018 ވަނަ އަހަރުގެ ޖުލައި 25 ވަނަ ދުވަހު އެވެ. އިލެކްޝަންސް ކޮމިޝަންގެ މެންބަރު ކަމަށް އައްޔަން ކުރުމުގެ ކުރިން އޭނާ ހުންނެވީ އެކޮމިޝަންގެ ޑިރެކްޓަރެއްގެ މަގާމުގައެވެ.
އިލެކްޝަންސް ކޮމިޝަންގެ މެންބަރުން އައްޔަން ކުރަނީ 5 އަހަރުގެ ދައުރަކަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
