ކުރި ވައްކަން ނުބަލާ ލަދު ހަޔާތަށް ޒީރޯ ޓޮލަރެންސް ދިނީމާ "ޗޯރު އިބުރޭ" ގޮވާނެ: ވަހީދު
މި ސަރުކާރުގެ ތެރޭގައި ހިންގާފައިވާ ވައްކަމާއި ކޮރަޕްޝަންގެ މައްސަލަތަށް ނުބަލާ، ވައްކަމާއި ކޮރަޕްޝަނަށް ދެއްވާނެކަމަށް ވިދާޅުވި ޒީރޯ ޓޮލަރެންސް ޕޮލިސީ ތަންފީޒު ނުކުރައްވާ ހުންނެވުމުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ނިސްބަތްކޮށް "ޗޯރު އިބުރޭ" އޭ ކިޔައި ގޮވާނެކަމަށް މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު (ވައްޑެ) ވިދާޅުވެއްޖެ އެވެ.
ވަހީދު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ 5 ވަނަ ޖަލްސާގައި ވާހަކަދައްކަވަމުން ނެވެ. މިއަދުގެ ޖަލްސާއަށް ޕީޕީއެމްގެ ނައިފަރު ދާއިރާގެ މެމްބަރު އަހުމަދު ޝިޔާމު ހުށައެޅުއްވި ޗެނަލް-13 އަށް އިންޒާރުދިން މައްސަލަ ބޭރުކޮށްލުމާއި ގުޅިގެން ވަނީ މެމްބަރުންގެ މެދުގައި ބަހުސެއް އުފެދިފައެވެ.
އެ މައުލޫއަށް ވާހަކަދައްކަވަމުން ވަހީދު ވިދާޅުވީ ވައްކަމާއި ކޮރަޕްޝަންގެ މައްސަލަތައް ނުބަލާ، ހަނު ހުންނަވާނަމަ ރައީސް ޞާލިހަށް ނިސްބަތްކުރައްވާ "ޗޯރު އިބުރޭ" އޭ ގޮވާނެކަމަ ށެވެ.
"ކޮރަޕްޝަނަށް ޒީރޯ ޓޮލަރެންސް ދެއްވާނަމޭ ކިޔާފަ ވަޑައިގެން ވައްކަން އިންތިހާއަށް ކޮރަޕްޝަން އިންތިހާއަށް ފުޅާކުރައްވާ ވައްކަމުގެ އެއްވެސް މައްސަލައެއް ނުބައްލަވާ ލަދު ހަޔާތަށް ޒީރޯ ޓޮލަރެންސް ދެއްވީމާ ޗޯރު އިބުރޭ ކިޔާނެ"
މެމްބަރު މުހައްމަދު ވަހީދު
ވައްޑޭގެ ވާހަކައިގައި ވަނީ ރައީސް ޞާލިހުއަށް ނިސްބަތްކޮށް ބައެއް ވަނަންތައް އާންމު ރައްޔިތުން ކިޔަމުންދާ ސަބަބުތަކަށް އަލިއަޅުވާލައްވާފަ އެވެ.
"އަމީނީ މަގުގެ މަސައްކަތް ޗައިނާގެ ބޮޑު ފާރަށްވުރެ ސްލޯވެގެން ދިޔައިމާ ސްލޯލިހު ކިޔާނެ މީހުން. ޕޯޑިއަމަށް އަރާވަޑައިގެން ވަރަށް ކޮށިކޮށް ވެސް ޑިޓޮކްސިފިކޭޝަން ނުކިޔުއްވިގެން އުޅުއްވީމާ ނުކިޔަވާ އިބޫ އޭ ވެސް ކިޔާނެ"
މެމްބަރު މުހައްމަދު ވަހީދު
ވަހީދު ވިދާޅުވީ ސިޔާސީ ކަންކަމަށް ނިކުންނަން ވާނީ ވަނަން ވެސް ކިޔާނެކަން ދަނެގެން، އެފަދަ ކަންކަން ހަޖަމު ކުރެވޭވަރުގެ ގާބިލުކަން ހުރެގެން ކަމަށެވެ.
ރައީސް ޞާލިހަށް ތާއީދުކުރައްވާ ބޭބޭފުޅުން ވަގު އެކައުންޓުތައް ހަދައިގެން އެމްޑީޕީން ފެޔަށް ޖެހުނު މެމްބަރުންނާއި ދިމާލަށް ހުތުރު އެއްޗެހި ގޮވަމުންދާކަން އެނގިވަޑައިގަންނަވާ ކަމަށާއި، އެކަން ކުރައްވަނީ ރައީސުލްޖުމްހޫރިއްޔާ އަންގަވައިގެންކަން ވެސް އެނގިލައްވާކަމަށް ވަހީދު ވިދާޅުވި އެވެ.
އެހެން ނަމަވެސް ރައީސް ޞާލިހަށް ނިސްބަތްކޮށް އެއްޗެއް ބުނީމާ، ދައުލަތުގެ ވަސީލަތްތައް ބޭނުންކޮށްގެން ބަޔަކު ހިފަހައްޓާ އޮބިއަޅުވަން ސަރުކާރުން މަސައްކަތް ކުރަމުންދާ ކަމަށާއި، މިއީ ޑިމޮކްރަސީއާއި ވަރަށް ބީރައްޓެހި ސިފަތަކެއްކަމަށް ވަހީދު ވަނީ ވިދާޅުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
