ލޯފަން މީހުންނަށް ވޯޓު ލެވޭގޮތަށް ހަދާފައިވާ ޓެމްޕްލޭޓް ދައްކާލައިފި

އިންތިހާބުތަކުގައި އެހީތެރިޔަކާ ނުލައި ލޯފަން މީހުންނަށްވެސް ވޯޓު ލެވޭ ގޮތަށް ހަދާފައިވާ ކަރުދާހުގެ ޓެމްޕްލޭޓްގެ ސާމްޕަލްއެއް ދައްކާލައިފި އެވެ.

ފެނުމުގެ ނުކުޅެދުންތެރިކަން ހުންނަ މީހުންނަށް އެހީތެރިޔަކާ ނުލާ ވޯޓު ލެވޭނެ ގޮތް ހަދަން އިންތިހާބުތަކާ ބެހޭ އާންމު ގާނޫނަށް އިސްލާހު ގެންނަން ހުށަހެޅި ބިލު މިއަދު ރައްޔިތުންގެ މަޖިލީހަށް ހުށަހަޅުއްވަމުން ހިންނަވަރު ދާއިރާގެ އެމްޑީޕީގެ މެމްބަރު ޖީހާން މަހުމޫދު ވަނީ ލޯފަން މީހުންނަށް ވޯޓްލެވޭ ގޮތަށް ހަދާފައިވާ ޓެމްޕްލޭޓް އޮންނަ ގޮތް ދައްކަވާލައްވައި އޭގެ ތަފްސީލު ދެއްވައިފަ އެވެ.

ޖީހާން ވިދާޅުވީ ގާނޫނުގައި މިހާރު އޮތް ގޮތުން، ލޯފަން މީހުން ވޯޓުލާން ޖެހޭނީ މީހެއްގެ އެހީތެރިކަމާ އެކުގައި ކަމަށާއި އޭގެ ސަބަބުން ގާނޫނުން ކަށަވަރުކޮށްދޭ އެތައް ހައްގެއް ލޯފަން މީހުންނަށް ގެއްލިފައިވާ ކަމަށެވެ. އެހެންކަމުން މި އިސްލާހާއި އެކު އެ މައްސަލަ ހައްލު ވެގެންދާނެ ކަމަށްވެސް އޭނާ ވިދާޅުވި އެވެ.

"ބޭނުމަކީ ފެނުމުން މަހުރޫމްވެފައިވާ މީހުން އެ ޓެމްޕްލޭޓް މަތީގައި އަތް ޖައްސާލައިގެން ބޭނުންވާ ކެންޑިޑޭޓެއްގެ ނަމާ ދިމާލުގައި ފާހަގަ ޖަހަން ފަހިކޮށްދިނުން. މިއީ ވޯޓު ލާ ކަރުދާހުގެ ސައިޒަށް އޮންނަ ޕްލާސްޓިކް ގަނޑެއްގައި އަރިމަތީގައި ނަންބަރުތަކާ ދިމާލަށް ކަނޑާ ނަގާފައި މި ވަނީ ރަސްގެއެއްހެން ފާހަގަޖަހަންވީ ދިމާ. މިހެން އޮތުމުގެ ސަބަބުން މި ޓެމްޕްލޭޓަކީ ވޯޓު ކަރާދާހަ އެއްވަރު، އެތެރެ ފެންނަ ޕްލާސްޓިކް ވަސީލަތެއް. އެހެންވީމާ ކޮންމެ ކެންޑިޑޭޓެއްގެ ނަމާ ދިމާލުގައި ރަސްގެ ނުވަތަ ރަނގަޅިު ފާހަގަ އެވަނީ ޓެކްޓައިލް ކުރެވިފަ. މި ހިނދުން މި ޓެމްޕްލޭޓް ބޭނުންކޮށްގެން ބޭނުންވާ ކެންޑިޑޭޓުގެ ނަމާ ދިމާލުގަ ގަލަމުން ފަވާލުމުގެ ފުރުސަތު ފެނުމުން މަހުރޫމްވެފައިވާ ފުރުސަތުތަކަށް ލިބިގެންދާނެ، އަދި ވޯޓު ކަރުދާހުގައި ފާހަގަ ޖަހަން ބޭނުންވާ ދިމާނޫން އެހެން އެެއްވެސް ފަރާތެއްގައި ގަލަމުން ފެވުމުގެ ފުރުސަތުވެސް ނެތިގެންދާނެ،" ޖީހާން ވިދާޅުވި އެވެ،

މި ބިލުގައި ވާގޮތުން ލޯފަން މީހާގެ ވޯޓުގެ ސިއްރުކަން ގެއްލޭނެ އެއްވެސް އަމަލެއް އެއްވެސް ފަރާތަކުން ކޮށްގެން ނުވާނެއެވެ. އެގޮތުން، ވޯޓު ކަރުދާސް އަދި ޓެމްޕްލޭޓް ދޫކުރުމުން ވޯޓުލާން ހާޒިރުވި މީހާ ވޯޓު ކަރުދާހުގައި ފާހަގަ ޖެހުމަށް ވޯޓިން ބޫތަށް ދާ ވަގުތުން ފެށިގެން ވޯޓު ކަރުދާހުގައި ފާހަގަ ޖަހައި ވޯޓު ފޮއްޓަށް އެ ވޯޓު ކަރުދާސްކޮޅު ވައްޓާލަން ދެން އިލެކްޝަންސް ކޮމިޝަންގެ އެއްވެސް އޮފިޝަލަކު ނުވަތަ އެނޫންވެސް އެއްވެސް ފަރާތަކުން އެތަނުގައި ހާޒިރުވެ ހުރެގެން ނުވާނެ ކަމަށް ބުނެފައިވެއެވެ.