ބިދޭސީ 10 މީހުން ހިމެނޭ ގޯތި ލިސްޓް: އަކްރަމް ރައްދު ދެއްވައިފި
މާލެއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް ސަރުކާރުން ހުޅުވާލި "ބިންވެރިޔާ ސްކީމް" ގެ ދަށުން ގޯތި ލިބޭ ފަރާތްތަކުގެ ތެރޭގައި 10 ބިދޭސީން ހިމެނޭ ކަމަށް މީސް މީޑީއާ އާންމުވެ، ސަރުކާރަށް އަމާޒު ވަމުންދާ ފާޑު ކިޔުމަށް ޕްލޭނިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ރައްދު ދެއްވާފިއެވެ.
ބިންވެރިޔާ ސްކީމްގެ ދަށުން ގޯތި ލިބޭ ފަރާތްތަކުގެ ވަގުތީ ލިސްޓް އާންމު ކޮށްފައިވަނީ މިދިޔަ ހޯމަ ދުވަހުއެވެ.
މި ލިސްޓުގައި ބިދޭސީން ހިމެނިފައިވާކަން އާންމުންގެ ސަމާލުކަމަށް އެންމެ ފުރަތަމަ އައިސްފައިވަނީ އެލިސްޓުގައި ހަބީބު ރަހިމާން މުހައްމަދު ހަނީފާ ކިޔާ މީހަކު އޮތުމުގެ ސަބަބުންނެވެ. އޭނާ ވަނީ ޝަރުތު ހަމަވާ، އިތުރު މީހަކާ ޖޮއިންވުމުން ގޯތި ލިބުމުގެ ފުރުސަތު ލިބޭ ބައިގައި ހިމެނިފައެވެ.
އެހެންނަމަވެސް ހަބީބުގެ ނަން ލިސްޓުގައި އޮތީ އޮޅުމަކުން ކަމަށާ، ދާއިމީ ލިސްޓު އާންމު ކުރާއިރު އެކަންކަން އިސްލާހު ކުރާނެ ކަމަށް ޕްލޭނިންގ މިނިސްޓްރީން އޭރު ވަނީ ބުނެފަ އެވެ.
މިއަށްފަހު ހަބީބުގެ އިތުރުން މުހައްމަދު ނަޒީރު ކިޔާ ބިދޭސީއަކާއި އިތުރު 8 މީހަކު ހިމެނޭ ލިސްޓެއް މީސް މީޑީއާގައި ވަނީ އާންމު ވެފައެވެ. އަދި މިކަމުގެ ސަބަބުން ގިނަ ބަޔެއްގެ ފާޑު ކިޔުން ސަރުކާރަށް ވަނީ އަމާޒު ވެފައެވެ.
މިކަމަށް ރައްދު ދެއްވާ އަކްރަމް ކަމާލުއްދީން މިއަދު ކުރެއްވި ޓްވީޓުގައި ވިދާޅުވީ މިއީ ރަގަޅު ވާހަކައެއް ނޫން ކަމަށާއި މި ލިސްޓުގައިވާ 10 މީހުންގެ ތެރެއިން ވަގުތީ ލިސްޓް ގައި ވަނީ ކުރިންވެސް ފާހަގަ ކުރެވުނު 3 މީހުން ކަމަށެވެ.
މިއާއިއެކު ވަގުތީ ލިސްޓެއް ނެރުމުގެ ބޭނުމަކީ މިހެން ހުރި ކަންތައްތައް ދެނެގަނެ އިސްލާހު ކުރުން ކަމަށް އަކްރަމް ވިދާޅުވިއެވެ.
އަދި ދާއިމީ ލިސްޓް ނުކުންނާނީ އެކަންކަން ބެލި ރަގަޅު ކުރެވިގެން ކަމަށްވެސް އަކްރަމް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
