ޕެލޯސީގެ ދަތުރުފުޅަށްފަހު ފުރަތަމަ ފަހަރަށް އެމެރިކާގެ ހަނގުރާމަ މަތީ މަނަވަރުތަކެއް ޓައިވާން ކައިރިއަށް

އެމެރިކާގެ ހައުސް އޮފް ރެޕްރެޒެންޓޭޓިވްސްގެ ރައީސް ނޭންސީ ޕެލޯސީގެ ދަތުރުފުޅަށްފަހު ފުރަތަމަ ފަހަރަށް އެމެރިކާގެ ހަނގުރާމަ މަތީ މަނަވަރުތަކެއް ޓައިވާން ކައިރިން ދަތުރުކުރަމުންދާ ކަމަށް އެމެރިކާގެ އަސްކަރިއްޔާއިން ވަނީ އިއުލާންކޮށްފައެވެ.

ޕެލޯސީ މި މަހުގެ ކުރީކޮޅު ޓައިވާނަށް ކުރެއްވި ދަތުރުފުޅާއި އެކު އެމެރިކާއި އާއި ޗައިނާއާއި ދެމެދުގައި އޮތް ގުޅުން ވަނީ ހީނަރުވެގެން ގޮސްފައެވެ. އަދި އެ ދަތުރުފުޅާއި ގުޅިގެން ޗައިނާއިން ވަނީ މިހާތަނަށް އެ ގައުމުގެ ތާރީހުގައި ހިންގި އެންމެ ވަރުގަދަ އަސްކަރީ ހަރަކާތްތައް ޓައިވާންގެ ވަށައިގެން ހިންގާފައެވެ.

އެމެރިކާގެ އަސްކަރިއްޔާއިން އިއުލާން ކޮށްފައިވާ ގޮތުގައި މިފަހަރު ޓައިވާން ކައިރިން ދަތުރު ކުރަމުންދަނީ މިސައިލް ފޮނުވާލުމުގެ ގާބިލުކަން ލިބިފައިވާ ޔޫއެސްއެސް އެންޓިއެޓަމް އާއި ޔޫއެސްއެސް ޗާންސެލާވިލްއެވެ. ޓައިވާން ސަރަހައްދުން މީގެ ކުރިންވެސް އެމެރިކާ އަދި ހުޅަނގުގެ ބޮޑެތި ބާރު ތަކުގެ އަސްކަރީ މަނަވަރުތައް ވަނީ ދަތުރުކޮށްފައެވެ.

މިކަމާއި ގުޅިގެން ޗައިނާގެ ސިފައިން އާދީއްތަ ދުވަހު ބުނީ ދެ މަނަވަރުގެ ދަތުރު މޮނީޓާ ކުރަމުންދާ ކަމަށާއި ހަމަލާއެއް ދީފި ނަމަަ ރައްދު ދޭން ތައްޔާރަށް ތިބި ކަމަށެވެ. އަދި ޓައިވާނުން ވަނީ އެ ސަރަހައްދުގެ ހާލަތު މި ދެ މަނަވަރާއި ގުޅިގެން ބަދަލުވެފައި ނުވާކަމަށް ބުނެފައެވެ.

ފާހަގަ ކޮށްލެވޭ ގޮތުގައި ޗައިނާއިން ދެކެމުން އަންނަނީ ޓައިވާނަކީ އެ ގައުމުގެ އަށެއްގެ ގޮތުގައެވެ. ނަމަވެސް ވަކި ދައުލަތެއް ކަމުގައި ދައުވާ ކުރާ ޓައިވާނާއި އެކު އެމެރިކާއިން "ހަރުދަނާ، ނުރަސްމީ ގުޅުން" ވެސް ވަނީ ގާއިމު ކޮށްފައެވެ.