ތަރައްގީ އަކީ ލަވާޒާ ކޮފީ ތައްޓަކަށް ވެފައި މިއިންނަނީ؛ އެވަރުންވެސް އެކައުންޓް ގައި ހުންނަނީ 0 ރުފިޔާ: އަލީ

އައު ގަނޫނު އަސާސީއާއި އެކު ވެރިކަން ކުރަމުންދާތާ މިހާރު 15 އަހަރަށްވުރެ ގިނަ ދުވަސްވެފައިވާއިރުވެސް، ދިވެހިރާއްޖެއިން ހަގީގީ ތަރައްގީ ނުފެންނަ ކަމަށް ޖުމްހޫރީޕާޓީގެ ރިޔާސީ ކެންޑިޑޭޓް ގާސިމް އިބްރާހިމް ގެ އިންތިހާބީ އޭޖެންޓް އަދިި ކުރީގެ ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.

ރިޔާސީ ކެންޕެއިނަށް ޖޫމްހޫރީ ޕާޓީގެ ޓީމުން މިއަދު ވަނީ ބ އަތޮޅުގެ ބައެއް ރަށްތަކަށް ދަތުރު ފަށްޓަވާފައެވެ. އެ ދަތުރުގެ ތެރެއިން އެ އަތޮޅު ތުޅާދޫއަށް ވަޑައިގެން ވާހަކަ ދައްކަވަމުން ޢަލީ ވަހީދު ފާއިތުވި 15 އަހަރުގެ ތެރޭގައި، ޖުމްހޫރީ ޕާޓީގެ އެހީތެރިކަމާއި އެކު އެކި ސަރުކާރުތައް ގެނެވިފައިވާ ކަމަށެވެ. އެހެންނަމަވެސް، މިއަދާއި ހަމައަށްވެސް ރައްޔިތުންގެ ޖީބަށް ބަރުވާ ގޮތް ވެފައި ނުވާ ކަމަށް އެނާ ވިދާޅުވި އެވެ.

އަޅުގަނޑުމެން އެކި ސަރުކާރުތައް މިދިޔަ 15 އަހަރު ގެނެސް، މިއަދުވެސް އަޅުގަނޑުމެންގެ ޒުވާނުންނަށް ތަރައްގީ އަކީ ލަވާޒާ ބްލެކް ކޮފީއެއްގެ ހިސާބުގައި މި އިންނަނީ. އަޅުގަނޑުމެންގެ ރަށްރަށުގައި ތަރައްގީ އައިއްސަ މި އިންނަނީ، ހުސްވަގުތު ގޮސް ކެފޭއަކަށް ގޮސް ލަވާޒާ ބްލެކް ކޮފީ އަކަށް އޯޑަރު ކޮށްލާ ހިސާބަށް. އޭރުވެސް އެކައުންޓް ގައި އިންނަނީ ސުމެއް ޖެހިފައި. އަނބިމީހާ އަށް އިންވެސްޓްމެންޓް އެއް ހޯދަންޏާ ލޯނެއް ނަގަން މި ޖެހެނީ.

ޢަލީ ވަހީދު

"ލޯނު ރާއްޖެ އަށް ބަދަލުވެފައި އަޅުގަނޑުމެންގެ ރާއްޖެ މިއޮތީ" ޢަލީ ވަހީދު ވިދާޅުވިއެވެ.

މިއާއެކު އަލީ ވަހީދު ވިދާޅުވީ އެއީ މީހުންގެ ވޯޓު ހޯދަން ދައްކަވާ ވާހަކައެއް ނޫން ކަމަށާ، އެ ބައްދަލުވުމުގައި ތިބި މީހުންގެ ތެރެއިން އެންމެ ތިން މީހުން ނަމަވެސް، އެމީހެއްގެ ބީއެމްއެލް އެކައުންޓް ގައި އަރަނީގެ ގޮތުގައި އެއް ލައްކަ ރުފިޔާ އިން ކަން ޔަގީން ކޮށްދެއްވައިފި ނަމަ އިސްތިއުފާ ދެއްވާފައި ގެއަށް ވަޑައިގަންނަވާނެ ކަމަށެވެ.

ޢަލީ ވަހީދު ވިދާޅުވީ، ރާއްޖޭގެ ރައްޔިތުން ލޯނު ނަގަން ޖެހި ދަރަނިވެރި ވީ ގައުމުވެސް އެ ހާލަތުގައި އޮތުމުން ކަމަށެވެ. އަދި ގައުމު އެ ހާލަތަށް ދިޔައީ 1 ރުފިޔާ 2 ރުފިޔާއަށް ހަދަން ނޭނގޭ ވެރިއަކަށް ވެރިކަން ކުރަން ހަވާލު ކުރުމުން ކަމަށްވެސް އޭނާ ވިދާޅުވި އެވެ.

މިއާއެކު ދިވެހި ރައްޔިތުން "ޕާޓީ ޓިކެޓަށް ވޯޓު ލާ ލާ، ހަފުސްވެފައިވާ" ކަން ފާހަގަކުރައްވައި ޢަލީ ވަހީދު ވަނީ ކުރިއަށް އޮތް ރިޔާސީ އިންތިހާބުގައި އެކަން ބަދަލު ކުރައްވައި ގައުމަށް ޚިދުމަތް ކުރެއްވުމުގައި ދެމި ހުންނަވާނެ ބޭފުޅަކަށް ވޯޓު ދެއްވުމަށް އެދި ވަޑައިގެންފަ އެވެ. އަދި އެއީ ގާސިމް ކަމަށްވެސް ވިދާޅުވި އެވެ.