އެއްޖިންސުން ގުޅުން ހިނގައި، އޮރިޔާން ވީޑިއޯ ކުރި އަލަމްގިރަށް ދެއަހަރާއި ނުވަ މަހުގެ ހުކުމެއް!

ރާއްޖޭގެ ގިނަ ބަޔަކާއެކު އެއް ޖިންސުން ގުޅުން ހިންގައި އެ މަންޒަރު ވީޑިއޯ ކުރި ބަނގްލަދޭޝް ރައްޔިތެއް ކަމަށްވާ އެމްޑީ އަލަމްގީރް ގެ މައްޗަށް ދައުލަތުން އުފުލި 40 ދަޢުވާ އޭނާގެ މައްޗަށް ސާބިތުވާ ކަމަށް ނިންމައި، ދެ އަހަރާއި ނުވަމަސް ދުވަހަށް އޭނާ ޖަލަށް ލުމަށް ކްރިމިނަލް ކޯޓުން ހުކުމް ކޮށްފިއެވެ.

ކްރިމިނަލް ކޯޓުން ކުރި ހުކުމުގައި ބުނީ، ދައުލަތުން ބަނގްލަދޭޝް ރައްޔިތެއްކަމުގައިވާ އެމްޑީ އަލަމްގިރްގެ މައްޗަށް ދަޢުވާކުރާ އޮރިޔާން ކާޑު ހެދުމުގެ ކުށުގެ މި ދަޢުވާއަށް އެމްޑީ އަލަމްގިރް އިބްތިދާއީ މަރުޙަލާގައާއި، އަވަސްނިޔާގެ ޝަރީޢަތުގެ މަރުޙަލާގައި އެމްޑީ އަލަމްގިރް އިޢުތިރާފްވެފައިވާތީ، އެމްޑީ އަލަމްގިރްގެ ޞައްޙަ އިޢުތިރާފުން މި މައްސަލަ ޤާނޫނުއަސާސީގެ 51 ވަނަ މާއްދާގެ (އ) ގައި ބަޔާންކުރާ އެކަށީގެންވާ މިންވަރެއްގެ ޝައްކެއްނެތި ޝަރީޢަތަށް ސާބިތުވާ ކަމަށެވެ.

އަލަމްގިރު ގެ މައްޗަށް އުފުލި 40 ދަޢުވާގެ ހުކުމްވެސް ވަކިވަކިން ކޮށްފައިވާއިރު އެއިން ކޮންމެ ދައުވާ އަކަށްވެސް އައިސްފައިވަނީ 27 ދުވަހުވެ ޖަލު ހުކުމެކެވެ. ނަމަވެސް އެ ސާބިތުވި 40 ދައުވާގެ ތެރެއިން ދެދައުވާއަކަށް ތަންފީޒު ކުރަން ޖެހޭ ހުކުމް ތަންފީޒުކޮށް ނިމިފައިވާ ކަމަށާއި އަދި ތިން ވަނަ ދައުވާގައި އިއްވި ހުކުމުން 25 ދުވަސް ތަންފީޒުކޮށް ނިމިއްޖެ ކަމަށް ވެސް ކްރިމިނަލް ކޯޓުން ވަނީ ހުކުމް ކޮށްފައެވެ.

އެހެންކަމުން ތިން ވަނަ ދައުވާ އިން އަލަމްގިރު ތަންފީޒު ކުރަން ޖެހޭނީ ދެދުވަހެވެ. ވުމާއެކު ހުކުމަށް ބަލާއިރު އަލަމްގިރު ތަންފީޒު ކުރަން ޖެހޭނީ 38 މައްސަލައިގެ ހުކުމެވެ.

އަލަމްގިރީގެ މައްސަލަ ފުލުހުން ބަލަން ފަށާފައިވަނީ އޭނާ އެތައް ބަޔަކާއެކު އެއްޖިންސުން ގުޅުން ހިންގާ މަންޒަރު ފެނިގެންދާ ވީޑިއޯތަކެއް ސޯޝަލް މީޑިއާގައި އާންމުވުމާއި ގުޅިގެންނެވެ.

އެ ވީޑިއޯތަކުގައި އަލަމްގިރި ރާއްޖޭގެ މަޝްހޫރު ސިޔާސީ ފަރާތްތަކާ ހައިޕްރޮފައިލް ފަރާތްތަކާއެކު އެއްޖިންސުން ގުޅުން ހިންގާތަން ފެނިގެންދެއެވެ. މީގެ އިތުރުން ވެސް އޭނާ އާއިއެކު އެއްޖިންސުން ގުޅުންހިންގި މީހުންގެ ތެރޭގައި ދިފާއީ ބާރުތަކުގައި މަސައްކަތް ކުރާ ފަތާތްތަކާއި، ސަރުކާރުގެ އެކި އިދާރާތަކުގެ އިތުރުން ބައެއް ސުކޫލުތަކުގެ މުދައްރިސުންވެސް ހިމެނެއެވެ.

މީގެކުރިން އަލަމްގިރިގެ މައްޗަށް އުފުލީ އެއް ޖިންސުން ޖިންސީ ގުޅުން ހިންގުމުގެ ކުށުގެ ތިން ދަޢުވާއެވެ. އެ ދަޢުވާތަކަށް އޭނާ އިޢުތިރާފުވެފައިވާތީ, ކުށް ސާބިތުވާކަމަށް ކަނޑައަޅައި މިދިޔަ މަހުގެ 31 ގައި ކޯޓުން ޙުކުމް އިއްވީ ހަތް މަހާއި, ހަ ދުވަހަށް އޭނާ ޖަލަށްލުމަށެވެ.

އެ މައްސަލައާއި ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮއްކޮ ނާޒިމް ސައްތާރުގެ މައްޗަށް ވަނީ 3 މަސް ދުވަހުގެ ގޭ ބަންދުގެ ހުކުމެއް ކޮށްފައެވެ. އަދި އެ މައްސަލައިގައި ޝާމިލުވާ ފުލުހެއް ކަމަށްވާ އަބްދުއްރަހްމާން ރަފީއު އެއް އަހަރާއި ދެމަހަށް ޖަލަށް ލާން ހުކުމް ކޮށްފައިވާއިރު, އިތުރު ބައެއް މީހުންގެ މައްޗަށްވެސް ވަނީ ދައުވާކޮށްފައެވެ.