އިނގިރޭސި ވިލާތުގައި އަލީ ވަހީދު ހައްޔަރުކުރީ ޤާނޫނާ ޚިލާފަށްކަމަށް އެގައުމުން ކަނޑައަޅައިފި
އިނގިރޭސި ވިލާތުން ކުރީގެ ޓުއަރިޒަމް މިނިސްޓަރ އަލީ ވަހީދު ހައްޔަރުކުރީ ޤާނޫނާ ޚިލާފަށްކަމަށް ކަނޑައަޅައިފިއެވެ.
މިކަމާއި ގުޅިގެން އަލީ ވަހީދު ކުރި ޓްވީޓެއްގައި ބުނީ، އިނގިރޭސިވިލާތުން، އޭނާ ކިބައިން މަޢާފަށް އެދި، އެޤައުމުގެ ސަރުކާރުން އޭނާ ހައްޔަރުކުރީ ޤާނޫނާ ޚިލާފަށްކަން ކަނޑައަޅައި، 20،000 ސްޓާލިންގ ޕައުންޑުން ބަދަލުދޭން ނިންމި ކަމަށެވެ.
"ވަގުތު ނެގިއަސް ހައްގަށް ނަސްރު ލިބޭނެ. ހަމްދު ކުރަނީ ހެއްދެވިފަރާތަށް. އާމީން"
އަލީ ވަހީދު
އިނގިރޭސިވިލާތުން އަލީ ވަހީދު ހައްޔަރުކުރީ އެގައުމަށް ބޭސްފަރުވާ ކުރުމަށް ވަޑައިގެން ހުންނަވަނިކޮށް، އެ ގައުމުގެ އިމިގްރޭޝަން ގާނޫނާ ހިލާފުވި ކަމުގެ ތުހުމަތުގައި 2021 ވަނަ އަހަރުގެ އޮގަސްޓް މަހުގެ ތެރޭގަ އެވެ. ނަމަވެސް އެ ގައުމުގެ ފުލުހުން ފަހުން ވަނީ އަލީ ވަހީދު ވަގުތީ ބަންދެއްގައި ބެހެއްޓުމަށްފަހު ދޫކޮށްލާފަ އެވެ.
އަލީ ވަހީދުގެ ގާނޫނީ ޓީމުން ވަނީ އަލީ ވަހީދު ހައްޔަރުކުރީ ގާނޫނާ ހިލާފަށް ކަމަށް ކަނޑައެޅުމަށް ކަމާ ގުޅޭ އިދާރާތަކަށް މައްސަލަ ހުށަހަޅާފަ އެވެ.
ބޭސްފަރުވާއަށް މިިދިޔަ އަހަރުގެ ފެބްރުއަރީ މަހުގެ 21 ވަނަ ދުވަހު އަލީ ވަހީދު ރާއްޖެއިން ބޭރަށް ފުރައިވަޑައިގަތީ އޭނާގެ މައްޗަށް ދައުލަތުން 7 ދައުވާއެއް އުފުލާފައިވަނިކޮށެވެ. މި ދައުވާތަކުގެ ތެރޭގައި ހިމެނެނީ ޖިންސީ އަނިޔާ ކުރުމުގެ ކުށުގެ ދަޢުވާ އާއި ރޭޕްކުރަން އުޅުމުގެ ކުށުގެ ދަޢުވާ އާއި ޖިންސީ ގުނަވަން ހާމަކުރުމުގެ ކުށުގެ ދަޢުވާ އާއި ޖިންސީ ގޯނާކުރުމުގެ ކުށުގެ ދަޢުވާ އާއި ޖިންސީ ގޯނާކުރަން އުޅުމުގެ ކުށުގެ ދަޢުވާ އާއި ހުއްދަނޫން ޖިންސީ މުޢާމަލާތެއް ހިންގުމަށް އެދުމުގެ ކުށުގެ 2 ދަޢުވާއެކެވެ.
ނަމަވެސް އަލީ ވަހީދަށް ކުރި ދައުވާތައް މިއަހަރުގެ ޖޫން ހަވަނަ ދުވަހު ދައުލަތުން އަނބުރާ ގެންދިއުމާ ގުޅިގެން އޭނާ ވަނީ މިއަހަރުގެ ޖުލައި މަހުގެ 11 ވަނަ ދުވަހު ރާއްޖެ އައިސްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
