ރަށުން ބޭރުގައި އާސެނަލް އަތުން މޮޅުވެ، ވެސްޓްހަމް 6 ވަނައަށް

އިގިރޭސި ޕްރެމިއާ ލީގުގައި ބުރާސްފަތި ދުވަހުގެ ރޭ ރަށުން ބޭރުގައި 2-0 ގެ ނަތީޖާއަކުން އާސެނަލް އަތުން މޮޅުވެ، ވެސްޓްހަމް އިން ލީގު ތާވަލުގެ 6 ވަނައަށް ކުރިއަށް ޖެހިލައިފިއެވެ.

ލީގުގައި ޑިސެމްބަރު 10 ވަނަ ދުވަހު 5-0 ގެ ނަތީޖާއަކުން ފުލަމް އަތުން ބަލިވި ފަހުން ލީގުގައި ވެސްޓްހަމް އިން އެންމެ ފަހުން ކުޅުނު ދެމެޗުގައި ވުލްސް އަދި މެންޗެސްޓާ ޔުނައިޓެޑް އަތުން އެޓީމު މޮޅުވެފައި ވާއިރު، ބައިކޮޅަށް އެންމެ ލަނޑެއް ވެސް ވަދެފައެއް ނުވެއެވެ. އަދި މިދެޓީމު އެންމެ ފަހުން ވެސްޓްހަމް ދަނޑުގައި ކުޅުނު މެޗުން އެޓީމު މޮޅުވެފައި ވަނީ 3-1 ގެ ނަތީޖާއަކުންނެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ އާސެނަލް އިން މެޗު ޑޮމިނޭޓުކުރި ނަމަވެސް މެޗުގެ ވަރަށް ކުރީކޮޅު ވެސްޓްހަމް އިން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ޗެކް ރިޕަބްލިކްގެ މިޑްފީލްޑަރު ޓޮމަސް ސޯސެކް އެވެ. މިއީ އެޓީމުގެ އިގިރޭސި ފޯވާޑް ޖެރާޑް ބޯވެން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިހާފުގައި އާސެނަލްގެ އިގިރޭސި ފޯވާޑް ބަކަޔޯ ސަކާގެ އިތުރުން ބުރެޒިލްގެ ފޯވާޑް ގެބްރިއަލް ޖީސަސް އަދި ޑިފެންޑަރު އޮލެގްޒެންޑަރ ޒެންޗެންކޯ އަށް ލިބުނު ހުސް ފުރުސަތުތަކުގެ ބޭނުން ނުކުރެވި، ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ވެސްޓްހަމް ކުރީގައި އޮވެގެންނެވެ.

މެޗުގެ ދެވަަނަ ހާފު ވަރުގަދަކޮށް ފެށީ ވެސްޓްހަމް އިންނެވެ. ނަތީޖާއެއްގެ ގޮތުން ދެވަނަ ހާފު ފެށިގެން 10 ވަނަ މިނެޓުގައި ވެސްޓްހަމް އިން ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ގްރީސްގެ ޑިފެންޑަރު ކޮންސްޓަންޓިނޯސް މަވްރޮޕަނޯސް އެވެ.

މިއީ އެޓީމަށް ލިބުނު ހިލޭ ޖެހުމެއްގައި އިގިރޭސި މިޑްފީލްޑަރު ޖޭމްސް ވޯޑް - ޕްރޯސް ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ވެސްޓްހަމްގެ ލަނޑަށްފަހު އާސެނަލް އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މިހާފުގައި އެޓީމުން ވަނީ ލަނޑުޖަހާނެ ރަގަޅު ގިނަ ފުރުސަތުތަކެއް ތަނަވަސްކޮށްފައެވެ. ނަމަވެސް މިހާފުގައި އެޓީމުގެ މިޑްފިލްޑަރު ރައިސް، ސަކާ، ގެބްރިއަލް ޖީސަސް، ޓްރޮސާޑް ގެ އިތުރުން ކެޕްޓަން އޮޑެގާޑް އަށް ލިބުނު ހުސް ފުރުސަތުތަކުގެ ހުރަހަކަށްވީ މިމެޗުގައި މޮޅު ކުޅުމެއް ދެއްކި ވެސްޓްހަމްގެ ގޯލްކީޕަރު އަލްފޮންސް އަރިއޯލާ އެވެ.

މީގެ އިތުރުން މެޗުގެ އިތުރު ވަގުތުގެ ތެރޭގައި ލީގު ފުޅާކުރުމަށް ވެސްޓްހަމް އަށް ވަނީ ޕެނަލްޓީއެއް ވެސް ލިބިފައެވެ. ނަމަވެސް ދެވަނަ ހާފުގައިި ބަދަލު ކުޅުންތެރިއެއްގެ ގޮތުގައި ކުޅެންނުކުތް އަލްޖީރިއާގެ މިޑްފީލްޑަރު ބޭންރަހްމާ ކުރިއަށް ފޮނުވާލި ޕެނަލްޓީ އާސެނަލްގެ ކީއްޕަރު ޑޭވިޑް ރަޔާ ވަނީ ހުޝިޔާރުކަމާއެކު ދިފާއުކޮށްފައެވެ. މިއާއެކު މެޗުގެ ކުޅުން ނިމިގެންދިޔައީ 2-0 ގެ ނަތީޖާއަކުން ވެސްޓްހަމް ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ލީގުގައި ކުޅުނު 19 މެޗުން ވެސްޓްހަމް އަށް 33 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ 6 ވަނައިގައެވެ. އަދި މިމެޗުން ބަލިވި އާސެނަލް އަށް ލީގުގައި ކުޅުނު 19 މެޗުން 40 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ ދެވަނައިގައެވެ. އަދި މިވަގުތު ލީގު ތާވަލުގެ އެއްވަނާގައި އޮތީ 19 މެޗުން 42 ޕޮއިންޓް ހޯދާފައިވާ ލިވިޕޫލެވެ.