ރިލްވާން މަރުގެ މައްސަލާގައި އާއްމުކުރެވޭނެ މައުލޫމާތުތައް ދެނަގަތުމުގެ މަސައްކަތް ފަށައިފިން: ބަންޑާރަ ނައިބު

ގެއްލުވާލާފައިވާ ނޫސްވެރިޔާ އަޙުމަދު ރިލުވާން ޢަބްދުﷲ ގެ މައްސަލައާ ގުޅޭ ގޮތުން މަރު ކޮމިޝަނުން އެކުލަވައިލި ރިޕޯޓު އާއިލާއާ ހިއްސާކުރުމާ މެދު ގޮތެއް ކަނޑައެޅުއްވުމުގެ ބާރު އޮތީ ރައީސް ޑރ. މުޙައްމަދު މުޢިއްޒުގެ އަތްޕުޅުގައި ކަމަށް ބަންޑާރަ ނައިބު އަޙުމަދު އުޝާމް މިރޭ ވިދާޅުވެއްޖެއެވެ.

ދައުލަތުގެ މީޑިއާއިން ބޭއްވި އަހާ ފޯރަމުގައި ރިލުވާންގެ ދައްތަ ފާޠިމަތު ޝެހެނާޒް ފޯނުން ގުޅައި، ރައީސް ނޫސްވެރިންގެ ބައްދަލުވުމެއްގައި ރިޕޯޓު އޭޖީއާ ހަވާލުކޮށްފައިވާ ކަމަށް ވިދާޅުވި ކަން ފާހަގަކުރެއްވިއެވެ. އެހެންކަމުން ހަތަރު މަސް ކުރިން ބައްދަލުވުމަކަށް އެދުނު ނަމަވެސް އެއްވެސް ޖަވާބެއް ލިބިފައި ނުވާ ކަމަށް ޝެހެނާޒް ބުންޏެވެ.

ޖަވާބު ދެއްވަމުން އުޝާމް ވިދާޅުވީ ކުރީ ސަރުކާރު ބަދަލުވިއިރު މަރު ކޮމިޝަނުގެ މަސައްކަތް ނުނިމި އޮތް ކަމަށެވެ.

ރައީސް ވެރިކަމާ ހަވާލުވެވަޑައިގެން އެ މަސައްކަތް ނިންމުމަށް އިރުޝާދު ދެއްވި ކަމަށާއި 2024 ވަނަ އަހަރުގެ މެދާ ހަމައަށް ކޮމިޝަނުގެ މުއްދަތު އިތުރުކުރެއްވި ކަމަށް ވެސް ވިދާޅުވިއެވެ.

ކޮމިޝަން އުވުނުއިރު ބައެއް ރިޕޯޓުތައް ނިންމާފައި ހުރި ކަމަށާއި ރައީސް އޮފީހުން އެ ރިޕޯޓުތައް އޭޖީއާ ހަވާލުކޮށް އޭޖީ އޮފީހުގެ ޚާއްޞަ ޓީމަކުން މިހާރު ދިރާސާކުރަމުން ގެންދާ ކަމަށް އުޝާމް ވިދާޅުވިއެވެ.

ރިލުވާންގެ މައްސަލައިގައި ތަފާތު ވައްތަރުގެ "ދެތިން ރިޕޯޓެއް" ހިމެނޭ ކަމަށާއި ފުލުހުންގެ ސިއްރު މަޢުލޫމާތު ހިމެނޭ ރިޕޯޓުތައް ހުރުމުން ޢާންމުކުރެވޭނެ ރިޕޯޓުތައް ދެނެގަތުމުގެ މަސައްކަތް ކުރިއަށްދާ ކަމަށް ވެސް ފާހަގަކުރެއްވިއެވެ.

"ރައީސް ކަމަށް އަޅުގަނޑު ގަބޫލުކުރަނީ އެ ރިޕޯޓު އާއިލާއާ ހަވާލުކުރުމާ ގުޅޭ ގޮތުން ގޮތެއް. އަޅުގަނޑުގެ ލަފާ ރައީސަށް އަރުވާނަން" އޭޖީ ވިދާޅުވިއެވެ.

ބައްދަލުވުމަކަށް އެދި ޖަވާބެއް ނުލިބި ލަސްވި މައްސަލައިގައި ޝެހެނާޒްގެ ކިބައިން އުޝާމް މަޢާފަށް އެދިވަޑައިގެން މި ހަފުތާގައި ރިލުވާންގެ އާއިލާއާ ބައްދަލުކުރައްވައި ތަފްޞީލުތައް ހިއްސާކުރައްވާނެ ކަމަށް ވަޢުދުވެވަޑައިގެންނެވިއެވެ.

އޭޖީ ވިދާޅުވި ގޮތުގައި ކުރިއަށް އޮތް މަހެއްހާ ދުވަހުގެ ތެރޭގައި ރިޕޯޓުގެ ދިރާސާ ނިންމައި ރައީސަށް ލަފާ އަރުއްވާނެއެވެ.

ރިލުވާން ގެއްލުވާލި މައްސަލައިގައި 2022 ވަނަ އަހަރުގެ ޖޫން 26 ވަނަ ދުވަހު ތިން މީހަކު ހައްޔަރުކުރިއެވެ.

އެއީ އިސްމާޢީލް ޢަބްދުއްރަޙީމް (އިސޫ) އާއި އަޙުމަދު އިސްމާޢީލް (އަހަނދު) އާއި އަޙުމަދު މުޢާޒް (ގަޓު މުއާ) އެވެ.

އެ ތިން މީހުން ހައްޔަރުކުރީ ރިލުވާން ވަގަށް ނަގައި މަރައިލި ކަމުގެ ތުހުމަތުގެ އިތުރުން ބްލޮގަރު ޔާމީން ރަޝީދު މަރައިލުމާ ގުޅޭ ޓެރަރިޒަމްގެ ކުށުގެ ތުހުމަތުގައެވެ.

ނަމަވެސް ކުށް ސާބިތުނުވާ ކަމަށް ކަނޑައަޅައި ކޯޓުން ތިން މީހުން ވެސް ދޫކޮށްލީއެވެ.

އަހަނދު 2023 ވަނަ އަހަރުގެ ޖޫން 22 ގައި އިސޫ ޖުލައި 12 ގައި އަދި ގަޓު މުއާ ސެޕްޓެމްބަރު 19 ގައި ދޫކޮށްލީއެވެ.

ރިޔާސީ ކޮމިޝަނުން ޢާންމުކުރި ރިޕޯޓުގައިވާ ގޮތުން 2014 ވަނަ އަހަރުގެ އޮގަސްޓު އަށެއްގެ ރޭ ރިލުވާން ދިރިއުޅުނު އެޕާޓުމަންޓު ކައިރިން ރަހީނުކޮށް ކާރަކަށް ލައިގެން ޑިންގީއެއް މެދުވެރިކޮށް ކަނޑުމަތީ އުޅަނދަކަށް އެރުވުމަށްފަހު އެ އުޅަނދުގައި ކަރު ބުރިކޮށް ހަށިގަނޑު ކަނޑުފެއްތީއެވެ.