ކުރީގެ މާލީ ވަޒީރު ޑރ.ޝަފީޤް، އެޗްޑީއެފްސީގެ ޑިރެކްޓަރުންގެ ބޯޑަށް އައްޔަނުކޮށްފި

ރައީސް ޑރ.މުޙައްމަދު މުޢިއްޒުގެ ސަރުކާރުގެ ފުރަތަމަ މާލީ ވަޒީރު، ޑރ.މުޙައްމަދު ޝަފީޤް، ހައުސިން ޑިވެލޮޕްމެންޓް ފައިނޭންސް ކޯޕަރޭޝަން (އެޗްޑީއެފްސީ) ގެ ޑިރެކްޓަރުންގެ ބޯޑަށް އައްޔަނުކޮށްފިއެވެ.

ޕްރައިވެޓައިޒޭޝަން އެންޑް ކޯޕަރޭޝަން ބޯޑުގެ ވެބްސައިޓުން ދައްކާގޮތުގައި ޑރ.ޝަފީޤް މި މަގާމަށް އައްޔަނުކޮށްފައިވަނީ މިމަހުގެ 2 ވަނަ ދުވަހުއެވެ.

ބިޒްނަސް އެޑްމިނިސްޓްރޭޝަންގެ ދާއިރާ އިން ކެމްބޯޑިޔާގެ އައިއައިސީ ޔުނިވާސިޓީން ޕީއެޗްޑީ ހާސިލު ކުރައްވާފައިވާ ޑރ.ޝަފީޤު މީގެ ކުރިން ވެސް އެޗްޑީއެފްސީގައި މަސައްކަތް ކުރައްވާފައިވާއިރު، އެބޭފުޅާ ވަނީ އެ ކޯޕަރޭޝަންގެ ޗީފް ފައިނޭންޝިއަލް އޮފިސަރު (ސީއެފްއޯ)ގެ މަގާމު ވެސް 2021 އިން 2023 އަށް އަދާކުރައްވައިފަ އެވެ.

ޑރ.ޝަފީޤް މާލީ ވަޒީރު ކަމުގެ މަގާމުން އިސްތިއުފާ ދެއްވާފައިވަނީ، މިއަހަރުގެ ސެޕްޓެމްބަރު މަހުގެ 30 ވަނަ ދުވަހު ރައީސް ޑރ.މުޢިއްޒު ކެބިނެޓަށް ގެންނެވި ބަދަލުތަކާއިއެކުއެވެ.

ކެބިނެޓަށް އަލަށް ގެނައި ބަދަލުތަކާއިއެކު މި ސަރުކާރުގެ މާލީ ވަޒީރުގެ މަގާމު އަދާކުރައްވަމުން ގެންދަވަނީ ކުރިން ޚާރިޖީ ވަޒީރު ކަމުގައި ހުންނެވި މޫސާ ޒަމީރެވެ.