ކުރަނީ އަސާސެއް ނެތް ތުހުމަތުތަކެއް، އުޅެނީ ބިރު ދައްކަން: ފައްޔާޒު
އެންޓި ކޮރަޕްޝަން ކޮމިޝަން (އޭސީސީ)އަށް ގެނައީ އަސާސެއް ނެތް ކަމެއްގައި ކަމަށާއި، ސަރުކާރުން އުޅެނީ ބިރުދައްކަން ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމައީލް ވިދާޅުވެއްޖެއެވެ.
ފައްޔާޒު އޭސީސީއަށް ހާޟިރުކޮށްފައިވަނީ ތިނަދޫ އުތުރު ދާއިރާގެ މެންބަރު ސައުދުﷲ ޙިލްމީގެ ސްވިފްޓް އިންޖިނިއަރިން ކުންފުންޏަށް އެކަށީގެންނުވާ ބަދަލެއް ދިނުމުގައި މަގާމުގެ ހައިސިއްޔަތު ނަހަމަގޮތުގައި ބޭނުންކުރުމުގެ ތުހުމަތާއި ގުޅިގެން ހިންގާ ތަހުގީގަށެވެ. އޭސީސީން ކުރާ ތުހުމަތަކީ ކުންފުންޏަކަށް އެކަށީގެންނުވާ ބަދަލެއް ދީފައިވަނީ ފައްޔާޒުގެ ނުފޫޒުގައި ކަމަށެވެ.
އެ ތަހުގީގަށް އޭސީސީއަށް ވަޑައިގެންނެވުމަށްފަހު ނޫސްވެރިންނާއި ވާހަކަދައްކަވަމުން ފައްޔާޒް ވިދާޅުވީ އޭސީސީއަށް ހާޟިރުކުރީ އެއްވެސް އަސާސެއް ޖެތް، ތާކުން ތާކުން ނުޖެހޭ އެއްޗެހިތަކެއް ނަގައިގެން ކަމަށެވެ. އަދި އެ ތަހުގީގަށް ބޭނުންވާ ލިޔެކިޔުންތައް ވެސް ހަމަނުވާ ކަމަށާއި، އޭސީސީގެ ބޭފުޅުން ތިއްބެވި ގޮތުން ވެސް އެއީ ވަކި މީހަކު އަންގައިގެން މަޖޫބުރުވެގެން ކުރާ ތަހުގީގެއް ކަމަށް ވެސް ފައްޔާޒު ވަނީ ތުހުމަތުކުރައްވާފައެވެ.
އެނގޭ ވަކި މީހަކު އަންގައިގެން އެބޭފުޅުންނަށް މަޖުބޫރުވެގެން ކުރާ ތަހުގީގެއްކަން ވެސް. އެބޭފުޅުންގެ ވާހަކަހުރި ގޮތުންނާއި އެބޭފުޅުންގެ ޢަމަލުތައް ހުރި ގޮތުން ވެސް އެނގޭ ލަދުންކަން ތިބީވެސް.
އެމްޑީޕީގެ ޗެއާޕާސަން ފައްޔާޒު އިސްމައީލް
ފައްޔާޒު ވިދާޅުވީ އެކަން އޭސީސީން ކުރަނީ ބިރުދައްކަން ކަމަށް ތުހުމަތުކުރައްވާފައެވެ. އެގޮތުން ވިދާޅުވީ ވެރިކަން ކުރާ ޕާޓީގެ ބޭފުޅުން އެބޭފުޅުން ދެކެ ބިރު ގަންނަ ކަމަށާއި، އެމްޑީޕީގެ ވެރިކަމުގައި ވެސް އެބޭފުޅުން އިދިކޮޅުގައި ތިއްބެވިއިރު ތިއްބެވީ މަޑުން "ފިލާ" ކަމަށެވެ.
އަދި އޭރުގެ އިދިކޮޅު ހަރަކާތްތައް ވެސް ހިންގަން ޖެހުނީ އެމްޑީޕީން ކަމަށް ފައްޔާޒު ވިދާޅުވިއެވެ.
އަޅުގަނޑުމެން ކުޑަ ގޮޅީގައި ޖަލަށް ލާފައި އޮތަސް ތިބޭފުޅުން ތިއްބަވާނޭ މި ވެރިކަން ބަލިކުރަން
އެމްޑީޕީގެ ޗެއާޕާސަން ފައްޔާޒު އިސްމައީލް
މީގެ ކުރިން ވެސް ފައްޔާޒަށް ކުރާ އެ ތުހުމަތުތައް އޭނާ ވަނީ ދޮގުކުރައްވާފައެވެ. އެގޮތުން ރަސްމީ ހައިސިއްޔަތު ނަހަމަ ގޮތުގައި ބޭނުންކޮށް ދައުލަތަށް ގެއްލުން ލިބޭ ގޮތަށް އަމަލުކޮށްފައި ނޯންނާނެ ކަމަށް އޭރު ވެސް ފައްޔާޒު ވިދާޅުވެފައިވެއެވެ.
ފައްޔާޒުގެ އިތުރުން، އެމްޑީޕީގެ ވެރިކަމުގެ ފިނޭނެސް މިނިސްޓަރު އިބްރާހިމް އަމީރު އާއި އެޑިޔުކޭޝަން މިނިސްޓަރު ޑރ. އައިޝަތު ޢަލީ ވެސް އޭސީސީއަށް ހާޟިރުކުރަން ވަނީ ނިންމާފައެވެ. އެބޭފުޅުންގެ ތެރެއިން މިހާތަނަށް އޭސީސީއަށް ހާޟިރުކޮށްފައިނުވަނީ ޑރ. އައިޝަތު އެކަންޏެވެ.
އެ ތިން ބޭފުޅުން އޭސީސީއަށް އައުމަށް ޗިޓު ފޮނުވުމާއި ގުޅިގެން އެމްޑީޕީން ވަނީ ދައުލަތުގެ މިނިވަން މުއައްސަސާތައް މެދުވެރިކޮށް ސިޔާސީ ބޭނުމަށް ހިންގަމުންދާ "މުޑުދާރު ޢަމަލުތައް" ހުއްޓައިލުމަށް ސަރުކާރަށް ގޮވައިލާފަ އެވެ. އަދި އޭރުގެ ސަރުކާރުން ނިންމި ނިންމުމާއި ގުޅިގެން ކެބިނެޓްގެ ތިން ވަޒީރަކަށް ތުހުމަތުކޮށް އޭސީސީއަށް ހާޒިރުކުރަނީ ބިރު ދެއްކުމަށް ކަމަށް އެޕާޓީން ވެސް ވަނީ ސިފަކޮށްފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
