މާރަންދޫ ކައުންސިލްގެ ނައިބު ރައީސް ކުއްލި ގޮތަކަށް އަވަހާރަވެއްޖެ
ހއ. މާރަންދޫ ކައުންސިލްގެ ނައިބު ރައީސް އަހުމަދު ރަމީޒް (40) އަވަހާރަވެއްޖެއެވެ. އޭނާ އަވަހާރަވީ މިއަދު ހަވީރު މާރަންދޫގައި ކުޅުނު ފުޓުބޯޅަ މެޗަކަށް ފަހު ހާލު ސީރިއަސްވުމުންނެވެ.
މާރަންދޫ ކައުންސިލް މެމްބަރު ހުސެން އާދަމް ބައެއް މީޑިއާތަކަށް މައުލޫމާތު ދެއްވި ގޮތުގައި، މިއަދު ހަވީރު މާރަންދޫއާއި ހދ. ނެއްލައިދޫ ޒުވާނުންގެ މެދުގައި އެކުވެރިކަމުގެ ފުޓުބޯޅަ މެޗެއް ކުޅުނެވެ. މި މެޗުގެ ފަހު ހާފުގައި ރަމީޒް ކުޅުއްވި ނަމަވެސް، މާބޮޑަށް ވަރުބަލިވުމާ ގުޅިގެން ދަނޑުން ފައިބާ ބެންޗްގައި މަޑުކުރެއްވިއެވެ.
"ބެންޗުގައި އިނދެފައި ވެސް ހޮޑުލި. ދެން މާބޮޑަށް ހާލު ދަށްވާތީ ރަށުގެ ސިއްހީ މަރުކަޒަށް ގެންދިޔައީ. ވަކި ހިސާބަކުން ހޭ ވެސް ނެތުނު،" ހުސެން އާދަމް ވިދާޅުވިއެވެ.
ހާލު އިތުރަށް ގޯސްވުމާ ގުޅިގެން ރަމީޒަށް ފަރުވާ ދިނުމަށް ދިއްދޫ ހޮސްޕިޓަލަށް ގެންދެވުނު ނަމަވެސް، މިރޭ 8:00 ގެ ފަހުން އޭނާ އަވަހާރަވެފައިވާ ކަމަށް ހުސެން ވިދާޅުވިއެވެ.
އަވަހާރަވި އިރު ރަމީޒްގެ އަނބިކަނބަލަކާއި ތިން ދަރިން ދުނިޔޭގައި ތިއްބެވިއެވެ. އޭނާގެ ހަށިކޮޅު ވަޅުލުމުގެ އިންތިޒާމުތައް މިހާރު ކުރިއަށްދާ ކަމަށް މާރަންދޫ ކައުންސިލުން މައުލޫމާތު ދެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
