އެމްޑީޕީގެ ތެރޭގައި "ފިކުރެއްގެ ދިރުން" ގޮފި އުފެއްދުން ނުހުއްޓުވޭނެ: ރައީސް ނަޝީދު

އެމްޑީޕީގެ ތެރޭގައި "ފިކުރެއްގެ ދިރުން" ގޮފި އުފެއްދުން ނުހުއްޓުވޭނެ ކަމަށާ އެކަމަށް ޕާޓީގެ ގަވައިދުތައްވެސް ތަންދޭ ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ހޮނިހިރު ދުވަހު ބޭއްވި އެމްޑީޕީގެ ރިޔާސީ ޕްރައިމަރީގައި ރައީސް ނަޝީދަށް ކެންޕެއިން ކޮށްދިނުމުގައި ހަރަކާތްތެރިވި ޓީމާއި ބައްދަލު ކުރައްވައި ނަޝީދު ވިދާޅުވީ ޕްރައިމަރީގެ އިންތިޚަބަށް ވޯޓުލުމުގެ ހައްގު ލިބިގެންވާ މީހުންގެ ލިސްޓް، އެ ޕާޓީން ތައްޔާރު ކޮށްފައިވަނީ 39,000 އެމްޑީޕީގެ މެންބަރުން ވަކިކުރުމަށް ފަހުގައި ކަމަށެވެ. އަދި އިންތިޚާބަށް ކުރިމަތިލެއްވީވެސް އެކަން އެނގި ހުރެ ކަމަށެވެ.

ރައީސް ނަޝީދު ވިދާޅުވީ، އިންތިޚާބުގެ ނަތީޖާ އަށް ބަލާއިރު، އެ 39,000 މެންބަރުންނަށް ވޯޓު ލެވޭ ގޮތައް އޮތް ނަމަ، އެމަނިކުފާނަށް އިންތިޚާބު ކާމިޔާބު ކުރެވުމުގެ ފުރުޞަތު ބޮޑުވީސް ކަމަށެވެ.

މިއާއެކު ރައީސް ނަޝީދު ވަނީ، އެމްޑީޕީގެ ޓިކެޓްގައި ރައީސް އިބްރާހިމް މުހައްމަދު ޞާލިހަށް ރިޔާސީ އިންތިހާބު ވާދަ ކުރެއްވި ނަމަވެސް އެމަނިކުފާނަށް އެ އިންތިޚާބު ކާމިޔާބު ނުވާނެ ކަމަށެވެ.

"އަޅުގަނޑަށް ފެންނަނީ ޕާޓީން މިކަމާއި ފުންކޮަށް ވިސްނާލުމަަށް. އަޅުގަނޑު ހުށަހަޅަނީ ޕާޓީގެ "ފިކުރެއްގެ ދިރުން" ގޮތްޕަށް 50,000 މެންބަރުން ވަންނަން. އަޅުގަނޑަށް ފެންނަނީ ކޮންމެ ރަށެއްގައިވެސް މިސާލަކަށް ފިކުރެއްގެ ދިރުން 1,2,3,4، ހަތަރު ގޮފި ފަސް ގޮފި ވިޔަސް ކޮންމެ ރަށެއްގައިވެސް، މި ފިކުރުގެ ބައިވަރު ގޮފި އަޅުގަނޑުމެން އުފައްދައި، 50,000 މީހުން އަޅުގަނޑުމެން ގެ ފިކުރުގައި، އެ ގޮތްޕެއްގައި ހިމެނޭ ގޮތަކަށް އަޅުގަނޑުމެން އިންތިޒާމް ވާން." ރަށްރަށުގައި ފިކުރެއްގެ ދިރުން ގޮފި އުފެއްދުމަށް ނިންމަވާފައިވާ ކަން ހާމަކުރައްވަމުން ނަޝީދު ވިދާޅުވި އެވެ.

އަދި އެމްޑީޕީއިން އެމަނިކުފާނު ވަކިނުވާނެ ކަމަށާއި އެއީ ރޫޅޭނެ ޕާޓީއެއް ވެސް ނޫން ކަމަށާ، އެމަނިކުފާނު ދަންނަ ޕާޓީ އަކީވެސް އެމްޑީޕީގެ އެކަނިކަމަށް ނަޝީދު ވިދާޅުވި އެވެ.

"އަޅުގަނޑު ދަންނަ ސިޔާސީ މަސައްކަތް ހިނގަނީ އިންތިޒާމް ވެގެން، އަޅުގަނޑު ދަންނަ ސިޔާސީ ޕާޓީ، އެމްޑީޕީ އެކަނި އަޅުގަނޑު ދަންނަނީ އަދި އަޅުގަނޑު ދެކޭ ގޮތުގައި އެއީ ރޫޅޭނެ ޕާޓީއެއް ވެސް ނޫން، އަދި ބަލިވާނެ ޕާޓީއެއް ވެސް ނޫން، އެއީ ގަދަ ޕާޓީއެއް،" ނަޝީދު ވިދާޅުވި އެވެ.

މިއާއެކު ނަޝީދު ވަނީ، ވަކި ގޮތްޕެއް ހެދުމަށް ޕާޓީގެ ގަވާއިދު ޖާގަ ނުދޭ ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވި ވާހަކައަށް ރައްދު ދެއްވާފައެވެ. އެގޮތުން، ނަޝީދު ވިދާޅުވީ އެމަނިކުފާނު ދެކޭގޮތުގައި، އެމްޑީޕީ ތެރޭގައި "ފިކުރެއްގެ ދިރުން" އަށް އިންތިޒާމް ވެވޭނެ ކަމަށާ، ޕާޓީގެ ގަވައިދު ތަކާއި އުސޫލުތައްވެސް އެކަމަށް ޖާގަ ދޭނެ ކަމަށެވެ.

"އެމްޑީޕީ ހަދާފައި އޮތީ ވެސް މީހަކު ޖާގަ ދީގެން ނޫން، އެއީ ހަމަ އަޅުގަނޑުމެން ހަމަ ހެދި ޕާޓީއެއް އެއީ، އަޅުގަނޑުމެންގެ ފިކުރެއްގެ ދިރުން އެމްޑީޕީގެ ތެރޭގައި ހުއްޓުވޭނެ އެއްވެސް ގޮތެއް ނޯންނާނެ، އެއީ އަޅުގަނޑުމެން ހިންގާ އަޅުގަނޑުމެންގެ އަމިއްލަ މަސައްކަތެއް އެއީ،" ނަޝީދު ވިދާޅުވި އެވެ.

"ފިކުރެއްގެ ދިރުން" ގޮފިތަކުގައި ބައިވެރިވުމުގެ ފުރުސަތު ހުރިހާ މެންބަރުންނަށް އޮންނާނެ ކަމަށް ވެސް ނަޝީދު ވިދާޅުވި އެވެ.