53 މިލިއަން ދައްކަން ކުރި އަމުރު ބާތިލްކޮށްދިނުމަށް ރައީސް ޔާމިންގެ ފަރާތްޕުޅުން އެދިއްޖެ!
ވ. އާރަށުގެ މުއާމަލާތާއި ގުޅިގެން ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް އިއްވި ހުކުމުގައި ހިމެނޭ 53 މިލިއަން ރުފިޔާ ހަ މަސް ދުވަސްތެރޭ ދައުލަތަށް ދައްކަން ކްރިމިނަލް ކޯޓުން ކުރި އަމުރު ބާތިލުކޮށްދިނުމަށް ރައީސް ޔާމީންގެ ފަރާތްޕުޅުން ހައިކޯޓުގައި އެދިވަޑައިގެންފި އެވެ.
އެ ފައިސާ ދައުލަތަށް ދެއްކުމަށް ކްރިމިނަލް ކޯޓުން ރައީސް ޔާމިންގެ މައްޗަށް އަމުރުކޮށްފައިވަނީ ފެބުރުއަރީ މަހުގެ 26 ގަ އެވެ.
ރައީސް ޔާމިންގެ ފަރާތްޕުޅުން އެ މައްސަލަ ހައިކޯޓުގައި އިސްތިއުނާފުކޮށްފައި ވާއިރު، އިއްޔެ ވަނީ އެ މައްސަލައިގެ އަޑުއެހުމެއް އެ ކޯޓުގައި ބާއްވާފަ އެވެ.
ރައީސް ޔާމީންގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ އަބްދުالله ޝިޔާޒް ހައިކޯޓުގައި ވިދާޅުވީ ދައުލަތަށް މުދަލާއި ފައިސާ ނަގަން ކުރާ އަމުރު މައުލޫއީ މައްސަލައިގައި ހުކުމުގައި ހިމަނަން ޖެހޭނެ ކަމަށެވެ.
އާރަށު މައްސަލައިގެ ހުކުމުގައި ދައުލަތަށް އެއްވެސް ފައިސާއެއް ނަގަން އަމުރެއް ކޮށްފައިނުވާއިރު، މައްސަލަ ނިމުނުފަހުން ހަމަ އެގަޒިއްޔާގެ ދަށުން އަމުރެއް ނެރުމަކީ އެންމެހާ ގާނޫނުތަކާއި އިޖުރާއަތްތަކާއި ހިލާފު އަމުރެއް ކަމަށާއި އެހެންކަމުން، އެ އަމުރަކީ ބާތިލް އަމުރެއްކަމުގައި ކަނޑައަޅައިދީ ދައުލަތަށް މުދަލާ ފައިސާ ނަގާނަމަ އެކަން ކުށް ސާބިތުވުމުން ކުރާ ހުކުމުގައި ހިމެނުމަށް ކަނޑައަޅައިދިނުމަށް ރައީސް ޔާމީންގެ ފަރާތްޕުޅުން ވަނީ އެދިވަޑައިގެންފަ އެވެ.
ރައިސް ޔާމިންގެ ފަރާތްޕުޅުން މިފަދައިން އެދިވަޑައިގެން ނަމަވެސް ދައުލަތުން ވަނީ 53 މިލިއަން ދެއްކުމަށް ރައީސް ޔާމީންގެ މައްޗަށް ކްރިމިނަލް ކޯޓުން ކުރި އަމުރު ބާތިލުކުރަން ޖެހޭ ސަބަބެއް ނެތްކަމަށް ކަނޑައަޅައި ދިނުމަށް އެދިފައެވެ.
އެ މައްސަލައިގައި ވީހާވެސް އަވަހަށް ގޮތެއް ނިންމުމަށް ހައިކޯޓުގެ އިސް ގާޒީ ބޭނުންފުޅުވާކަމަށް ވިދާޅުވި އެވެ. އަދި ކޯޓުގެ ގަޑިތަކަށް ބަލާ ވީ އަވަސް ފުރުސަތެއްގައި އަޑުއެހުމެއް ބާއްވާނެ ކަމަށާއި، އެ އަޑުއެހުމުގައި ދައުލަތުގެ ޖަވާބާއި ގުޅިގެން ދިފާއުން އެއްޗެއް ބުނަން އޮތްނަމަ އެ ފުރުސަތު ދިނުމަށްފަހު އެ މައްސަލައިގައި ގޮތެއް ކަނޑައަޅާ ހުކުމް އިއްވާނެކަމަށް ގާޒީ ވަނީ ވިދާޅުވެފަ އެެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
