އިދެކޮޅު މީހުން ވުޒާރާތަކުގައި ތިބީމަކީ ސިޔާސަތު ތަންފީޒުކުރަން އޮތް ހުރަހެއް: ރޮޒައިނާ
ސަރުކާރުގެ ސިޔާސަތުތައް ޤަބޫލު ނުކުރާ، ނުވަތަ ސަރުކާރާއި ދެކޮޅު މީހުން ވުޒާރާތަކުގައި ތިބުމަކީ ސަރުކާރުގެ ސިޔާސަތުތައް ތަންފީޒުކުރުމަށް އޮތް ހުރަހެއް ކަމަށް ރައްޔިތުންގެ މަޖިލީހުގެ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެ އެވެ.
ރޮޒެއިނާ މިފަދައިން ވިދާޅުވެފައިވަނީ ރައީސް މުހައްމަދު ނަޝީދުގެ ވެރިކަމުގައި ޑްރަގާއި ދެކޮޅަށް ހެދިފައިވާ ޤާނޫނުތަކާއި ޤަވައިދުތައް ތަންފީޒު ނުކުރައްވާނެކަމަށް ހޯމް މިނިސްޓަރު އިމްރާނު އަބްދުالله ވިދާޅުވެފައިވާކަމަށް މަޖިލީހުގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑާ) ވިދާޅުވެ ދެއްކެވި ވާހަކަތަކަށް މިއަދުގެ ޖަލްސާގައި ރައްދުދެއްވަމުން ނެވެ.
ރޮޒައިނާ ވިދާޅުވީ ޑްރަގުގެ ވަބާއަކީ ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހުގެ ވެރިކަމުގައި ރާއްޖެއަށް ކުރިމަތިވި ކަމެއް ނޫން ކަމަށެވެ. އެ ވަބާއިން އަރައިގަތުމަށް ޒަމާންތަކެއް ވަންދެން އެކި ސަރުކާރުތަކުން މަސައްކަތްކޮށްފައިވާކަމަށް ރޮޒައިނާ ވިދާޅުވި އެވެ.
ވަކި ސަރުކާރަކުން އެކުލަވާލި ގަވައިދަކަށް ވީތީ އެއަށް އަމަލު ނުކުރުމަކީ ތަންފީޒީ އިދާރާތަކަށް ލިބިގެންދާ އިޚްތިޔާރެއް ނޫން ކަމަށާއި، އަދި ހެދިފައިވާ ގަވައިދަކީ އިޚްތިޔާރީ ކަމަށް ހަދައިގެން އެފަދައިން ވުޒާރާތަކުން މަސައްކަތް ކުރަމުން ނުދާކަމަށް ރޮޒައިނާ ވިދާޅުވިއެވެ.
ރޮޒައިނާ ވިދާޅުވީ ގަވައިދުތަކެއް ހެދިފައި ހުރި ނަމަވެސް، އެ ތަންފީޒުކުރުމުގައި އެކި ވަރުގެ ގޮންޖެހުންތަކާއި އަބަދުވެސް ކުރިމަތިވަމުން އަންނަ ކަމަށެވެ.
އެގޮތުން ސަރުކާރާއި ދެކޮޅު މީހުން ވުޒާރާތަކުގއި ތިބުމަކީ ސަރުކާރުގެ ސިޔާސަތުތައް ތަންފީޒުކުރުމަށް ވަރަށް ބޮޑަށް ހުރަސްއެޅިގެންދާ ކަމެއްކަން އޭނާ ފާހަގަކުރެއްވި އެވެ. އަދި ވިދާޅުވީ މިއަހަރަކީ ރިޔާސީ އިންތިޚާބުގެ އަހަރަށް ވުމުން، ގަސްދުގައި ސަރުކާރު ބަދުނާމު ކުރުމަށް ސަރުކާރުގެ ސިޔާސަތުތައް ތަންފީޒުކުރުމަށް ސަރުކާރާއި ދެކޮޅު ފަރާތްތަކުން ވުޒާރާތަކުގައި ތިބެގެން މަސައްކަތްވެސް ކުރައްވަމުން ގެންދަވާ ކަމަށެވެ.
"ތަންފީޒުކުރުމުގައި ދިމާވާ ވަރަށް ގިނަ ދަތިތަކެއް ހުރޭ. ތަންފީޒުކުރުމުގައި އެންމެ ބޮޑު އެއް ދައްޗެއް ދިމާވަނީ ސަރުކާރުގެ ޕޮލިސީތަކާއި ދެކޮޅަށް މަސައްކަތްކުރައްވާ މީހުން ސަރުކާރުތެރޭގައި ތިބުމަކީވެސް އެ މައްސަލަ ދިމާވާ ކަމެއް. އަދި ޚާއްސަކޮށް މިހާރު އިންތިޚާބެއް ކައިރިވެފައި އޮތީމަ ސަރުކާރުގެ ތެރެއިން އެހެން ވިސްނުމުގައި ތިބޭ މީހުން ބޭނުމެއް ނުވޭ ސަރުކާރަށް ކަމެއް ވާކަމަށްވެސް ދައްކާކަށް. ސަރުކާރުން ކަމެއް ރަނގަޅުކުރަން އުޅެންޏާ އެކަމަށް ހުރަސްއެޅުމަކީވެސް އެބޭފުޅުން ކޮންމެހެން ކުރަން ބޭނުންވާ ކަމެއް"
މަޖިލީހުގެ މީދޫ ދާއިރާގެ މެމްބަރު ރޮޒައިނާ
ރޮޒައިނާ މިފަދައިން ވިދާޅުވެފައިވާއިރު ސަރުކާރުގެ ވުޒާރާތަކާއި ކުންފުނިތަކުގެ އިސް މަގާމުތަކަށް ކުއްލި ބަދަލުތަކެއް ގެންނަމުންދާކަން ފާހަގަކޮށްލެވެއެވެ.
އެގޮތުން ދާދިފަހުން ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ މެނޭޖިންގ ޑިރެކްޓަރ ގެ މަޤާމުގައި ހުންނެވި ހުސެއިން އަމްރު އެ މަގާމުން ވަކިކޮށްފައެވެ. އަދި ރައީސުލްޖުމްހޫރިއްޔާގެ އޮފީހުގެ މިނިސްޓަރުކަމުގައި ހުންނެވި ވެރިކަންކުރާ އެމްޑީޕީގެ ނައިބުރައީސް މުޙައްމަދު ޝިފާޒު އެމަޤާމުން ވަކިކޮށް އެ މަގާމް އެމްޑީޕީގެ ޗެއާޕާސަން ގެ ނާއިބު އިބްރާޙީމް ވަހީދު (އިބުރޭ)އަށް ދޭން ސަރުކާރުން ވަނީ ނިންމާފަ އެވެ.
ސަރުކާރުގެ މަޤާމުތަކުން ވަކިކުރައްވާފައިވާ ބޭފުޅުންނަކީ އެމްޑީޕީގެ ރައީސް މުޙައްމަދު ނަޝީދަށް ތާއީދުކުރައްވާ ބޭފުޅުންނެވެ. އެ ބޭފުޅުން ސަރުކާރުގެ މަގާމުތަކުން ވަކިކުރަނީ ރައީސް ޞާލިހާއި ސިޔާސީ ގޮތުން ޚިޔާލުތަފާތު ބޭފުޅުންނަށް ވާތީ ސަރުކާރުގެ ސިޔާސަތުތައް ތަންފީޒުކުރުމަށް ދަތިވާނެކަމަށް ވިދާޅުވަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
