ބަލިވުމުން ބޭސްފަރުވާކޮށެއް ނުދޭ، ދައްކަނީ ބިރު: އިންޑިއާ މަސައްކަތްތެރިން!

ހުޅުމާލޭ 2 ވަނަ ފިޔަވަހީގައި ފަހި ދިރިއުޅުން ކޯޕަރޭޝަނުން އިންޑިއާގެ ޖޭއެމްސީއާ ހަވާލުކޮށްގެން ހިންގާ ހައުސިން މަޝްރޫޢުގެ މަސައްކަތްކުރާ މަސައްކަތްތެރިޔަކު ބަލިވިޔަސް ބޭސް ފަރުވާކޮށް ނުދޭ ކަމަށާއި، ބަދަލުގައި ދައްކަނީ ބިރުކަމަށް އެމީހުން ބުނެފި އެވެ.

އިންޑިއާގެ ޖޭއެމްސީ މަސައްކަތްތެރިންނަށް މުސާރަ ނުދީ ގިނަ ދުވަސްވުމާއި ގުޅިގެން މަސައްކަތް ހުއްޓާލާ އެމީހުން ހަޅުތާލުކުރަން ފަށާފައިވާއިރު، އެމީހުން ވަނީ ޖޭއެމްސީއިން މަސައްކަތްތެރިން ގެންގުޅޭ ނިކަމެތި ހާލު "ވޮއިސް" ޓީމާއި ހިއްސާކޮށްފަ އެވެ.

އެމީހުން ބުނިގޮތުގައި އެމީހުންނަށް ތިން އިރަށް ކާން ހުންނަނީ ދަބަރުފެންހެން ހުންނަ ރިހަގަނޑެކެވެ. އެއިން ރަހައަކުން ކުރެ ރަހައެއް ނުލާއިރު، އަނގަޔަށްލާން ވެސް ނުކެރޭކަމަށް އެމީހުން ކިޔައިދިނެވެ. އޭގެ އިތުރުން އެމީހުން ކާން ގެންނަ މަސް ހުންނަނީ ގިނަ ދުވަސްވުމުގެ ސަބަބުން ފުސް ޖަހާ ހަލާކުވެފައި ކަމަށާއި، ތަކުރާރީއާއި ބިސް ވެސް ހުންނަނީ ހަލާލުވެފައިކަމަށް އެމީހުން ކިޔައިދިނެވެ.

އެމީހުން އުޅޭ ސަރަހައްގޮސް ބެލިބެލުމުން އެ ވާހަކަތަކަކީ ތެދު ވާހަކަތަކެއްކަން "ވޮއިސް" ޓީމަށް ވަނީ ކަށަވަރުކުރެވިފައެވެ.

އިންޑިއާގެ ޖޭއެމްސީ ކުންފުނީގެ މަސައްކަތްތެރިންނަށް ކާންދެނީ ހަލާކުވެފައި ހުންނަ އެއްޗިހިކަން ވޮއިސް ޓީމަށްވެސް ވަނީ ފާހަގަކުރެވިފައެވެ. އެގޮތުން އެމީހުން ކިޔައިދިން ގޮތަށް ކާން ގެނެސްފައި ހުރި މަހުގައި ފުސްޖަހާ ހަލާކުވެފައިވާއިރު، ބިހާއި ތަރުކާރީ ވެސް ވަނީ ބޭނުންކުރަން އެކަށީގެންނުވާވަރަށް ހަލާކުވެފަ އެވެ.

މަހާއި ކުކުޅު ރައްކާކޮށްފައިވާ މަހާއި ކުކުޅު މަހުގެ ހަލަތު ވޮއިސް ޓީމުން ބެލިއިރު އެ ރައްކާކޮށްފައިވަނީވެސް އެކަށީގެންވާ ފިނި މިނެެއްގައި ނޫންކަން ފާހަގަކުރެވުނެވެ. އަދި އޭގެ ސަބަބުން މަސްތައް ހަކާކުވެފައި ވާކަން ފާހަގަކުރެވުނެވެ.

އެމީހުން ކިޔައިދިން ގޮތުގައި ހަލާކުވެފައި ހުންނަ އެއްޗިހި ކާން ޖެހޭތީ ކާނާ ވިހަވުމުގެ ސަބަބުން މުވައްޒަފުން ވަރަށް އަވަސް އަވަހަށް ބަލިވެއެވެ.

އެހެން ނަމަވެސް ބަލިވެގެން ޑޮކްޓަރަށް ދައްކާން އެދުނަސް، ބޭސްފަރުވާކޮށް ނުދޭކަމަށާއި، ބަދަލުގައި ދެނީ އިންޒާރުކަމަށް އެމީހުން ކިޔައިދިނެވެ.

އެމީހުން ބުނީ ބޭސްފަރުވާކޮށް ނުދޭތާ މުސާރަކޮޅުވެސް ނުދޭތީ އެމީހުންނަށް ފަރުވާ ހޯދޭނެ އެއްވެސް ގޮތެއް ނޯންނަކަމަށެވެ. ބަލިވެގެން މަސައްކަތަށް ނުދާނަމަ ދޭ މުސާރަކޮޅުން ވެސް ކަނޑާނެ ކަމުގެ އިންޒާރުތައް ދޭއިރު، ބަލިވިޔަސް މަސައްކަތަށް ނުކުންނަ މީހުން ތިބޭކަމަށް އެ މުވައްޒަފުން ކިޔައިދިނެވެ.

އެމީހުން ބުނީ އެންމެ ހިތްދަތިވަނީ މުސާރަ ނުދީ ގިނަ ދުވަސްވާތީ ކަމަށެވެ. ޖޭއެމްސީން އެމީހުންނަށް ދޭ މުސާރައަށް އެމީހުންގެ އާއިލާތައް ބަރޯސާވާއިރު، އަމިއްލަ ބޭނުންތަކަށް ޚަރަދުކުރާނެ އެންމެ ރުފިޔާއެއް ވެސް އަތުގައި ނެތި ގިނަ ދުވަސްތަކެއް ވެގެން ދިއުމަކީ ވަރަށް ބޮޑަށް ދަތިވާ ކަމެއްކަން އެމީހުން ފާހަގަކުރިއެވެ.

ތަކުރާރުކޮށް އެ ކަންބޮޑުވުންތައް ކުންފުނީގެ މެނޭޖުމަންޓާއި ހިއްސާކުރެވިފައިވާނެ ކަމަށާއި، އެހެން ނަމަވެސް އެއްވެސް ޙައްލެއް ހޯދާދީފައި ނުވާކަމަށް އެމީހުން ބުންޏެވެ. އަދި މިހާރު އެ މަސައްކަތްތެރިން ތިބީ ގޮތް ހުސްވެފައިކަމަށާއި، އެކަމުގައި އެހީތެރިވެދޭނެ އެއްވެސް ފަރާތެއް ނެތްކަމަށް އެމީހުން ވަރަށް އަސަރާއެކު ކިޔައިދިނެވެ.