އިރާންގެ ރައީސް ރައީސީ ސީރިޔާ އަށް ވަޑައިގަންނަވަނީ

އިރާންގެ ރައީސް އިބްރާހިމް ރައީސީ މިހަފްތާގެ ބުދަ ދުވަހު ސީރިޔާ އަށް ވަޑައިގަންނަވަން ހަމަޖެހިއްޖެއެވެ.

އިރާންގެ ރަސްމީ މީޑިއާ އިން ބުނެފައިވަނީ މިހަފްތާގެ ބުދަ ދުވަހު ރައީސީ ސީރިޔާ އަށް ވަޑައިގަންނަވަނީ ރަސްމީ ކޮށް ލިބިވަޑައިގެންނެވި ދައުވަތަކަށް ދެދުވަހުގެ ރަސްމީ ދަތުރުފުޅެއް ގައި ކަމަށެވެ. އަދި މި ދަތުރުފުޅުގައި ދެ ޤައުމުގެ ދެމެދުގައި މުުހިންމު މަޝްވަރާ ތަކެއް ކުރެވިގެން ދާނެ ކަމަށް ވެސް އިރާންގެ ރަސްމީ މީޑިޔާ އިން ރިޕޯޓު ކޮށްފައިވެއެވެ.

"ޑރ ރައީސީ ބުދަ ދުވަހު ދިމިޝްޤަށް ކުރައްވާ މި ދަތުރުފުޅަކީ މިހާރު މި ސަރަހައްދަށް މިއަންނަ ބަދަލުތަކާއި އަދި ކުރިއެރުންތަކާއި މެދު މުހިންމު މަޝްވަރާ ތަކެއް ކުރެވޭނެ ދަތުރުފުޅެއް" އިރާން އިން ސީރިޔާ އަށް ކަނޑައަޅުއްވާފައިވާ ސަފީރް ހޮސެއިން އަކްބަރީ ބުނި ކަމަށް އިރާންގެ ރަސްމީ މީޑިޔާއިން ހާމަކޮށްފައި ވެއެވެ.

އިރާންގެ ރައީސްގެ މިދަތުރުފުޅު އިންތިޒާމް ވެގެން މިދަނީ ސީރިޔާ އާއި ސަޢުދީޢަރަބިއްޔާ އާއި ދެމެދު ގުޅުން ބަދަހި ކުރެވެމުންދާ ދަނޑިވަޅެއްގައެވެ. އަދި ދިމިޝްްޤާއި ޢަރަބި ގައިމުތަކާއި އޮތް ގުޅުން ބަދަހި ކުރުމަށް މަސައްކަތް ކުރެވެމުންދާ ދުވަސްވަރެއްގައެވެ.

އިރާން އަކީ ސީރިޔާގެ އެތެރޭގައި ހިނގަމުން ދިޔަ ހަމަނުޖެހުން ތަކާއި ހަނގުރާމައިގެ ތެރޭގައި ސީރިޔާގެ ރައީސް ބައްޝާރުލް އަސަދަށް އެންމެ ގާތުން ވާގިވެރިވި އެއް ގައުމެވެ. މާލީ ގޮތުންނާއި މިލިޓަރީ ގޮތުން އިރާން އިން ބައްޝާރުލް އަސަދަށް ވާގިވެރި ވެފައިވެއެވެ.

"މި ދަތުރުގެ ސަބަބުން ފައިދާ ވެގެން ދާނީ ހަމައެކަނި އިރާން އާއި ސިރިޔާ އަކަށް ނޫން، ސަރަހައްދުގެ އެހެން ގައުމު ތަކަށްވެސް މި ދަތުރުގެ ސަބަބުން ރަނގަޅު ފައިދާތަކެއް ލިބިގެންދާނެ" އަކްބަރީ އިތުރަށް ބުނެފައިވެއެވެ.

އިރާން ގެ ރައީސް ރައީސީގެ މިދަތުރުފުޅަކީ ސީރިޔާގައި މީގެ 10 އަހަރުކުރިން ފެށިގެން ދިޔަ ދާޚިލީ ހަނގުރާމައިގެ ފަހުން ސީރިޔާ އަށް އިރާންގެ ރައީސަކު ކުރައްވާ ފުރަތަމަ ދަތުރުފުޅެވެ. އެންމެ ފަހުން ސީރިޔާ އަށް އިރާންގެ ރައީސަކު ވަޑައިގަތީ 2010 ވަނަ އަހަރުއެވެ. އޭރު އިރާންގެ ރައީސަކަށް ހުންނެވީ މަހްމޫދު އަހްމަދިންޖާދެވެ.