ސޫރިޔާގެ ކޯޓުން ބައްޝާރުލް އަސަދާއި އާއިލާގެ ދެ މެންބަރަކަށް މަރުގެ ޙުކުމް އިއްވައިފި

ސޫރިޔާގައި ގާތްގަނޑަކަށް 14 އަހަރު ދެމިގެންދިޔަ ދާޚިލީ ހަނގުރާމައިގެ ތެރޭގައި ހިންގި ބޮޑެތި ޖަރީމާތަކާ ގުޅިގެން ކުރީގެ ރައީސް ބައްޝާރުލް އަސަދާއި އޭނާގެ ކޮއްކޮ މާހިރުލް އަސަދާއި ދެބެންގެދެދަރި އާތިފް ނަޖީބުގެ މައްޗަށް ދިމިޝްގުގެ ކްރިމިނަލް ކޯޓުން މަރުގެ ޙުކުމް އިއްވައިފިއެވެ.

ގަސްދުގައި މީހުން މެރުމާއި އަނިޔާކުރުމާއި އިންސާނިއްޔަތާ ޚިލާފު ޖަރީމާތައް ހިންގުމުގެ ކުށް ބައްޝާރުގެ މައްޗަށް ސާބިތުވިއިރު 2024 ވަނަ އަހަރުގެ ޑިސެމްބަރުގައި ވެރިކަމުން ވައްޓައިލުމާ ގުޅިގެން އޭނާ ދިރިއުޅެމުން ދަނީ ރަޝިޔާގައެވެ. އެހެންކަމުން މި ޙުކުމް އިއްވާފައިވަނީ އޭނާގެ ޣައިރު ހާޒިރުގައެވެ. ހަމައެގޮތަށް ރަޝިޔާގައި ދިރިއުޅެމުންދާ މާހިރުލް އަސަދުގެ މައްޗަށް ވެސް ގަސްދުގައި މީހުން މެރުމާއި އަނިޔާކުރުމުގެ ކުށް ސާބިތުވެ ޣައިރު ހާޒިރުގައި ވަނީ މަރުގެ ޙުކުމް އިއްވައިފައެވެ.

ތިން ވަނައަށް ޙުކުމް އައީ ދެރްއާ ޕްރޮވިންސްގެ ޕޮލިޓިކަލް ސެކިއުރިޓީގެ ކުރީގެ ވެރިޔާ އާތިފް ނަޖީބުގެ މައްޗަށެވެ. މިދިޔަ އަހަރުގެ ޖެނުއަރީގައި ހައްޔަރުކުރި ނަޖީބު ކޯޓުގެ ކޮށީގައި ކުށްވެރިންގެ ޔުނީފޯމުގައި ހުއްޓައި އޭނާގެ މައްޗަށް ޙުކުމް އިއްވީ 15 އަހަރުން ދަށުގެ ކުޑަކުދިން ގަސްދުގައި މެރުމާއި މީހުންނަށް މަރުވާ ހިސާބަށް އަނިޔާކުރުން ސާބިތުވެގެންނެވެ. 2011 ވަނަ އަހަރު ދެރްއާގައި ކުރި މުޒާހަރާތަކާ ދެކޮޅަށް ހިންގި ލޭއޮހޮރުވުންތަކުގައި އެންމެ އިސް ދައުރު އަދާކުރީ ނަޖީބެވެ.

މައްސަލަ ބެއްލެވި ފަނޑިޔާރު ފަޚްރުއްދީން އަލް-އަރްޔާން ފާހަގަކުރެއްވި ގޮތުގައި ހެކީންގެ ބަޔާންތަކުން ބައްޝާރަކީ މި ޖަރީމާތައް ހިންގުމުގައި ގޮތް ނިންމުމުގެ އެންމެ އިސް ފަރާތްކަން ސާފުވެއެވެ. އަދި ދައުލަތުގެ މުއައްސަސާތައް ބޭނުންކޮށްގެން މި ކުށްތައް ހިންގާފައިވާ ކަމަށް ވެސް ފަނޑިޔާރު ވިދާޅުވިއެވެ.

އަލްޖަޒީރާ އިން ދިމިޝްގުގައި ހުރެ ރިޕޯޓުކުރި ގޮތުގައި އެތައް ޒަމާނެއް ވަންދެން ދަރިންނަށް އަނިޔާކޮށް ގެދޮރުން ބޭރުކޮށް މުޖުތަމަޢުތައް ހަލާކުކޮށްލި ފަރާތްތަކަށް ޙައްޤު އަދަބު ލިބޭތަން ފެނުމުން ސޫރިޔާގެ ރައްޔިތުންނަށް ވަރަށް ބޮޑު ހިތްހަމަޖެހުމެއް ލިބިގެންދާނެއެވެ.

ސޫރިޔާގެ އިންތިޤާލީ ސަރުކާރުން ކުރީގެ ސަރުކާރުގެ އިސް ވެރިންނާ ދެކޮޅަށް ޝަރީޢަތް ހިންގަން ފެށި ފަހުން މިއީ އިއްވި މި ފަދަ ފުރަތަމަ ޙުކުމެވެ. ރިޕޯޓަރުން ފާހަގަކުރާ ގޮތުގައި މި ޙުކުމުގެ ސަބަބުން ބައްޝާރުގެ ވެރިކަމުގައި ޖަރީމާ ހިންގި އެހެން ފަރާތްތަކުގެ މައްޗަށް ވެސް ޝަރީޢަތް ހިންގުމުގެ ޤާނޫނީ މަގު ވަނީ ހުޅުވިފައެވެ.