އިތުރު ހަ ގައުމެއްގެ ރައްޔިތުން އެމެރިކާއަށް ދަތުރުކުރުން މަނާކޮށްފި، ސީރިޔާއާ ފަލަސްތީނުވެސް ހިމެނޭ

އެމެރިކާއަށް ދަތުރުކުރުމަށް މަނާކުރެވިފައިވާ ގައުމުތަކުގެ ލިސްޓަށް ހަ ގައުމެއް އިތުރުކޮށްފިއެވެ. މި ގައުމުތަކުގެ ތެރޭގައި ފަލަސްތީނާއި ސީރިޔާ ވެސް ހިމެނެއެވެ.

މުސްލިމުންދާ ދެކޮޅަށް ހަރުކަށި އުސޫލުތަކެއް ގެންގުޅޭ، އެމެރިކާގެ ރައީސް ޑޮނަލްޑް ޓްރަމްޕްގެ އެންގުމަށް އެގައުމުގެ އިމިގްރޭޝަނުން ނިންމި މި ނިންމުން އާންމުކުރީ އަންގާރަ ދުވަހު ވައިޓް ހައުސްއިންނެވެ.

އެގޮތުން ވައިޓް ހައުސްއިން ނެރުނު ބަޔާނުގައި، އެގައުމަށް ދަތުރުކުރުން މަނާ ގައުމުތަކުގެ ލިސްޓަށް އިތުރުކޮށްފައިވަނީ، ފަލަސްތީނު، ބުރުކީނާ ފާސޯ، މާލީ، ނައިޖީރިއާ، ދެކުނު ސޫދާން އަދި ސީރިޔާއެވެ.  އެއާއެކު ޖުމްލަ 18 ގައުމެއްގެ ރައްޔިތުން އެމެރިކާއަށް ދަތުރުކުރުން މިވަނީ މަނާ ކޮށްފައެވެ.

އެމެރިކާ އަކީ ފަލަސްތީނު ދައުލަތެއްގެ ގޮތުގައި ބަލައިގަންނަ ގައުމަކަށް ނުވާއިރު، ބޭން ކުރެވުނު ގައުމުގެ ތަކުގެ ލިސްޓުގައިވެސް ފަލަސްތީނު އޭ ލިޔުމުގެ ބަދަލުގައި ލިޔެފައި އޮތީ، 'ފަލަސްތީނު އޮތޯރިޓީގެ ޑޮކިޔުމަންޓްސް' އެވެ. އަދި ފަލަސްތީނުގެ ރައްޔިތުންނަކީ ކޮބައިކަން ހާމަކޮށް ލިޔެފައިވަނީ އެއީ 'ފަލަސްތީނު އޮތޯރިޓީއިން ނެރެފައިވާ ނުވަތަ ތާއީދުކޮށްފައިވާ ދަތުރުފަތުރުގެ ލިޔެކިޔުންތަކުގައި ދަތުރުކުރަން މަސައްކަތްކުރާ ފަރާތްތައް' ކަމަށެވެ.

ފަލަސްތީނުގެ ރައްޔިތުން އެމެރިކާއަށް ދަތުރުކުރުން މަނާކުރި ސަބަބު ހާމަކޮށް ވައިޓް ހައުސްއިން ބުނެފައިވަނީ "އެމެރިކާއިން ޓެރަރިސްޓު ޖަމާއަތްތަކުގެ ގޮތުގައި ކަނޑައަޅާފައިވާ ގިނަ ޖަމާއަތްތައް ހުޅަނގު އައްސޭރިއާއި ޣައްޒާގައި ހަރަކާތްތެރިވާ ކަމަށާއި، އެމީހުން އެމެރިކާގެ ރައްޔިތުން ގަތުލުކޮށްފައިވާ“ ކަމެވެ.

އަދި ފަލަސްތީނުގައި އިސްރާއިލުން ހިންގިޖަރީމާތަކާ ގުޅުވައިވެސް އެމެރިކާއިން ކުށްވެރިކޮށްފައި އޮތީ ފަލަސްތީނެވެ. އެގޮތުން ގަތުލް އާއްމު ހިންގީ އިސްރާއިލުން ކަމަށްވިޔަށް އެ ބަޔާނުގައިވާ ގޮތުން، އެމެރިކާގެ ސަލާމަތަށް ނުރައްކާވަނީ ފަލަސްތީނުގެ ރައްޔިތުންނެވެ.

މީގެ އިތުރުން ފަލަސްތީނުގެ ރައްޔިތުން އެމެރިކާ މީހުން މަރާކަމަށް ބުނާއިރު ތަފާސް ހިސާބުތަކުން އެނގޭ ގޮތުން އެމެރިކާގެ ރައްޔިތުން މަރާފައިވަނީ އިސްރާއިލު ޖަމާޢަތުގެ މީހުންނެވެ. އެގޮތުން، އިސްރާއިލުގެ މީހުން ވަނީ މަދުވެގެން ދެ އެމެރިކާ ރައްޔިތުން މަރާލާފައިވާ ކަން އެނގެއެވެ.

މީގެ އިތުރުން ސީރިޔާއިން އެމެރިކާއަށް ދަތުރުފަތުރުކުރުން މަނާކުރިއިރު މިދިޔަ ނޮވެމްބަރު މަހު ސީރިޔާގެ ރައީސް އަޙްމަދު އަލް-ޝަރާ ވައިޓް ހައުސްއަށް ކުރި ޒިޔާރަތަށްފަހު ވޮޝިންގޓަންއާއި ދިމިޝްގްއާ ދެމެދު ގުޅުން ބަދަހިވަމުންދާ ކަމަށް ރިޕޯޓްކޮށްފައިވެއެވެ.

ވައިޓް ހައުސްއިން ބުނެފައިވަނީ "ސީރިޔާގައި އަދިވެސް ޕާސްޕޯޓު ނުވަތަ ސިވިލް ލިޔެކިޔުންތައް ނެރެން އެކަށީގެންވާ މަރުކަޒީ އިދާރާއެއް ނެތް ކަމަށާއި، އަދި އެކަށީގެންވާ ސްކްރީނިންގ ފިޔަވަޅުތަކެއް ނެތުމުން." އެގައުމުގެ ރައްޔޮތުންވެސް އެމެރިކާއަށް ދަތުރުކުރުން މަނާކުރީއެވެ.

މީގެ ކުރިންވެސް ޓްރަމްޕްގެ ވެރިކަމުގައި މުސްލިމުން އެމެރިކާއަށް ވަނުން މުޅިން މަނާކުރުމަށް އޭނާ ގޮވާލިއެވެ. އަދި މި ދައުރު ފެށި އިރު، މުސްލިމު ގިނަ ގައުމުތަކަކުން އެމެރިކާއަށް ދަތުރުފަތުރުކުރުމަށް ހުރަސް އެޅިއެވެ.