މީހުން ހިތްހަމަނުޖެހޭ ލަގަބުތައްދީ، ނަންނަމުން ކިޔުމަކީ ދީނުގައި ހުއްދަ ކަމެއް ނޫން: ޑރ.ޢަލީ ޒާހިރު

މީހުންނަށް، އެމީހުން ހިތްހަމަ ނުޖެހޭ ނަންނަމުން ގޮވައި، އެފަދަ ލަގަބުތައް ދިނުމަކީ އިސްލާމްދީނުގައި ހުއްދަ ކަމެއް ނޫން ކަމަށް ރާއްޖޭހެ ފުންނާބު އުސް ދީނީ ޢިލްމުވެރިޔާ ޑރ. ޢަލީ ޒާހިރު ބިން ސަޢީދު ޤާސިމް ވިދާޅުވެއްޖެއެވެ.

އިއްޔެގެ ރައްޔިތުންގެ މަޖިލީހުގެ ޖަލްސާގައި، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ނިސްބަތްކޮށް "ޗޯރު އިބުރޭ" ކިޔައި ޗެނަލް-13 ގެނެސްދިން ލަވަތަކެއްގެ މައްސަލަ ބްރޯޑްކާސްޓިން ކޮމިޝަނުން ބަލާތީ ވަނީ ކުއްލި މައްސަލައެއް ހުށަހަޅާފައެވެ. އެ މައްސަލަ މަޖިލީހުން ބޭރުކޮށްލި ނަމަވެސް ގިނަ މެންބަރުންތަކެއް ވަނީ މަޖިލީހުގެ ތަޅުމުގައި އެ ބަހުސް ކުރައްވާފައެވެ.

އެގޮތުން ސަރުކާރަށް ތާއިދު ކުރައްވާ މެންބަރުން އެފަދަ ކަންކަމާއި ދެކޮޅު ހަދައި އެކަން ކުށްވެރިކޮށް ވާހަކަ ދައްކަވާފައިވާއިރު، ދާދިފަހުން އެމްޑީޕީން ވަކިވެވަޑައިގެންނެވި ބައެއް މެންބަރުން ވަނީ އެފަދައިން ކިޔޭނެ ކަމަށާ، އެމްޑީޕީ ވެރިކަމަށް އައީވެސް ވެރިކަން ކުރަމުން އައި އެކި އެކި ފަރާތްތަކަށް ވަނަން ކިޔައިގެން ކަމަށް ވިދާޅުވެފައެވެ. އަދި ރައީސް ޞާލިހު ވެސް ވެރިކަމަށް ވަޑައިގެންނެވީ އެމްޑީޕީން ރައީސް ޔާމީނަށް ނަން ނަމުން ކިޔުއްވައިގެން ކަމަށާ، އެއީ ސިޔާސީ އުކުޅެއް ކަމަށް ވިދާޅުވި އެވެ.

އަދި "ޗޯރު އިބުރޭ" ގޮވާތީއޭ ކިޔައި ހަމައިން ނެއްޓިގެން ދިއުމަކީ ޑިމޮކްރަސީގައި ފަހަތަށް އަޅާ ފިޔަވަޅެއްކަމަށް މަޖިލީހުގެ ރައީސް އަދި ސަރުކާރު ހިންގާ މައި ޕާޓީ އެމްޑީޕީގެ ރައީސް މުޙައްމަދު ނަޝީދުވެސް ވަނީ ވިދާޅުވެފަ އެވެ.

"ކުރީގެ ރައީސް އިބްރާހިމް ނާސިރަށް ކަރު ކުރު ބައިސާ، ކުރީގެ ރައީސް މައުމޫނު އަބްދުލްގައްޔޫމަށް ގޮޅާބޯ، ކުރީގެ ރައީސް މުޙައްމަދު ނަޝީދަށް ގަންޖާބޯ، ކުރީގެ ރައީސް ވަހީދަށް ބާޣީ ވަހީދު، ކުރީގެ ރައީސް އަބްދުالله ޔާމިނަށް ރާގޮނޑި ރާޖާ.. މި ނަންތައް އަޅުގަނޑުމެން ވަނީ މި މަޖިލީހުގަޔާއި އެކި ތަންތަނުގައި އެކި ގޮތްގޮތަށް ކިޔާފައި"

ރައީސް މުޙައްމަދު ނަޝީދު

އެކަންކަމާއި ގުޅުވައި، ރޭ "ދާރިސް" ޓީވީން ގެނެސްދިން "ސުވާލަކީ ކޮބާ؟" ޕްރޮގްރާމްގައި ބެލުންތެރިއެއް ވަނީ އެފަދަ ކަންކަމަކީ ދީނީގޮތުން ކޮންކަހަލަ ކަމެއްތޯ ސުވާލުކޮށްފައެވެ.

އެ ސުވާލުގެ ޖަވާބުގައި، ޑރ. ޢަލީ ޒާހިރު ވިދާޅުވީ، ހަގީގަތާއި ޚިލާފް ވާހަކަ ދައްކައި، މީހުންނަށް މަލާމާތްކޮށް، ފުރައްސާރަ ކުރުމަކީ ދީނީ އަޚްލާގާއި ޚިލާފު ކަމެއް ކަމަށެވެ.

"ކީރިތި ޤުރުއާނުގައި الله ވަހީ ކުރައްވަނީ، ލަގަބު ތަކުން މީހުންނަށް ނުގޮވާށޭ. އެހެންވީމާ، މީހުން ހިތްހަމަ ނުޖެހޭ ފަދަ ލަގަބުތައް ދީގެން ނުވާނެ. އެއީ ދީނުގައި ހުއްދަ ކަމެއް ނޫން. ވަކިމީހަކަށް ނޫން. އެއްވެސް މީހަކާއި ދިމާއަށް. އެއީ މީހެއްގެ އަބުރަށް (އެރުން). މީހެއްގެ އަބުރަށް އަރައިގަތުން އިސްލާމްދީނުގައި ކަނޑައެޅިގެން މަނާކުރައްވާފައިވާ، ހަރާމް ކުރައްވާފައިވާ ކަމެއް. އެކަހަލަ ކަންތައް ކޮށްގެން ނުވާނެ އެއީ ކޮންމެ ވަޒީފާއެއް އަދާކުރާ މީހެއް ކަމުގައި ވިޔަސް.

ޑރ. ޢަލީ ޒާހިރު ބިން ސަޢީދު ޤާސިމް

މިއާއެކު ޝެއިޚް ވިދާޅުވީ ވެރިން ވިޔަސް އާދައިގެ މީހެއް ނަމަވެސް، އެމީހުންނަށް އިސްލާމް ދީނުގައި ހައްގުތަކެއް ލިބިދީފައިވާ ކަމަށެވެ.

މީގެ އިތުރުން ޝެއިޚް ވިދާޅުވީ، ވެރިންނަށް ވުމުން އެމީހުންގެ ބޮލުގައި ވަރަށް ގިނަ ޒިންމާތަކެއް އެޅުވިފައިވާ ކަމަށާ، ވެރިން ހަވާލުވާންޖެހޭ އަމާނާތް ތަކަކާއި، އެމީހުން އެހެން މީހުންނަށް އަދާކުރައްވަންޖެހޭ ހައްގު ތަކެއްވެސް ވާކަމަށެވެ. އަދި އެމީހުންނާއި ހަވާލުކުރެެވިފައިވާ ޒިންމާއާއި މެދުގައި ގިޔާމަތް ދުވާހުން ސުވާލު ކުރެވޭނެކަންވެސް ޝެއިޚް ވަނީ ހަނދާންކޮށްދެއްވާފައެވެ.