ލޯފަން މީހުނަށް މިނިވަންކަމާއި އެކު ވޯޓުލެވޭ އިސްލާޙް މަޖިލީހަށް ބަލައިގަނެފި

ލޮލުގެ ފެނުމުން މަޙްރޫމް ވެފައިވާ މީހުންނަށް މިނިވަންކަމާއި އެކު ވޯޓުލެވޭނެ ގޮތަށް އިންތިޚާބާއި ބެހޭ ޤާނޫނަށް ގެނައުމަށް މަޖިިލީހަށް ހުށަހެޅުނު އިސްލާހު މަޖިލީހުން ބަލައިގަނެފިއެވެ. މިއިސްލާހު މަޖިލީހަށް ބަލައިގަނެ ކޮމެޓީއަށް ފޮނުއްވީ ވޯޓުގައި ބައިވެރިވެވަޑައިގެންނެވި 51 މެމްބަރުންގެ އިއްތިފާގުންނެވެ.

އިންތިޚާބުތަކާއި ބެހޭ ޢާއްމު ޤާނޫނަށް ހުށަހެޅުނު ލޯފަން މީހުންގެ ވޯޓް ލުމާއިބެހޭ އިސްލާހު ސަރުކާރުގެ ފަރާތުން މަޖިލީހަށް ހުށަހެޅުއްވީ ހިންނަވަރު ދާއިރާގެ މެމްބަރު ޖީހާން މަހްމޫދެވެ.

އިސްލާޙް ހުށަހަޅުއްވައި ޖީހާން ވަނީ ލޯފަން މީހުން ވޯޓްލުމުގައި ބޭނުން ކުރާނެ ޚާއްސަ ޓެމްޕްލޭޓެއް މަޖިލީހާ ހިއްސާކޮށްފައެވެ. އެ ޓެމްޕްލޭޓް މެދުވެރިކޮށް ލޮލަށް ފެނުމުން މަހްރޫމްވެފައިވާ ފަރާތްތަކަށް ފަސޭހަކަމާއެކު އިތުރު މީހެއްގެ އެހީއާއި ނުލާ އިންތިހާބުގައި ވޯޓްލެވޭނެ ކަމަށް ޖީހާން ވިދާޅުވިއެވެ.

އިތުރު އެހީތެރިޔަކާ ނުލައި ވޯޓް ލުމުގެ ކުޅަދާނަކަން ލިބިފައިވާ ނުވަތަ ޖިސްމާނީ އެހެން އުނދަގުލެއްނެތް ހަމައެކަނި ލޯފަން މީހުން ވޯޓްލުމުގައި ބޭނުންކުރާނެ ޓެމްޕްލޭޓްގެ މައުލޫމާތު ހިއްސާ ކުރައްވައި ޖީހާން ވިދާޅުވީ އެ ޓެމްޕްލޭޓަކީ ވަގުތީ ގޮތުން ވޯޓް ކަރުދާސް އޭގެ ތެރެއަށް ލައްވާލެވޭ ނުވަތަ ވަގުތީ ގޮތުން ކަރުދާސް އޭގެ މަތީގައި ބޭއްވޭ ގޮތަށް ފަރުމާ ކުރެވިފައިވާ ޓެމްޕްލޭޓެއް ކަމަށެވެ.

އެގޮތުން އެ ޓެމްޕްލޭޓްގައި ކޮންމެ ކެންޑިޑޭޓަކަށް ވޯޓް ދިނުމަށް ފާހަގަ ޖަހަންޖެހޭ ދިމާލުގައި ކަނޑާ ނަގާފައި އޮންނާނެ ކަމަށް ޖީހާން ވިދާޅުވިއެވެ. އަދި އެ ޓެމްޕްލޭޓްގައި ވޯޓްދޭ ކެންޑިޑޭޓަކަށް ފާހަގަ ޖެހުމަށް ރަސްގެއަކަށް ވާހެން ކަނޑާނަގާފައި ވާނެ ކަމަށް އޭނާ ވިދާޅުވިއެވެ.

ޖީހާންގެ އެ އިސްލާހުގައި ބުނެފައިވަނީ ވޯޓް ކަރުދާސް އަދި ވޯޓްލާ ޓެމްޕްލޭޓް ދޫކުރާ ހިސާބުން ފެށިގެން ވޯޓް ކަރުދާސް ވޯޓް ފޮއްޓަށް ވައްޓާލުމާ ހަމައަށް އިލެކްޝަންސްގެ އެއްވެސް އޮފިޝަލަކު އެހީތެރިވެގެން ނުވާނެ ކަމަށާއި އެތަނުގައި ހާޒިރު ވެ ހުރެގެން ނުވާނެ ކަމަށެވެ.

މީގެ އިތުރުން ލޯފަން މީހާގެ ވޯޓްގެ ސިއްރުކަން ގެއްލޭނެ އެއްވެސް އަމަލެއް އެއްވެސް ފަރާތަކުން ހިންގައިގެން ނުވާނެ ކަމަށްވެސް ގަވާއިދުގައި ބުނެފައިވެއެވެ.

މިއަދުގެ މަޖިލީހުގައި ވަނީ އެބިލު މުޅި މަޖިލީހުގެ ކޮމިޓީއަށް ފޮނުވައިފައެވެ. އަދި ކޮމިޓީގެ ބައްދަލުވުމުގައި ހުރިހާ މެމްބަރުންވެސް އިސްކަމެއް ދެއްވަމުން ދިޔައީ ބިލް އޮތް ގޮތައް ފާސްކުރުމަށެވެ. އެގޮތުން އިތުރު އިސްލާޙަކާއި ނުލައި ބިލް އޮތް ގޮތައް ބަލައި ގަތުމަށް މެމްބަރުން ވަނީ ތާއީދު ކުރައްވައިފައެވެ.

"މި މަޖިލީހަށް ލޯފަންކުދިން، އައިސް، އަޅުގަނޑުމެނާއި ވާހަކަ ދައްކައި އަންނަ އިންތިޚާބަށް މިކަން ވާނެ އެމީހުނަށް ވާނެ ގޮތެއް ހަދައި ދިނުމަށް ހުރިހާ ސިޔާސީޕާޓީ އެއް ކައިރީގައި އެދިފައިވަނީ، ދެން އަޅުގަނޑުމެން އެެއްބަޔަކު އަނެއް ބަޔަކާއި ދޭތެރެގައި މައްސަލަތަކެއް ހުއްޓަސް، މި ބާވަތުގެ ކަމެއްގައި އަޅުގަނޑުމެން އެއްބަހެއް ކިޔައިގެން ނިންމާލެވޭ ކަމީ އަޅުގަނޑު މިއަދު އުފާވާކަމެއް" މުޅިމަޖިލީހުގެ ކޮމިޓީގައި ވާހަކަ ދައްކަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވިއެވެ.

އެ ބިލަށް އިސްލާހު ހުށައުމަށް މާދަމާގެ 9:00 ހަމައަށް މެމްބަރުން ނަށް ވަނީ ހުޅުވައިލެވިފައެވެ.