ކުޅުދުއްފުށީ މާލި ޕެރޭޑް، އަމީނީ މަގާއި ގުޅުވާލާފައި!

އަޟުހާ ޢީދާއި ގުޅިގެން ހދ. ކުޅުދުއްފުށީ ސިޓީ ގައި ބާއްވާ މާލި ޕެރޭޑްގައި މިފަހަރު، އަމީނީމަގުގައި ތާރު އެޅުމުގެ މަޝްރޫއުއަށް ފާޑުކިޔައިފިއެވެ.

ކުޅުދުއްފުށީ މާލި ޕެރޭޑަކީ ރާއްޖޭގައި ހުރި ގައުމީ ބޮޑެތި ބައެއް މައްސަލަތަކުގެ ސުރުހީތައް ދައްކަައިދޭ، އަދި ބައެއް "ހޫނު" ވާހަކަތަކަށް އިޝާރާތް ކޮށް، އެކަން ތަފާތު ގޮތަކަށް މީހުންގެ ސަމާލު ކަމަށް ގެންނަމުން އަންނަ ޕެރޭޑެކެވެ. މި ޕެރޭޑްގެ ފޮޓޯތަކުން ކޮންމެ އަހަރަކުވެސް ގިނަ ވާހަކަތަކެއް ކިޔައިދެ އެވެ.

އެގޮތުން މިފަހަރު މި ޕެރޭޑުގައި ހިމަނާފައިވާ އެއް ފުޅަނދުގައި ވަނީ، މިސަރުކާރުން 'ބޮޑު' މަޝްރޫޢު އަކަށް ހަދައިގެން ކުރިއަށް ގެންދާ އަމީނީމަގުގައި ތާރު އެޅުމުގެ މަސައްކަތެވެ.

"ހޭވި މަގު"ގެ ނަމުން ނަން ދީފައިވާ މި މަގު ދައްކައިދޭ ފުޅަނދުގައި އެ މަގުގެ މެދުގައި ދެ ވަޅުގަނޑު ކޮނެފައިވާ ތަން ދައްކުވައިދެއެވެ. އެ މަޝްރޫއު ހިންގާ ކަމަށް ލިޔެފައިވަނީ "ސީޑީއާރް" ކުންފުނިންނެވެ. މިއީ "އާރްޑީސީ" ގެ އަކުރުތައް ފަހަތުން ފެށިގެން ލިޔާއިރު އިންނާނެ ގޮތެވެ. މީގެ އިތުރުން، ސިމެންތި ޖަހާ މެށިނުގައި "ވަޑި ތާރު" އޭ ލިޔެ، މުޅި އެ މަޝްރޫއު އަށްވެސް ފާޑުކިޔާފައިވެއެވެ.

އަމީނީ މަގުގެ މަޝްރޫއުގެ އިތުރުން ވެސް، ޗާގޯސް މައްސަލައާއި, ކުޅުދުއްފުށީ ފުށް ފެކްޓްރީއެއް، ރައްޔިތުންގެ މަޖިލީހުގެ ޖަލްސާތަކުގައި ދާދިފަހުން ހިނގައިދިޔަ ކަންކަމަށް ޖޯކު ޖަހައި މަށި މާލި ޕެރޭޑުގައި ވަނީ ފުޅަނދު ހަދާފައެވެ.

އެގޮތުން، "ޗޯރު ވަގާއި"، މުގާބެ ނަމުގައި ހުރި ފުޅަނދުތައް ވަނީ ފެނިގެން ގޮސްފައެވެ.

އަމީނީ މަގު ތަރައްގީ ކުރުމުގެ މަސައްކަތް މާލެ ސިޓީ ކައުންސިލް އަތުން ޕްލޭނިންގެ މިނިސްޓްރީއަށް ނަގައި، އަލުން އެ މަސައްކަތް އާރުޑީސީއާ ހަވާލުކޮށްފައިވަނީ އޭގެ ކުރިން ހަވާލުކުރީ އަގަށްވުރެ ދެ ގުނަ ބޮޑު އަދަދަކަށް 84 މިލިއަން ރުފިޔާ އަށެވެ. އެ މަސައްކަތް ހަވާލު ކުރީ 210 ދުވަހުގެ ތެރޭގައި ނިންމާ ގޮތަށެވެ. އެގޮތުން، އެ މަސައްކަތް ނިމޭނެ ކަމަށް އޮތް ތާރީހަކީ މި އަހަރުގެ ފެބްރުއަރީ މަހުގެ ނިޔަލަށެވެ.

އެހެންނަމަވެސް، އެ ތާރީހަށް ނިންމޭ ގޮތް ނުވުމުން، އަލުން އަނެއްކާވެސް ސެޕްޓެމްބަރު 27 ވަނަ ދުވަހު ނިންމާ ގޮތަށް ކަނޑައަޅާފައިވާ ކަމަށް ޕްލޭނިންގ މިނިސްޓްރީން ވަނީ ބުނެފަ އެވެ.

އަމީނީމަގުގެ މަސައްކަތް ނުނިމި ދެމިގެން ދިޔުމުގެ ސަބަބުން ގިނަ ބައެއްގެ ފާޑުކިޔުންތައް ސަރުކާރަށް ވަނީ އަމާޒުވެފައެވެ. އަދި އެ މަގުގެ މަސައްކަތް ކުރަމުންދާ ގޮތާއި މެދު އެއްބަޔަކި ކަންބޮޑުވުން ފާޅުކުރަމުން އަންނަ އިރު، މުޅި އެ މަޝްރޫއު ވެގެން ގޮސްފައި މިވަނީ ގިނަ ބައެއް ޖޯކު ޖަހާ މަޝްރޫޢު އަކަށެވެ.