ރައީސް ޔާމީންގެ ނަސޭހަތެއް: "ގިނަ އެއްޗެހި ހޯދުމުގެ އުންމީދުގައި އަތުގައި އޮތް ނިއުމަތް ދޫކޮށްނުލައްވާ"

މޯލްޑިވިއަން ޑިމޮކްރެޓިކް ޕާޓީ(އެމްޑީޕީ) އިން ރައްޔިތުންގެ ގާތުގައި ވާ ވައުދުތަކާއި މެދު ސަމާލުވުމަށް ވާދަވެރި ސިޔާސީ ލީޑަރު އަދި ކުރިއަށް އޮތް ރިޔާސީ އިންތިޚާބުގައި ޕީޕީއެމްގެ ކެންޑިޑޭޓް ރައީސް ޔާމީން އަބްދުލްގައްޔޫމު ގޮވާލައްވައިފިއެވެ.

ކުޑަހުވަދޫގައި އޮތް ޖަލްސާއެއްގައި ވާހަކަދައްކަވަމުން ރައީސް ޔާމީން ވަނީ ސިޔާސީ ޕާޓީތަކުން ރައްޔިތުންގެ ކުރިމަތީގައި ވާ ވައުދުތަކާއި ދޭތެރޭގައި ސަމާލުވެ، އެ ވައުދުތައް ތަހުލީލުކުރުމަށް ނަސޭހަތްތެރިވެލައްވާފައެވެ.

އިނގިރޭސި މުހާވިރާ ބަހެއްގައި އޮންނަ ވާހަކައަކުން މިސާލު ނަންގަވަމުން ރައީސް ޔާމީން ވިދާޅުވީ، ލިބޭނެ ކަމުގެ އުންމީދުގައި، ނުވަތަ ޚިޔާލުގައި އަތުގައި އޮތް ނިއުމަތެއް ދޫކޮށްލުމަކީ ކުރަން ހެޔޮވާވަރުގެ ކަމެއް ނޫންކަމަށެވެ.

"އިނގިރޭސި މުހާވިރާ ބަހެއް އޮވޭ. އަތުގައި ނުވަތަ ބެލުމުގެ ދަށުގައި އޮންނަ ދޫންޏެއްގެ އަގު ބޮޑޭ އަޅުގަނޑަށް ލިބިދާނެކަމަށް ނުވަތަ ދުރުގައި ހުރި ދެ ދޫނި ލިބޭނެކަމުގެ އުންމީދުކުރުމަށްވުރެ. (Bird in hand is worth two in the bush) ތަންކޮޅަށް ދުރުގައި އަޅުގަނޑަށް ލިބޭނެކަމަށް އޮތް ދެ ދޫނި މީނީ. އެކަމަކު އަތުގައި އޮތް ދޫންޏަށް ރައްކާތެރިވާށޭ"

ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން

ލިބޭނެކަމަށް އުންމީދުކުރާ ދެ ދޫނިކަމަށް ރައީސް ޔާމީންގެ ވާހަކައިގައި އިޝާރާތްކުރައްވާފައިވަނީ އެމްޑީޕީއިން ރައްޔިތުންނަށް ވާ ވައުދުތަކަށެވެ.

"ބޭރުން ލިބިދާނެކަމަށް އިންތިޒާރުކުރާ ދެ ދޫނީގެ ހުވަފެން ނިދެކެންވީ އަޅުގަނޑުމެން. އެމްޑީޕީއަކީ މިކަހަލަ މިކަހަލަ ދަޅަ، މިކަހަލަ ޒީނަތްތެރިކަން މި ކަހަލަ ޖަރީ ވާހަކަދައްކާ ދަޅައަށް ހައްލާ ބައެއް. އެމީހުން ދައްކާފައި އޮތް ވާހަކަ ވުމަށްވުރެ ގާތީ ނުވުން. ނޯންނާނެ އެމީހުން ދެއްކި ވާހަކައެއް ފުއްދާފައެއް"

ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން

ރައީސް ޔާމީން ވިދާޅުވީ، އެމްޑީޕީއިން ވީ ވައުދުތައް ނުފުއްދާކަން އެންމެންނަށް އެނގޭއިރުވެސް ރައީސް އިބްރާހިމް މުހައްމަދު ސޯލިހުގެ ދިފާއުގައި ބައެއް ސިޔާސީ ލީޑަރުން ވާހަކަދައްކަވަމުން ދާ ކަމަށެވެ. އެގޮތުން މި ސަރުކާރުގެ 99 އިންސައްތަ ވައުދު ފުއްދަވާފައިވާކަމަށް ބައެއް ސިޔާސީ ލީޑަރުން ވިދާޅުވަމުން ދާ ދިއުމާމެދު އެމަނިކުފާނު ވަނީ ސުވާލު އުފައްދަވާފައެވެ. އަދި ވެރިކަމަށް ހަތަރު އަހަރު ފުރެންދާއިރު، ރައީސް ސޯލިހު ވީ ހުރިހާ ވައުދެއް ފުއްދާދެވިއްޖެކަމަށް ވާނަމަ، ރިޔާސީ ދައުރު ނިންމަވާލެއްވުން ރަނގަޅުވާނެކަމަށް ރައީސް ޔާމީން ވިދާޅުވިއެވެ.

އެމްޑީޕީގެ ވައުދުތަކަށް ސަމާލުވުމަށް ރައްޔިތުންނަށް އިލްތިމާސްކުރައްވަމުން އެމަނިކުފާނު ވަނީ އެމަނިކުފާނުގެ ވެރިކަމުގައި ރައްޔިތުންނަށް ކޮށްދެއްވާފައިވާ މުހިންމު ޚިދުމަތްތައް ބަލައިގަނެ ފާޅުކުރަމުންދާ ޝުއޫރުތަކަށް ޝުކުރު އަދާކުރައްވާފައެވެ.

ރައްޔިތުންގެ ދިރިއުޅުމަށް ފަސޭހަކަން ލިބިގެން ދިޔައިމާ، އެކަންކަމުގެ ހަނދާންކޮށް، ޝުކުރުވެރިވުމަކީ، ވަރަށް ރަނގަޅު ސިފައެއްގެ ގޮތުގައި ރައީސް ޔާމީން ފާހަގަކުރެއްވިއެވެ.

ނިއުމަތްތަކަށް ޝުކުރު ކުރުމަކީ މުސްލިމުންގެ ކިބައިގައިވެސް ހުންނަން ޖެހޭ މަތް ސިފައެއްގެ ގޮތުގައި ފާހަގަކުރައްވާ ރައީސް ޔާމީން ވިދާޅުވީ ސިޔާސީ ފަރާތްތަކުން ރައްޔިތުންނަށް ދައްކާ ދަޅަތަކަށް ހެއްލިގެން އަތުގައި އޮތް އެއްޗެސް ދޫކޮށްލައިފިކަމަށް ވާނަމަ އޭގެން ނިކުންނާނެ ނަތީޖާތައް ހިތިވާނެކަމަށެވެ.

މި މޭރުމުން އެމަނިކުފާނު ވާހަކަފުޅުދައްކަވާފައިވާއިރު، ރައީސް ޔާމީން ވަނީ އެމަނިކުފާނުގެ ފަސް އަހަރުގައި ރައްޔިތުންގެ ދިރިއުޅުމަށް އައި ބަދަލުތަކާއި މިހާރުގެ ހާލަތާއި ތަފާސް ހިސާބުތަކުގެ އަލީގައި އަޅާކިޔާލުމަށްވެސް އިލްތިމާސްކުރައްވާފައެވެ. އަދި އެފަދައިން އަޅާ ކިޔައި އަމިއްލައަށް ވިސްނުން ގެންގުޅުއްވާނަމަ ރައްޔިތުންނަށް ސިޔާސީ ނިންމުންތައް ނިންމުމަށް ފަސޭހަވެގެން ދާނެކަމަށް ރައީސް ޔާމީން ވަނީ ވިދާޅުވެފައެވެ.