އަމީނީ މަގުގެ ގަސްތައް ކޮށައިދިނުން ސިޓީ ކައުންސިލުން ހުއްޓާލައިފި

ޒަމާނީ ފެންވަރަށް އަމީނީ މަގު ތަރައްގީ ކުރުމަށް ކުރަމުންދާ މަސައްކަތްތަކުގެ ތެރެއިން އެމަގުގައި ހުރި ގަސްތައް ކަނޑަމުންދާތީ އެކަމާއި އެތައް އާއްމުން ކަނބޮޑުވުން ފާޅުކުރަމުންދާތީ، ގަސްތައް ކެނޑުން މާލޭ ސިޓީ ކައުންސިލުން ހުއްޓާލައިފި އެވެ.

އަމީނީމަގު ހެދުމަށްޓަކައި، އެމަގުގައި ހުރި ބައެއް ބިޔަ ގަސްތައް ކަނޑަމުންދާތީ އެކަމާ ގުޅިގެން ގިނަ އާއްމުންގެ ކަންބޮޑުވުމާއި ފާޑުކިޔުންތައް މާލެސިޓީ ކައުންސިލްއަށްވެސްވަނީ އަމާޒުވެފައެވެ.

މިކަމާއި ގުޅިގެން އެ ކައުންސިލުގެ އޮފިޝަލަކު "ވޮއިސް" އަށް މިއަދު ވިދާޅުވީ، ސިޓީ ކައުންސިލުން ކުރަމުންދާ ކަމަކީ އަމީނީ މަގުގައި ބިޔަކޮށް ހެދިފައި ހުރި ގަސްތަކުގެ އޮފިތައް ކޮށައިދިނުން އެކަންޏެވެ. އެ އިން އެއްވެސް ގަހެއް ކެނޑުމާއި ނެގުމުގެ މަސައްކަތް ސިޓީ ކައުންސިލުން މިހާތަނަށް ކޮށްފައި ނުވާނެ ކަމަށް އޭނާ ވިދާޅުވި އެވެ.

އަދި އެގޮތަށް ގޮފި ކޮށައިދިނުމުގެ މަސައްކަތް ކޮށްފައިވަނީ އާރުޑީސީގެ އެދުމުގެ މަތިންކަމަށާ، އެ ކޯޕަރޭޝަނުން ކައުންސިލުގައި އެފަދައިން އެދިފައި ވަނީ، ގަސްތައް ކޮށުމަށް ބޭނުންކުރާ އެންމެ ބޮޑު ސްނޯކްލިފްޓް އެ ކައުންސިލުގައި އޮންނާތީ ކަމަށް ވެސް އޮފިޝަލް ވިދާޅުވި އެވެ.

މީގެ އިތުރުން، ގަސްތަކުގެ ގޮފިތައް ކޮށައިދިނުމުގެ މަސައްކަތް ސިޓީ ކައުންސިލުން ކޮށްދިނީ ސަރުކާރުން ހިންގާ އެއްވެސް މަޝްރޫއަކަށް އެކައުންސިލްގރ އެއްބާރުލުމެއް ނުލިބޭ ކަމަށް ސަރުކާރުން ބުނާތީ ކަމަށާ، އެހެން ނަމަވެސް އެއީ އައްމުންގެ ނުރުހުން އެކަމުގައި އޮތް ކަމެއް ކަމުގައި ވާތީ ގަސްތަކުގެ ގޮފިތައް ކޮށައިދިނުން ހުއްޓާލުމަށް މާލެސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު މިހާރު އަންގަވާފައިވާ ކަމަށްވެސް މީޑިޔާ އޮފިޝަލް ވިދާޅުވިއެވެ.

"މޭޔަރު ބޭނުމެއް ނުވޭ ސިޓީ ކައުންސިލަކީ ގަސް ކަނޑާ ބައެއްގެ ގޮތުގައި ލޭބަލްވާކަށް. އަޅުގަނޑުމެންނަކީ ގަސް އިންދާ ބައެއް." ސިޓީ ކައުންސިލްގެ މީޑިއާ އޮފިޝަލް ވިދާޅުވިއެވެ.

މިއާއެކު އޭނާ ވިދާޅުވީ، ކޮންމެހެން ގަސްކޮށައިދޭން ޖެހިގެން ނޫނީ ސިޓީ ކައުންސިލުން ގަސް ނުކޮށައިފޭ ކަމަށާ، އެކަން އެކައުންސިލުން ކުރަމުންދަނީ ވަކި ޚާއްސަ އުސޫލެއްގެ މަތިން ކަމަށެވެ.

އަމީނީ މަގު ހެދުމަށް ގަސް ކޮށާ މައްސަލައާއި ގުޅިގެން ރައީސް އޮފީހުގެ ތަރުޖަމާނު މިއުވާން މުހައްމަދު އިއްޔެ ވިދާޅުވީ، އަމީނީ މަގު ހެދުމަކީ ކޮންމެ ގޮތެއްގައި ވެސް ކުރަންޖެހިފައިވާ ކަމެއް ކަމަށެވެ. އެހެންކަމުން އެކަން ކުރުމަށް ގަސްތައް ކަނޑާލަން ޖެހޭ ކަމަށާ، އަދި އެގަސްތައް ކެނޑުމަށްފަހު އުކާލުމުގެ ބަދަލުގައި އެހެން ތަނެއްގައި ގަސްތައް އިންދުމުގެ މަސައްކަތް ވެސް ކުރިއަށްދާނެ ކަމަށް ވިދާޅުވިއެވެ. އަދި އެ މަގު ހަދައި ނިމުމަށްފަހު މަގު ފެހި ކުރުމުގެ މަސައްކަތް ވެސް ކުރިއަށްދާނެކަން އޭނާ ފާހަގަކުރެއްވިއެވެ.

ސަރުކާރުގެ ބަޖެޓުން 84 މިލިއަން ރުފިޔާ ހަރަދުކޮށްގެން އާރުޑީސީ އާއި އަމީނީ މަގުގެ މަސައްކަތް ހެދުމުގެ މަޝްރޫއު ހަވާލުކޮށްފައިވަނީ 210 ދުވަހުގެ ތެރޭގައި ނިންމާ ގޮތަށެވެ. މި މަޝްރޫއުގެ ދަށުން އަމީނީ މަގުގައި ތާރު އަޅާ ތަރައްގީ ކުރުމަށް ވަނީ ނިންމާފައެވެ.