ފޮނަދޫ އީސީގެ އޮފިޝަލެއް ދުރުކުރުމަށްފަހު، މައްސަލަޖެހުނު ފޮށީގެ ވޯޓުލުން ފަށަނީ!
ވޯޓު ކަރުދާހުގައި ފާހަގަޖެހި މައްސަލައާއި ގުޅިގެން އީސީގެ އޮފިޝަލް މަޤާމުގެ މަސްއޫލިއްތުން ދުރުކުރުމަށްފަހު ލ.ފޮނަދޫގެ އެ ވޯޓުލުން މެދުކެނޑުނު ވޯޓުވޮށީގެ ވޯޓުލުން އަލުން ފަށަން ތައްޔާރުވަމުން އަންނަ ކަމަށް އީސީން ވިދާޅުވެއްޖެއެވެ.
ފާހަގަ ޖަހައިފައި ވޯޓު ކަރުދާސް ދޫކުރުމުން ކަމަށްބުނެ ހަމަނުޖެހުން ހިނގުމާއި ގުޅިގެން ލ ފޮނަދޫގެ ތިން ނަންބަރު ވޯޓު ފޮށީގެ ވޯޓުލުން ވަނީ މެދުކެނޑިފަ އެވެ.
އެކަން ހާމަކުރައްވައި ފޮނަދޫ ދާއިރާގެ މެމްބަރު މޫސާ ސިރާޖް ވިދާޅުވެފައިވަނީ ފޮނަދޫގެ 3 ނަންބަރު ވޯޓު ފޮށީގައި ދޫކުރި 3 ކަރުދާހެއްގައި ކުރަހާފައިވާ މައްސަލައެއްވަނީ ފެންމަތި ވެފައި ވާކަމަށެވެ. އަދި މި 3 ކަރުދާސް ދޫކޮށްފައިވަނީ އިދިކޮޅަށް ވޯޓް ދޭނެ ކަން ޔަޤީންވާ ތިން ފަރާތަކަށް ކަމަށްވެސް ސިރާޖު ވިދާޅުވެފައިވެއެވެ.
މިކަމާއި ގުޅިގެން "ވޮއިސް" އަށް މައުލޫމާތު ދެއްވަމުން އީސީގެ ނައިބު ރައީސް އިސްމާއީލް ހަބީބް ވިދާޅުވީ, އެ ފޮށީގައި މައްސަލަ ޖެހުނީ ފޮށީގައި ހަރަކާތްތެރިވި އީސީގެ އޮފިޝަލަކާ ކަމަށާއި, އޭނާ އެ މަޤާމުގެ މަސްއޫލިއްޔަތުން ދުރުކޮށްފައިވާ ކަމަށެވެ.
އަދި މިހާރު ވޯޓްލުން މެދުކެނޑިފައި އޮތް ނަމަވެސް, ކުޑަ ވަގުތު ކޮޅެއްގެ ތެރޭގައި ވޯޓްލުން ފެށިގެންދާނެ ކަމަށްވެސް ހަބީބު ވިދާޅުވި އެވެ.
މިކަމާއި ގުޅިގެން ފުލުހުން ބުނީ، ލ. ފޮނަދޫގައި ވޯޓުލާ މަރުކަޒުގެ އޮފިޝަލަކު ވޯޓު ކަރުދާހުގައި ކުރަހާފައި ދޭކަމުގެ ޝަކުވާ ފުލުހުންނަށް ހުށަހަޅާފައިވާ ކަމަށެވެ. އަދި މިކަމާ ގުޅިގެން ބަލަންޖެހޭ ކަންކަން ފުލުހުން ދަނީ ބަލަމުން ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
