ވޯލްޑްކަޕުގެ ގްރޫޕް އޭ އިން ދެވަނަބުރަށް ނެދަލޭންޑްސް އާއި ސެނެގާލް

ފީފާ ވޯލްޑް ކަޕުގެ ގްރޫޕް އޭގެ ފަހު މެޗުތަކުން ހޯދި ނަތީޖާއާއެކު ގްރޫޕް އޭ އިން ދެވަނަބުރަށް ނެދަލޭންޑްސް އަދި ސެނެގާލް ދަތުރުކޮށްފިއެވެ.

މުބާރާތް ބާއްވާ ގަތަރު އަތުން ހޯދި މޮޅާއެކު ނެދަލަންޑްސްއިން ދެވަނަ ބުރަށް ދިޔައީ ގްރޫޕްގެ އެއްވަނަ ޓީމުގެ ގޮތުގައެވެ. ދެވަނަ ޓީމުގެ ގޮތުގައި ސެނެގާލް ދަތުރުކުރީ އެކުއެޑޯ ބަލިކޮށްގެންނެވެ.

މި ގްރޫޕުން ދެވަނަ ބުރުގެ ޖާގަ ގެއްލިފައި އޮތީ ގަތަރަށެވެ. އެކުއޭޑޯ ވަނީ ފުރަތަަމަ މެޗުގައި ނެދަލޭންޑް ހިފަހައްޓާފައެވެ. މޮޅުވުން މަޖުބޫރު މެޗަކުން އެ ޓީމު ބަލިވުމުން މުބާރާތުން އެކުއެޑޯ ކެޓީ ތިންވަނައިގައި އޮވެގެންނެވެ.

ޚަލީފާ އިންޓަނޭޝަނަލް ސްޓޭޑިއަމްގައ މެޗު އެކުއެޑޯ މައްޗަށް ސެނެގާލް ކުރިހޯދީ 2-1 ގެ ނަތީޖާއަކުންނެވެ. މި މެޗުގެ ފުރަތަމަ ހާފު ނިމުމުގެ ކުރިން ސެނެގާލުން ވަނީ ލަނޑު ޖަހާ ލީޑު ނަގައިފައެވެ. އިކުއެޑޯގެ އޭރިއާގެ ތެރެއިން ސެނެގާލުގެ އިސްމާއީލް ސާއަށް ކުރި ފައުލަކާއި ގުޅިގެން ލިބުނު ޕެނަލްޓީއަކުން މި ލަނޑު ޖަހާދިނީ ސާއެވެ.

މެޗުގެ ދެވަނަ ހާފުގައި އެކުއެޑޯއިން ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މެޗުގެ 67 ވަނަ މިނެޓުގައި އެކުއެޑޯއަށް ނަތީޖާ ހަމަހަމަކޮށްދިނީ މޮއިސެސް ކައިސޭޑޯއެވެ. އެކަމަކު އޭގެ ދެ މިނެޓު ފަހުން ސެނެގާލްގެ ކެޕްޓަން ކަލިޑޫ ކުލިބާލީ ވަނީ ލަނޑު ޖަހާ ސެނެގާލް މެޗުން މޮޅުކޮށްދީފައެވެ

ނެދަލަންޑްސް އާއި ގަތަރު ބައްދަލުކުރި މެޗު ނެދަލަންޑްސްއިން ކާމިޔާބުކުރީ 2-0 ގެ ނަތީޖާއަކުންނެވެ. ފުރަތަމަ ލަނޑު މެޗުގެ 26 ވަނަ މިނެޓުގައި އެ ޓީމަށް ކާމިޔާބުކޮށްދިނީ ކޯޑީ ގަކްޕޯއެވެ. ނެދަލަންޑްސްގެ ދެވަނަ ލަނޑު އެޓީމަށް ޖަހާދިނީ ފްރޭންކީ ޑި ޔޮންއެވެ.

މި ގްރޫޕްގެ އެއްވަނަ ހޯދައިގެން ނެދަލަންޑްސްއިން ދެވަނަ ބުރަށް ދަތުރުކުރީ ތިން މެޗުން ހޯދި ހަތް ޕޮއިންޓާއެކުގައެވެ. ދެވަނައިގައި އޮތް ސެނެގާލަށް ތިން މެޗުން ހަ ޕޮއިންޓް ލިބިފައިވާއިރު ތިންވަނައިގައި އެކުއެޑޯ ގްރޫޕް ސްޓޭޖު ނިންމާލީ ތިން މެޗުން ހަތަރު ޕޮއިންޓާއެކުގައެވެ. ފުލުގައި އޮތް މުބާރާތް ބާއްވާ ގައުމު ގަތަރަށް ތިން މެޗުން ޕޮއިންޓެއް ލިބިފައެއް ނުވެއެވެ.