ގަތަރަށް ފާޑުކިޔައި އާއްމު ކުރި ވީޑިއޯއަށް ދިން ވަރުގަދަ ރައްދާއެކު އެ ވީޑިއޯ ފޮހެލައިފި

އެމެރިކާގެ ފޮކްސް ނޫހުގައި މަސައްކަތް ކުރާ އަންހެން ކުޅިވަރު ނޫސްވެރިއެއް، ގަތަރަށް ފާޑުކިޔައި ޓިކްޓޮކްގައި އާއްމު ކުރި ވީޑިއޯއަށް އަރަބި ނޫހުގެ އަންހެން ނޫސްވެރިއެއް ދިން ވަރުގަދަ ރައްދާއެކު އެ ވީޑިއޯ ޓިކްޓޮކްއިން ފޮހެލައިފިއެވެ.

ޖެނީ ޓެފްޓު ނަމަކަށް ކިޔާ އެމެރިކާގެ އެ ނޫސްވެރިޔާގެ ފާޑުކިޔުން ގަތަރަށް އަމާޒުވީ، ވޯލްޑްކަޕް މެޗުތައް ކުޅޭ ސްޓޭޑިއަމް ތަކަށް ވަންނައިރު އަންހެނުންނާއި ފިރިހެނުން ވަންނަން ވަކި ދެ ގޭޓެއް ހުރެފައި، އަންހެނުން ފާސް ކުރަން އަންހެން ސެކިއުރިޓީ އަދި ފިރިހެނުން ފާސްކުރަން ފިރިހެން ސެކިއުރިޓީން ތިބޭތީއެވެ.

"އަހަރެންނަށް، ވަންނަން މި ޖެހުނީ ގަތަރުގައި އަންހެނުންނަށް ވަކިން ޚާއްސަކޮށްފައި ހުރި ގޭޓަކުން. އަހަރެން އެހާ ޚާއްސަކަމެއް އިހްސާސެއް ނުކުރެވޭ" މޫނަށް ވައްތަރެއް ޖައްސާލަމުން އެ ނޫސްވެރިޔާ ބުނެފައިވެއެވެ.

އެމެރިކާގެ މި ނޫސްވެރިޔާއަށް ރައްދުދީ 'އަރަބް ނިޔުސް' ގެ ނޫސްވެރިއެއް ކަމަށްވާ ލާމާ އަލްހަމަވީ އާއްމު ކުރި ޓިކްޓޮކް ވީޑިއޯއެއްގައި އޭނާ ވަނީ ނޫސްވެރިއެއްގެ ހައިސިއްޔަތުންނާއި، އަދި ވަރަށް ގިނަ ގައުމުތަކަށް ޒިޔާރަތް ކޮށްފައިހުރި މީހެއްގެ ހައިސިއްޔަތުން ޖެނީ ޓެފްޓު އަށް ނަސޭހަތެއް ދޭން ބޭނުން ކަމަށް ބުނެ އަންހެން ފިރިހެން ވަކި ގޭޓެއް ހުންނަ ސަބަބާއި، އަންހެނުން ފާސްކުރުމަށް އަންހެން ސެކިއުރިޓީން ތިބޭ ސަބަބު ސާފުކޮށްދީފައެވެ.

"ޚާއްސަ ގޭޓެއް ކަމަށް ޖެނީ ޓެފްޓް ތި ބުނި ގޭޓުގެ ވާހަކަ ދައްކާލަމާ. އެ ޚާއްސަ ގޭޓާއި ގުޅޭގޮތުން މައުލޫމާތު ދެންޏާ ބުނެލަން ޖެހޭނީ އެންމެ ބަހެއް. އެއީ އިހްތިރާމް ކުރުން. އެއީ އެހެން މީހުންގެ މިންތަކަށާއި، ހައްދު ތަކަށާއި، ގަބޫލުކުރުންތަކަށާއި, ދީނަށް ރެސްޕެކްޓް ކުރުން. އަންހެނަކު ބޭނުމެއް ނުވޭ އަންހެނުން ނޫން މީހެއް އޭނާ ފާސްކުރާކަށް. ފިރިހެނެއް ބޭނުމެއް ނުވޭ ފިރިހެނެއް ނޫން މީހަކު އޭނާ ފާސްކުރާކަށް." ލާމާ ބުނެފައިވެއެވެ.

ލާމާ އިތުރަށް ބުނީ އެފަދައިން ކަންކުރަނީ އަނެކާގެ ހައްދުތަކަށް އިހްތިރާމް ކޮށް، އޭނާ އެ ގައުމަކަށް ވަދެގެން އަންނައިރުވެސް އޭނާއަށް ހިތްހަމަޖެހުން ގެނުވާ ފަދަ ގޮތަކަށް މަރުހަބާ ކިޔަން ކަމަށެވެ. އަދި އެއީ އެއްވެސް ގޮތަކުން ތަފާތުކުރުންތައް ގެންގުޅުން ނޫންކަން ފާހަގަކޮށް ލާމާ ތަކުރާރުކޮށް ބުނީ، އެކަން ކިޔައިދޭން ބުނެލާނެ ހަމައެކަނި ބަހަކީ "އިހްތިރާމް" ކަމަށެވެ.

ލާމާ އާއްމު ކުރި މި ވީޑިއޯ އާއި އެކު ޖެނީ އަށް ގިނަ ބައެއްގެ ފާޑުކިޔުންތައް އަމާޒުވެފައި ވަނިކޮށް އޭނާ ވަނީ ގަތަރަށް ފާޑުކިޔައި ޓިކްޓޮކްއިން އާއްމު ކުރި ވީޑިއޯ ފޮހެލާފައެވެ.