ވ. އާރަށް މައްސަލަ: ދިފާއުން ބުނީ ކުށް ސާބިތުވާ ވަރަށް ދައުލަތަށް ހެކި ހުށަނޭޅޭކަމަށް!

އެމްއެމްޕީއާރުސީ މެދުވެރިކޮށް ވ އާރަށް ކުއްޔަށް ދޫކުރުމުގެ މުއާމަލާތާއި ގުޅުވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް ދައުލަތުން އުފުލާފައިވާ ދެ ދައުވާއާއު ގުޅޭ ޝަރީއަތުގެ އަޑުއެހުންތައް ނިންމާލާ، އެ މައްސަލައިގެ ޚުލާސާ ބަޔާން މިއަދު ވަނީ ދެފަރާތުންވެސް ހުށައަޅާފައެވެ.

އެ މައްސަލައިގައި ޚުލާސާ ބަޔާން އިއްވަމުން ދައުވާ ލިބޭ ކުރީގެ ރައީސް ޔާމީނާއި، ވެލިދޫ ދާއިރާގެ ކުރީގެ މެމްބަރު ޔޫސުފް ނައީމުގެ ފަރާތުންވެސް ވަނީ އެ މައްސަލައިގައި ދައުލަތުން އުފުލާފައިވާ ދައުވާތައް ސާބިތުކޮށްދިނުމަށް އެކަށީގެންވާ މިންވަރަށް ދައުލަތަށް ހެކި ހުށައެޅިފައި ނުވާކަން ބަޔާންކޮށްފައެވެ.

އެގޮތުން ޚުލާސާ ބަޔާން އިއްވަމުން ރައީސް ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލު އަހުމަދު ވިދާޅުވީ ވ އާރަށުގެ މުއާމަލާތަށް ރައީސް ޔާމީން ނުފޫޒު ފޯރުވިކަން ސާބިތުކުރެވޭ ހެއްކެއް ދައުލަތުން ހުށައަޅާފައި ނުވާކަމަށެވެ.

އެކަން ސާބިތުކޮށްދިނުމަށް ދައުލަތުގެ ހެކިންގެ ގޮތުގައި ހުށައަޅާފައިވާ ދެ ފަރާތަކީ (ކުރީގެ ނައިބުރައީސް އަހުމަދު އަދީބާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރ އަބްދުﷲ ޒިޔަތަކީ) އެމްއެމްޕީއާރުސީގެ ޚިޔާނާތުގެ ކުށް ސާބިތުވެފައިވާ ފަރާތްތަކެއްކަމަށް ވެފައި، ނުފޫޒު ފޯރުވިކަން ސާބިތުކޮށްދިނުމަށް ހުށައަޅާފައިވާ ހަމައެކަނި ހެއްކަކީ އެ ދެފަރާތްކަމަށް ވުމުން، އެ ހެކިންގެ ހެކި ބަހަކީ އިތުރު ހެކި ގަރީނާއާއި ނުލާ ބަލައިގަނެވޭނެ ދެ ފަރާތްކަމަށް ރާއްޖޭގެ ސުޕްރިމް ކޯޓުން ކަނޑައަޅާފައިވާތީވެ، އެމީހުންގެ ހެކިބަސް ބަލައި ނުގަނެވޭނެކަމަށް ޑރ ޖަމީލު ވަނީ ވިދާޅުވެފައެވެ.

ރައީސް ޔާމީންގެ ފަރާތްޕުޅުން ޚުލާސާ ބަޔާން އިއްވަމުން ޑރ ޖަމީލު އިތުރަށް ވިދާޅުވީ ދައުލަތުން ދައްކަމުންދާ ވާހަކަތަކީ ޚިޔާލީ ވާހަކަތަކެއް ކަމަށެވެ. އަދި ދައުލަތުން މަސައްކަތްކުރަނީ ވަކި ނަތީޖާތަކެއް ނެރެ ކޯޓަށް ވަކި މަންޒަރެއް ދެއްކުމަށްކަމަށް ވިދާޅުވިއެވެ.

އެ މައްސަލައާއި ގުޅިގެން ޔޫސުފް ނައީމުގެ ގާނޫނީ ވަކީލުންވެސް އެކަންކަން ފާހަގަކުރައްވާފައިވެއެވެ. އަދި ކުށް ސާބިތުކޮށްދެވޭވަރަށް ދައުލަތަށް ހެކި ހުށައެޅިފައި ނުވާކަމަށް ޔޫސުފް ނައީމުގެ ފަރާތްޕުޅުން ޚުލާސާ ބަޔާން އިއްވަމުން ގާނޫނީ ވަކީލު ވަނީ ވިދާޅުވެފައެވެ.

އޭގެ އިތުރުން ޔޫސުފް ނައީމް އަތްޕުޅުން ރައީސް ޔާމީން އެއްމިލިއަން ޑޮލަރު ބައްލަވައިގެންފައި ނުވާކަން ދައުލަތަށް ސާބިތުކޮށް ނުދެވޭކަންވެސް ޔޫސުފް ނައީމުގެ ގާނޫނީ ވަކީލު ފާހަގަކުރެއްވިއެވެ. އެނޫންވެސް މުހިންމު ގިނަ ނުގުތާތަކެއް ޔޫސުފް ނައީމުގެ ފަރާތްޕުޅުން ވަނީ ހުށައަޅުއްވާފައެވެ.

މިއަދުގެ އަޑުއެހުމުގައި ދެ ފަރާތުންވެސް ޚުލާސާ ބަޔާން އިއްވާފައިވާއިރު، ދެން އޮންނާއި މި މައްސަލައިގައި ހުކުމް އިއްވުމެވެ. ދައުލަތުގެ ފަރާތުން ވަނީ ރައީސް ޔާމިންގެ މައްޗަށް އުފުލާފައިވާ ދެ ދައުވާވެސް ސާބިތުވާކަމަށް ކަނޑައަޅާދިނުމަށް ކޯޓުގައި އެދިފައެވެ.

އެހެން ނަމަވެސް ދިފާއުން ބުނެފައިވަނީ ކުށް ސާބިތުވާވަރަށް ހެކި ގަރީނާ ދައުލަތަށް ދެއްކިފައި ނުވާކަމަށެވެ. އަދި މި މައްސަލައާއި ގުޅިގެން ދައުލަތުން އުފުލާފައިވާ ދައުވާތަކަށް، ދައުވާލިބޭ ދެ ފަރާތްވެސް ވަނީ އިންކާރުކޮށްފައެވެ.