ނަޢީމާ މަރާލި ކަމަށް ތުހުމަތުވާ މީހުންގެ މައްޗަށް ކުށް ސާބިތުވާ ވަރަށް ހެކި އެބަހުރި: ޕީޖީ

މިއަހަރުގެ އޭޕްރީލް މަހުގެ 7 ވަނަ ދުވަހު ނ. މަނަދޫގައި މަރުވެފައި އޮއްވައި ފެނުނު އެރަށު އަންނާރުމާގެ ނަޢީމާ މޫސާ، މަރާލިކަމަށް ތުހުމަތުކުރެވޭ މީހުންގެ މައްޗަށް ކުށް ސާބިތު ކުރެވޭ ވަރަށް ހެކި ހުރި ކަމަށް ޕްރޮސެކިއުޓަރ ޖެނެރެލް (ޕީޖީ) ހުސައިން ޝަމީމް ވިދާޅުވެއްޖެއެވެ.

ޕީޖީ އޮފީހުން ދައުވާ ކުރަން ހުށަހަޅާފައިވާ ބައެއް މައްސަލަ ތަކާއި ގުޅިގެން މަޢުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި، ނަޢީމާގެ މަރުގެ މައްސަލައާއި ގުޅިގެން މަޢުލޫމާތު ދެއްވަމުން ޝަމީމް ވިދާޅުވީ، އޭނާ މަރާލާފައިވާ ކަމަށް ބެލެވެނީ އޭޕްރިލް 6 ވަނަ ދުވަހުގެ ރޭ ދަންވަރު 1 އާއި 3:30 ދޭތެރޭގެ ވަގުތެއްގައި ކަމަށެވެ.

އަދި އެ މައްސަލައިގައި ތިން މީހެއްގެ މައްޗަށް ޕީޖީން ދައުވާ ކުރަން ނިންމައި މިއަދުގެ ވަގުތެއްގައި ކްރިމިނަލް ކޯޓަށް ހުށަހަޅުއްވާނެ ކަމަށް ޝަމީމް ވިދާޅުވި އެވެ.

އެގޮތުން ދަޢުވާ ކުރަން ނިންމާފައިވަނީ؛

1) ނ. މަނަދޫ، ފެހިވިލާގެ އަހުޒަމް އަބްދުއް ޝަކޫރު

2) ނ. މަނަދޫ، ރިފާސް, ޢަބްދުލް ވާހިދު ރިފާސް

3) ނ. މަނަދޫ، ވިލަރެސް، ހަސަން ފަވާޒް

އެ ތިން މީހުންގެ މައްޗަށް ކޮށްފައިވާ ދައުވާ ތަކަކީ؛

• ތޫނު އެއްޗެއް ބޭނުން ކޮށްގެން މީހަކު މެރުމުގެ ދައުވާ

• ޢަދުލު އިންސާފު ގާއިމް ކުރުމަށް ހުރަސް އެޅުން،

• މައްޔިތާގެ ބޭނުން ނަހަމަގޮތުގައި ބޭނުން ކުރުމުގެ ދައުވާ

ޝަމީމް ވިދާޅުވީ، ޢަދުލު އިންޞާފު ގާއިމް ކުރުމަށް ހުރަސް އެޅުމުގެ ދަޢުވާ އެމީހުންގެ މައްޗަށް ކޮށްފައިވަނީ ހެކި ނައްތާލަން މަސައްކަތް ކޮށްފައިވާތީ ކަމަށް ޝަމީމް ވިދާޅުވި އެވެ. އެގޮތުން، އެމީހުން ވަނީ، ނ. މަނަދޫ ނާމަގު ސަރަހައްދަށް ގޮސް، އެތަނުގައި ވަޅެއް ކޮނުމަށްފަހު، ނަޢީމާ މަރާލަން ބޭނުން ކުރި ވަޅިއާއި އެހެނިހެން ތަކެތި އަންދައި ނައްތާލާފައި ކަމަށް ޝަމީމް ވިދާޅުވި އެވެ.

އެ ވަޅުގައި ތަކެތި އަންދާލުމަށްފަހު ފަސްއަޅާ ފޮރުވާފައިވަނިކޮށް، ފުލުހުން ވަނީ ކޮނެގެން އެތަކެތި ނަގާފައެވެ.

މީގެ އިތުރުން މައްޔިތާގެ ބޭނުން ނަހަމަގޮތުގައި ބޭނުން ކުރުމުގެ ދައުވާ އެމީހުންގެ މައްޗަށް ކުރަނީ، ނަޢީމާ މަރާލުމަށްފަހު، އެގޭގެ ދޮރުގައި ތަޅުލާފައި ދިޔުމުން ކަމަށާ، އޭގެ ސަބަބުން ނަޢީމާ މަރުވެގެން އުޅޭކަން ޢާއިލާއަށް އެނގިފައިވަނީ އެ ކަން ހިނގިތާ 40 ގަޑިއިރު ފަހުން ކަމަށް ޕީޖީ ޝަމީމް ވިދާޅުވި އެވެ.

ޕީޖީ ޝަމީމް ވިދާޅުވީ، އެ ތިން މީހުންގެ މައްޗަށް ދައުވާ ކުރާ ސަބަބުތަކާއި އެނޫން ކަންކަން ޝަރީޢަތުގެ މަޖިލީހުގައި ހާމަކުރައްވަމުން ގެންދަވާނެ ކަމަށެވެ. އަދި އެމީހުންގެ މައްޗަށް ކުށް ސާބިތު ކުރެވޭ މިންވަރަށް ހެކި ލިބިފައިވާ ކަމަށްވެސް އޭނާ ވިދާޅުވި އެވެ.

"އަޅުގަނޑުމެންނަށް މިހާތަނަށް ލިބިފައިވާ މަޢުލޫމާތު ތަކުން، ސައިންޓިފިކް އެވިޑެންސް ލިބިފައި އެބަހުރި، ޑީއެންއޭ ލިބިފައި އެބަހުރި، އަދި އެހެން ކަހަލަ ހެކިވެސް ލިބިފައި އެބަހުރި. އެހެންވީމާ އެ ހެކި ތަކުގެ މައްޗަށް މި ތިން ދައުވާވެސް އަޅުގަނޑުމެންނަށް ސާބިތު ކުރެވިދާނެ ކަމަށް އަޅުގަނޑުމެން ގަބޫލު ކުރަނީ."

ޕީޖީ ހުސައިން ޝަމީމް

ނަޢީމާގެ މަރުގެ މައްސަލާގައި ފުލުހުންގެ ޓީމުން ޚާއްސަ ތަހުގީގެއް އެ ރަށުގައި ހިންގާފައިވާ އިރު، އެ ގެއަށް އާއްމުކޮށް ވަދެ އުޅޭ މީހުންގެ އިނގިލީގެ ނިޝާން ނަގައި، ކާރެއްވެސް ފުލުހުންގެ ބެލުމުގެ ދަށަށް ގެންގޮސްފައިވެއެވެ.