"ހަރާމް ހުކުމް" އިހްތިޖާޖް އަމާން ކަމާއި އެކު ނިންމާލައިފި
ވ. އާރަށު މައްސަލާގައި އިދިކޮޅު އިއްތިހާދުގެ ލީޑަރު ރައީސް ޔާމީނުގެ މައްޗަށް ކުރި 2 ދައުވާ ސާބިތުވާކަމަށް ކަނޑައަޅައި އެމަނިކުފާނު 11 އަހަރަށް ޖަލަށްލާފައިވާތީ އެމަނިކުފާނު މިނިވަންކުރަން ގޮވައިލާ މިއަދު ބޭއްވި ސުލްޙަވެރި އިހްތިޖާޖް އަމާން ކަމާއި އެކުގައި ނިންމާލައިފި އެވެ.
އިދިކޮޅު ޕީޕީއެމްގެ އޮފީސް ކުރިމަތިން ފެށި މި ހިނގާލުމުގައި ގިނަ އަދަދެއްގެ ބަޔަކު ބައިވެރިވެފައިވާއިރު އެ އެންމެންވެސް ވަނީ ރައީސް ޔާމީން މިނިވަންކުރުމަށް ގޮވާލައި އަޑު އުފުލާފައެވެ.
އެގޮތުން މިހިނގާލުމުގައި ވާހަކަ ދައްކަވަމުން އަދުރޭ ވަނީ، ރައީސް ޔާމީނަށް މި ރާއްޖޭގައި އޮތް ތާއީދު މިއަދުގެ ހިނގާލުމުން ފެނިގެންދާނެ ކަމަށާއި އެމަނިކުފާނު ޖަލަށް ލާފައިވަނީ އަންނަ އަހަރު ބާއްވާ ރިޔާސީ އިންތިހާބަށް ފުރުސަތު ނުދެއްވަން ކަމަށެވެ. ނަމަވެސް، ދިވެހިން ތިބީ ދޫދޭ ގޮތަކަށް ނޫން ކަމަށާއި އެމަނިކުފާނުގެ ނަން ނެތި އިންތިހާބު ނުބޭއްވޭނެ ކަމަށް އަދުރޭ ވިދާޅުވިއެވެ.
"ދިވެހިން ބުނީ ޔާމީންގެ ނަން ނެތި ރިޔާސީ އިންތިހާބު ބާއްވަން ފުރުސަތު ނުދޭނަމޭ" އަދުރޭ ވިދާޅުވިއެވެ.
މާލޭގެ އިތުރުން ރާއްޖޭގެ ބައެއް އެހެން ރަށްތަކުގައިވެސް މިއަދު ރައީސް ޔާމީން މިނިވަންކުރުމަށް ގޮވާލައި އިހުތިޖާޖު ކޮށްފައިވެއެވެ.
ރައީސް ޔާމީން މިނިވަންކޮށް އެމަނިކުފާނު އަނބުރާ ވެރިކަމަށް ގެނައުމަށް އިދިކޮޅުގެ ޖޮއިންޓް ސެނެޓުން ވަނީ ފާސްކޮށްފައެވެ. އަދި އެމަނިކުފާނަށް އިންސާފު ހޯދުމަށް ކުރަން ހުރި ހުރިހާ މަސައްކަތެއް ޕާޓީގެ އެކި ގުނަވަންތަކުން ކުރިއަށް ގެންދާނެކަމުގެ ޔަގީންކަންވެސް އިދިކޮޅުން ވަނީ ދީފައެވެ.
އެގޮތުން، ރައީސް ޔާމީން ޖަލަށް ލީ ދުވަހުން ފެށިގެން ސިލްސިލާކޮށް ކޮންމެ ރެއަކުވެސް އިދިކޮޅުން އަންނަނީ މާލެގެ މަގުމަތީގައި އިހްތިޖާޖް ކުރަމުންނެވެ. މި އިހްތިޖާޖް ގެ ތެރެއިން ކޮންމެ ރެއަކުވެސް ގިނަ އަދަދެއްގެ މީހުން ފުލުހުންގެ ބެލުމުގެ ދަށަށް ގެންދެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
