ރެއާލް އާއެކު ހަދާފައިވާ އެއްބަސްވުން ކޯޗް އެންޗެލޯޓީ އާކޮށްފި

ބުރެޒިލްގެ ޤައުމީ ޓީމާއި ހަވާލުވާނެ ކަމުގެ އަޑުތައް ފެތުރިފައިވާ ސްޕެއިންގެ މަޝްޙޫރު ޓީމް، ރެއާލް މެޑްރިޑްގެ ކޯޗް ކާލޯ އެންޗެލޯޓީ އެ ޓީމާއެކު ހަދައިފައިވާ އެއްބަސްވުން އާކޮށްފިއެވެ.

މިހާރު އުމުރުން 64 އަހަރު ގުނަމުން ގެންދާ އިޓަލީ ވިލާތައް ނިސްބަތްވާ އެންޗެލޯޓީ އަލަށް މި ހެދި އެއްބަސްވުމުގެ ދަށުން 2026 ވަނަ އަހަރުގެ ޖުލައި މަހުގެ ނިޔަލަށް ރެއާލް މެޑްރިޑްގެ ކޯޗް ގެ ގޮތުގައި ދެމި ހުންނާނެއެވެ.

ތިން އަހަރު ދުވަހުގެ އެގުރިމެންޓަކާއި އެކު އެންޗެލޯޓީ ދެވަނަ ފަހަރަށް ރެއަލް މެޑްރިޑްގެ ކޯޗުކަމާއި ހަވާލުވެފައިވަނި 2021 ވަނަ އަހަރެވެ.

ކޯޗް އެންޗެލޯޓީ ފާހަގަ ކުރެވިފައިވަނީ ދުނިޔޭގެ ނިސްބަތުންވެސް މޮޅު ކާމިޔާބު ކޯޗެއްގެ ގޮތުގައެވެ. އެގޮތުން އޭނާވަނީ ޗެމްޕިއަންސް ލީގުގެ ތަށި ހަތަރު ފަހަރު ހޯދުމުގެ އިތުރުން، ޔޫރަޕްގެ އެންމެ ބޮޑު ފަސް ލީގު ތަށި އުފުލާލުމުގެ ޝަރަފުވެސް ހޯދާފައެވެ.

ކޯޗް އެންޗެލޯޓީ ވަނީ ރެއާލް މެޑްރިޑާއި އެކުވެސް ގިނަ ކާމިޔާބީތަކެއް ހާސިލްކޮށްފައެވެ.

އެގޮތުން އެޓީމާއިއެކު މިހާތަނަށް  10 ތަށި ކާމިޔާބުކޮށްފައިވެއެވެ. އޭގެ ތެރޭގައި ޗެމްޕިއަންސް ލީގު ދެ ފަހަރު ކާމިޔާބުކުރުމާއި ލަލީލާގެ ތަށި އެއް ފަހަރު ކާމިޔާބު ކުރުމުގެ އިތުރުން ކޮޕާ ޑެލް ރޭގެ ތަށި ދެ ފަހަރު ކާމިޔާބުކުރުން ހިމެނެއެވެ.

މީގެ އިތުރުން ކްލަބް ވޯލްޑް ކަޕްގެ ތަށި ދެ ފަހަރު ކާމިޔާބުކުރުމާއި، ޔޫރަޕިއަން ސުޕާ ކަޕް ދެފަހަރު ހޯދުމާއި، ސްޕެނިޝް ސުޕާ ކަޕް އެއް ފަހަރު ކާމިޔާބުކުރުން ހިމެނެއެވެ.

މީގެ ކުރިންވެސް އެންޗެލޯޓީ ވަނީ 2013 އިން 2015 ވަނަ އަހަރާ ދެމެދު ރެއާލަށް ކޯޗުކޮށްދީފައެވެ.

ދެވަނަ ފަހަރަށް އެންޗެލޯޓީ 2021 ވަނަ އަހަރު ރެއާލް މެޑްރިޑާއި ހަވާލުވެފައިވަނީ ކުރިން އެ މަޤާމުގައި ހުރި ޒައިނުއްދީން ޒިދާން މަޤާމުން އިސްތިއުފާދިނުމާއި ގުޅިގެންނެވެ.