އިންޑޮނީޝިޔާގެ ސުމަޓުރާގެ ކަނޑުގެ ސަރަހައްދަށް ބާރުގަދަ ބިންހެލުމެއް އަތުވެއްޖެ

އިންޑޮނީޝިއާގެ ސުމަޓުރާ ކަނޑުގެ ސަރަހައްދަށް ރިކްޓާ މިންގަނޑުން 6.6 ގެ ބާރު މިނުގައި މިއަދު ބިންހެލުމެއް އަތުވެއްޖެ އެވެ.

މި ބިންހެލުމާއި ގުޅިގެން އަދި މިހާތަނަށް ސުނާމީއެއްގެ އިންޒާރެއް ނެތް ނަމަވެސް ، އަޅުގަނޑުމެންގެ އަވަށްޓެރި ސްރީލަންކާގެ އައްސޭރި ފަށުގައި ދިރިއުޅޭ ފަރާތްތަކުން ރައްކާތެރިކަމުގެ ފިޔަވަޅު އެޅުމަށް އެޤައުމުގެ މޫސުމާއި ބެހޭ ޢިދާރާއިން މިހާރުވަނީ އެ ޤައުމުގެ ރައްޔިތުންނަށް އަންގާފައެވެ.

މި ދުވަސްވަރަކީ ގިނައަދަދަކަށް މި ސަރަހައްދަށް ބިންހެލުންތައް އަންނަ ދުވަސްވަރަކަށް ވާއިރު ދާދި ފަހުންވެސް ވަނީ އިންޑިޔާ ސަރަހައްދަށް (ރާއްޖޭގެ ދެކުނު ސަރަހައްދަށް ) ފުލްފުލުގައި 4 ބިންހެލުމެއް އައިސްފައެވެ.  ނަމަވެސް މިއިން އެއްވެސް ބިންހެލުމުގެ އަސަރެއް ރާއްޖެއަށް ނުކުރާ ކަމަށް މެޓް އޮފީހުން މަޢުލޫމާތުދެއެވެ.

މިއަދު ސުމަޓުރާ ސަރަހައްދަށް މިއައި ބިން ހެލުމާއި ގުޅޭގޮތުން ރާއްޖޭގެ މޫސުމާއި ބެހޭ ޢިދާރާއިން ބުނެފައި ވަނީ މި ބިންހެލުމުގެ ސަބަބުން ރާއްޖެއަށް ބިންހެލުމުގެ އަސަރެއް އަދި ސުނާމީއެއްގެ އަސަރެއްވެސް ކުރާނެކަމަށް ލަފާ ނުކުރެއްވޭ ކަމަށެވެ.

މިދުވަސް ވަރަކީ މުޅި ރާއްޖެއަށް ވެސް މޫސުން ވަރަށް ގޯސް ދުވަސްވަރަކަށް ވުމާއިއެކު ކަނޑު އުޅަދު ދުއްވާ  ފަރާތްތަކުން މިކަމަށް ސަމާލުވުމަށް މޫސުމާއި ބެހޭ ޢިދާރާއިން އިލްތިމާސްކުރައްވައެވެ.