ވޯލްޑްކަޕާ ގުޅިގެން މޯލްޑިވްސް ޕޯސްޓުގެ އީއެމްއެސްއިން ޚާއްޞަ ޕްރޮމޯޝަނެއް ފަށައިފި

ފީފާ ވޯލްޑްކަޕް 2026 އާ ގުޅިގެން މޯލްޑިވްސް ޕޯސްޓުގެ އެކްސްޕްރެސް މެއިލް ސަރވިސް (އީއެމްއެސް) އިން ރާއްޖެއިން ބޭރަށް ފޮނުވާ ކޮންމެ ޝިޕްމަންޓަކުން 26 އިންސައްތައިގެ ޑިސްކައުންޓެއް ލިބޭ ޚާއްޞަ ޕްރޮމޯޝަނެއް ފަށައިފިއެވެ.

މި ޕްރޮމޯޝަން ކުރިއަށްދާނީ 19 ޖުލައި 2026 ގެ ނިޔަލަށެވެ. އީއެމްއެސް އަކީ ދުނިޔޭގެ 177 ޤައުމަކަށް 3 ދުވަހާއި 5 ރަސްމީ ދުވަހުގެ ތެރޭގައި ތަކެތި ޑެލިވަރީ ކޮށްދޭ ޚިދުމަތެކެވެ. މި ޚިދުމަތް މޯލްޑިވްސް ޕޯސްޓުގެ ކޮންމެ އައުޓްލެޓަކުން ވެސް ލިބޭނެ ކަމަށް އެ ކުންފުނިން ބުނެފައިވެއެވެ. އަދި މޯލްޑިވްސް ޕޯސްޓުގެ ވެބްސައިޓުގައިވާ "ޕޯސްޓޭޖް ކަލްކިއުލޭޓަރ" މެދުވެރިކޮށް ތަކެތި ފޮނުވުމުގެ އަގު ބަލައިލެވޭނެއެވެ.

ޑިސްކައުންޓް ޕްރޮމޯޝަނުގެ އިތުރުން މޯލްޑިވްސް ޕޯސްޓުގެ ފޭސްބުކް އަދި އިންސްޓާގްރާމްގައި ސްކޯ ޕްރިޑިކްޝަން އިވެންޓެއް ވެސް ކުރިއަށްގެންދާނެ ކަމަށް އެ ކުންފުނިން ހާމަކޮށްފައިވެއެވެ.

މި އިވެންޓުގައި ބައިވެރިވުމަށް ކޮންމެ މެޗެއްގެ ދެވަނަ ހާފް ފެށުމުގެ ކުރިން މޯލްޑިވްސް ޕޯސްޓުގެ ސޯޝަލް މީޑިއާގައި ހިއްސާކޮށްފައިވާ އެ މެޗަކަށް ޚާއްޞަ ޕޯސްޓުގައި ސްކޯ ޕްރިޑިކްޝަން ކޮމެންޓުކުރަން ޖެހޭނެއެވެ. ދެވަނަ ހާފް ފެށުމުގެ ފަހުން ކުރާ ކޮމެންޓުތަކާއި އޮރިޖިނަލް ކޮމެންޓު އެޑިޓުކޮށްފައިވާ ނަމަ އެ ކޮމެންޓު ބާޠިލުވާނެއެވެ.

އެންމެ ގިނައިން ސްކޯ ދިމާކުރާ ފަރާތްތަކަށް އަގުހުރި ހަދިޔާތަކެއް ދިނުމަށް ހަމަޖެހިފައިވާ ކަމަށް މޯލްޑިވްސް ޕޯސްޓުން ބުނެފައިވެއެވެ. އެގޮތުން ސްޓޭޖް އެކެއްގެ ނަސީބުވެރިޔަކަށް ޕޯޗުގަލް ޖާޒީއެއް ދެވަނަ ސްޓޭޖުގެ ނަސީބުވެރިޔަކަށް ފްރާންސް ޖާޒީއެއް އަދި މުޅި އިވެންޓުގެ ނަސީބުވެރިޔަކަށް ފީފާ ވޯލްޑްކަޕް ހިސްޓޮރީ ބޯލް ސެޓަކާއި 20 ކިލޯގެ އީއެމްއެސް ވައުޗަރެއް ލިބޭނެއެވެ.