ޖޭޕީގެ ކޮންގްރެސް މިފެށޭ ފެބްރުއަރީ މަހު މާލޭގައި

ޖުމްހޫރީ ޕާޓީގެ ކޮންގްރެސް ކުރިއަށް އޮތް ފެބްރުއަރީ މަހުގެ ފަހު ހަފްތާގައި ބޭއްވުމަށް އެ ޕާޓީން ނިންމައިފި އެވެ.

"ވޮއިސް" އަށް މައުލޫމާތު ދެއްވަމުން ޖޭޕީގެ ޗީފް ސްޕޯކްސްޕާސަން އަލީ ސޯލިހް ވިދާޅުވީ އެ ޕާޓީގެ ކޮންގްރެސް މި ފެށޭ ފެބްރުއަރީ މަހުގެ ފަހު ހަފްތާގައި ކުރިއަށް ގެންދިޔުމަށް ނިންމާފައިވާ ކަމަށެވެ. އެގޮތުން، މިހާރު ކުރިއަށް ދަނީ ކޮންގްރެސް ބޭއްވުމަށް އިދާރީގޮތުން ވާންޖެހޭ ތައްޔާރީތައް ވުމުގެ މަސައްކަތް ކަމަށާ، އޭގެތެރޭގައި ކޮންގްރެސް ބޭއްވުމަށް ކަނޑައަޅާފައިވާ ތަން، ދަރުބާރުގެ ތައްޔާރު ކުރުމުގެ މަސައްކަތާއި، އެހެނިހެން އިދާރީ ކަންކަން ކުރުން ހިމެނޭކަމަށެވެ.

ގާތް ގަޑަކަށް 500 އެއްހާ ޖޭޕީގެ މެންބަރުންނާއި އެކު ދެދުވަހުގެ މުއްދަތަށް ކުރިއަށްދާ މި ކޮންގްރެސްގެ ތެރެއިން މުހިންމު ދެކަމެއް ކުރުމަށް ނިންމާފައިވާ ކަމަށް އަލީ ވިދާޅުވި އެވެ. އެއީ:

1) ޖުމްހޫރީ ޕާޓީގެ އަސާސީ ގަވައިދަށް ބަދަލެއް ގެންނަންޖެހޭ ނަމަ އެކަން ކުރިއަށް ގެންދިޔުން

2) އައު ކައުންސިލަަށާއި މަގާމުތަކަށް މެންބަރުން ހޮވުން. އަންނަ ފެބްރުއަރީގައި ޕާޓީގެ ކައުންސިލްގައި ހިމެނޭ މެންބަރުންނާއި، އެނޫންވެސް މަގާމު ތަކުގައި މިހާރު ތިބި މެންބަރުންގެ ދައުރު ހަމަވާނެއެވެ.

މިއާއެކު އަލީ ވިދާޅުވީ, ކޮންގްރެސްގައި ހޮވާ އާ ކައުންސިލްގެ ފުރަތަމަ ޒިންމާ އަކަށް ވާނީ ކުރިއަށް އޮތް ރިޔާސީ އިންތިހާބާ މެދު ޕާޓީން ނިންމާ ގޮތްތަކެއް ނިންމުން ކަމަށާއި، އެކަން އެ ކޮންގްރެސްގެ ތެރެއިން ނުވަތަ ކޮންގްރެސް ނިމުމަށްފަހު ވަރަށް އަވަހަށް ކުރެވޭނެ ކަމަށެވެ.

"އައު ކައުންސިލްގެ މެންބަރުންގެ އެންމެ ފުރަތަަމަ ޒިންމާ އަކަށް ވާނީ ރިޔާސީ އިންތިޚާބާއި މެދު ގޮތެއް ނިންމުން. އިންތިޚާބުގައި ޖޭޕީގެ ކެންޑިޑޭޓެއް ނެރޭނީތޯ ނުވަތަ ނޫންތޯވެސް ކަނޑައަޅާނީ އެ ކައުންސިލުން." އަލީ ވިދާޅުވި އެވެ.

ޖުމްހޫރީ ޕާޓީގެ އަސާސީ ގަވައިދު މިހާރު އޮންނަ ގޮތުން އެ ޕާޓީގެ ރިޔާސީ ކެންޑިޑޭޓަކީ ޕާޓީގެ ލީޑަރެވެ. މިވަގުތު އެ މަގާމުގައި ހުންނެވީ ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ގާސިމް އިބްރަހީމް އެވެ. މިދިޔަ އަހަރު ބޭއްވި ޖުމްހޫރީ ޕާޓީގެ ޖަލްސާއެއްގައި ވާހަކަ ދައްވަމުން އެމަނިކުފާނު ވަނީ ޖުމްހޫރީ ޕާޓީގެ ފަރާތުން 2023 ގެ ރިޔާސީ އިންތިޚާބުގައި ކެންޑިޑޭޓެއް ނެރޭނެ ކަމުގެ އިޝާރާތެއް ދެއްވާފައެވެ.

ރާއްޖޭގައި މިހާތަނަށް ގިނަ ޕާޓީތަކަކުން ބައިވެރިވާ ގޮތަށް ބޭއްވި ރިޔާސީ އިންތިޚާބު ތަކުގެ ތެރެއިން ޖުމްހޫރީ ޕާޓީގެ ފަރާތުން ގާސިމް އިބްރާހިމް ވާދަނުކުރައްވަނީ ހަމައެކަނި 2018 ވަނަ އަހަރުގެ އިންތިޚާބުގައެވެ. އޭގެކުރިން 2008 ވަނަ އަހަރު އާއި 2013 ވަނަ އަހަރުގެ ރިޔާސީ އިންތިޚާބުގެ ފުރަތަމަ ބުރުގައި ޖޭޕީގެ ކެންޑިޑޭޓެއްގެ ގޮތުގައި ގާސިމް ވާދަކުރެއްވިއެވެ.

2018 ވަނަ އަހަރުގެ ރިޔާސީ އިންތިޚާބުގައި ގާސިމް އިބްރާހިމް ވާދަ ނުކުރެއްވި ނަމަވެސް އިންތިޚާބު ކާމިޔާބު ކޮށް، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙްގެ ސަރުކާރުން ކުރިއަށްދަނީ ޖުމްހޫރީ ޕާޓީގެ ހިއްސާ އާއި އެކުއެވެ. އެގޮތުން ރާއްޖޭގެ ރައީސުލްޖުމްހޫރިއްޔާގެ ނައިބުގެ މަގާމާއި، ކެބިނެޓުގައިވެސް ޖޭޕީ ތަމްސީލް ކުރައްވާ އެކި ފަރާތްތައް ތިއްބެވިއިރު މިނިސްޓްރީ ތަކުގެ އިސް މަގާމުތަކުގައިވެސް ޖުމްހޫރީ ޕާޓީ ތަމްސީލް ކުރައްވާ އެކި ފަރާތްތައް އެބަ ތިއްބެވިއެވެ.