އިންޑިއާ ގައި ދިވެއްސަކު ގެއްލިގެން ހޯދަނީ

އިންޑިޔާގެ ކޮޗިން އަށް ޑޮކްޓަރަށް ދެއްކުމަށް ދިޔަ މީހަކު ގެއްލިގެން އޭނާ ހޯދުމުގެ މަސައްކަތް ޢާއިލާއިން ފަށައިފިއެވެ.

ގެއްލިގެން ހޯދަމުންދަނީ ކ. ތުލުސްދޫ، ފަރިޝްތާ, މުހައްމަދު މަހުދީ (35 އަހަރު) އެވެ. އޭނާ ގެއްލިފައިވަނީ މިއަދު ހެނދުނު 9:00 ހާއިރު އަމްރިތާ ހޮސްޕިޓަލް ކައިރިންނެވެ.

ގެއްލިގެން ހޯދަމުންދާ މަހުދީގެ އާއިލާއިން "ވޮއިސް" އަށް މައުލޫމާތު ދިން ގޮތުގައި އޭނާ އަކީ ބައިޕޯލާ ޑިސްއޯޑާ ވަރަށް ބޮޑަށް ހުންނަ މީހެކެވެ. އަދި ފަހަކަށް އައިސް އެ މައްސަލަ ވަރަށް ބޮޑުވުމުގެ ސަބަބުން، އެކަމަށް ފަރުވާ ކުރުމަށް އިންޑިއާ އަށް ދިޔުމަށް ޑޮކްޓަރުން ލަފާދެއްވި ކަމަށެވެ.

އެހެން ކަމުން އާސަންދަ އާއި ހުރިހާ ކަމެއް ހަމަޖެއްސުމަށްފަހު، އިންޑިއާ އަށް ގޮސްފައިވާއިރު، މިއަދު ހެނދުނު އަމްރިތާ ހޮސްޕިޓަލްގައި ހުންނަ ޑޮކްޓަރ އަށް ދެއްކުމަށް އޭނާ ގެންގޮސްފައިވާ ކަމަށްވެސް އާއިލާއިން މައުލޫމާތު ދެއެވެ.

އެހެންނަމަވެސް، މަހުދީގެ ބަލީގެ ގޮތުން އޭނާ އަކީ ކުއްލި ކުއްލި އަށް ރުޅިއައިސް "ވައިލެންޓް" ކޮށް އުޅޭ މީހަކަށްވާއިރު، ޑޮކްޓަރ އަށް ދައްކަން ގޮސްވެސް އެތަނުގެ އެތެރޭގައި އެފަދަ ކަންކަން ހިނގާފައިވާ ކަމަށާ، އެއަށްފަހު ރުޅިއައިސް ހުރެ އޭނާ ހޮސްޕިޓަލުން ނުކުމެގެން ގޮސްފައިވާ ކަމަށް އާއިލާ އިން ބުނެއެވެ.

އަދި އެ ނުކުމެގެން ދިޔަ ފަހުން އޭނާ އަދިވެސް ފެނިފައިނުވާއިރު، އެ މައްސަލަ އިންޑިޔާގެ ފުލުހުންނާއި، ދިވެހި ފުލުހުން، އަދި އިންޑިއަން ހައިކޮމިޝަނާއި މިނިސްޓްރީ އޮފް ފޮރިން އެފެއާޒް އަށްވެސް ހުށަހަޅާފައިވާ ކަމަށް އާއިލާއިން ބުނެއެވެ.

މީގެ އިތުރުން މަހުދީއާއި ގުޅޭ އެއްވެސް މައުލޫމާތެއް ލިބިފައިވާ މީހެއް ވާނަމަ، 7889180, ނުވަތަ 7971667 ގުޅުމަށް އެ އާއިލާ އިން އެދެއެވެ.