އުއްޗުގެ ތާއީދު ރައީސް ޞާލިހަށް!
މި އަހަރުގެ ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހަށް ތާއީދު ކުރައްވަން މަޝްހޫރު ވިޔަފާރިވެރިޔާ މުހައްމަދު މޫސާ (އުއްޗު) ނިންމަވައިފިއެވެ.
އުއްޗު ރައީސް ޞާލިހަށް ތާއީދު ކުރައްވާކަން އިޢުލާން ކުރައްވާފައިވަނީ އޭނާގެ ރިސޯޓް ޗަމްޕާ ގިރީގައި މިއަދު ބޭއްވުނު ޚާއްސަ ރޯދަވީއްލުމުގެ ތެރެއިންނެވެ.
މި ރޯދަ ވީއްލުމަށް ޗަމްޕާ ގިރި އަށް ރައީސް ސޯލިހު ވަޑައިގަތުމުން މަރުހަބާ ދެންނެވީ އުއްޗު އެވެ. އަދި މި ރޯދަވީއްލުމުގެ ކުރިން އުއްޗު ވަނީ "އިބޫ 23" ޖަހާފައިވާ ޖާޒީއެއް ރައީސް ޞާލިހަށް އަރުވައިފަ އެވެ.
ރައީސްގެ ދެކަނބަލުންނަށް ދެއްވި ރޯދަވީއްލުމުގައި އުއްޗުގެ އަނބިކަނބަލުންނާއި އާއިލާގެ ބައެއް ބޭފުޅުންގެ އިތުރުން ބައެއް ވަޒީރުންނާއި ރައްޔިތުންގެ މަޖިލިހުގެ ރައީސް ޞާލިހަށް ތާއީދު ކުރައްވާ ބައެއް މެމްބަރުންވެސް ބައިވެރިވެވަޑައިގަތެވެ.
ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިހާބުގައި ރައީސް ޞާލިހު ވާދަކުރައްވަން ނިންމަވާފައި ވަނިކޮށް، ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ފަރާތުން އެ ޕާޓީގެ ލީޑަރު ގާސިމް އިބްރާހިމް އިންތިހާބުގައި ވާދަކުރައްވަން ވަނީ ނިންމަވައިފަ އެވެ.
އަދި ސަރުކާރު ކޯލިޝަންގައި އޮތް އެމްއާރުއެމް ވަކި ގޮތެއް އަދި ނުނިންމަ އެވެ.
މީގެ އިތުރުން ރިޔާސީ ޕްރައިމަރީއަށްފަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވަނީ ރައީސް ޞާލިހަށް ތާއީދު ނުކުރައްވަން ނިންމަވައި، "ފިކުރެއްގެ ދިރުން"ގެ ނަމުގައި ވަކި ހަރަކާތެއް ފަށްޓަވައިފަ އެވެ. އެ ގޮފީގެ މެންބަރުން އަންނަނީ ޖުމްހޫރީ ޕާޓީއާ އެކު ގިނަ މަޝްވަރާތައް ބާއްވަމުންނެވެ.
ރައީސް ޞާލިހަށް މިވަގުތު ތާއީދު ކުރަނީ އަދާލަތު ޕާޓީ އަދި އެމްޑީއޭއެވެ. އެހެންކަމުން، ބޮޑު ޕާޓީ އެއް ރައީސް ޞާލިހާއި އެކު ނެތުމުން ރިޔާސީ އިންތިހާބު އެމަނިކުފާނަށް ކާމިޔާބު ނުކުރެއްވޭނެ ކަމަށް ރައީސް ނަޝީދުގެ ފެކްޝަނުގެ މެންބަރުން އަންނަނީ ބުނަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
