އިތުބާރު ނެތްކަމުގެ މައްސަލައަށް ލިޔުމުން ޖަވާބުދާރީވުމުން ކަންކުރާނެ ގޮތާމެދު ޚިޔާލުތަފާތުވެ މަޖިލީސް މެދުކަނޑާލައިފި
ބަންޑާރަ ނައިބު އިބްރާހީމް ރިއްފަތުގެ އިތުބާރު ނެތްކަމުގެ މައްސަލައިގައި، މަޖިލީހަށް ހާޒިރުވެ ވަޑައިގެން ޖަވާބުދާރީ ވުމަށް އާއްމު ކޮމިޓީން ނިންމާފައިވަނިކޮށް، ވަޒީރު ލިޔުމުން ޖަވާބުދާރީވެފައިވާތީ ދެން ކަންތައްކުރެވޭނެ ގޮތުގެ މަޝްވަރާކުރުމަށް މަޖިލީސް މެދުކަނޑާލައިފިއެވެ.
ރިއްފަތުގެ އިތުބާރު ނެތްކަމަށް ބުނެ މަޖިލީހަށް އިދިކޮޅުން ހުށައަޅާފައިވާ މައްސަލަ މިއަދަށް އެޖެންޑާކޮށްފައިވާއިރު، ރިއްފަތު ލިޔުމުން ޖަވާބުދާރީ ވުމުން ދެން އަމަލުކުރެވޭނީ ކިހިނަކުން ކަމާމެދު މަޖިލީހުގެ މެންބަރުން ވަނީ ސުވާލު އުފައްދަވާފައެވެ.
އެގޮތުން މައްސަލަ ކުރިއަށް ގެންދެވުމަށް އަމީން މަޖިލީހުގެ ރައީސް މުހައްމަދު ނަޝީދު އަމީން އާމްގެ އަރިހުން އެދިވަޑައިގެންނެވުމުން ނިޒާމީ ނުކުތާއެއް ނަންގަވާ ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވީ އާންމު ކޮމިޓީއިން ނިންމާފައިވަނީ ބަންޑާރަ ނައިބު މަޖިލީހަށް ހާޒިރުވެގެން ޖަވާބުދެއްވާނެ އުސޫލުކަމަށެވެ. އަދި އެއީ ބަހުސް ފެށުމުގެ ކުރިންނާއި، ބަހުސްގެ މެދު ތެރެއިންނާއި، ބަހުސް ނިމުމުން 10 މިނެޓުކަމަށް ހަސަން ލަތީފް ވިދާޅުވިއެވެ. ނަމަވެސް ޖަވާބުދާރީވުމަށް ލިޔުމުން މަޖިލީހަށް ހުށައެޅުވުމުން ދެން ކަން ކުރާނެ ގޮތުގެ އުސޫލެއް އާންމު ކޮމިޓީއިން ނިންމާފައިނުވާކަމަށް ހަސަން ވިދާޅުވިއެވެ.
ވުމާއެކު އަލުން އާންމު ކޮމިޓީއިން ގަވާއިދެއް ހަދައިގެން ނޫނީ ލިޔުމުން ހުށައަޅާަފައިވާ ޖަވާބު އިއްވިދާނެކަމަށް ގަބޫލުނުކުރައްވާކަމަށް ހަސަން ލަތީފް ވިދާޅުވިއެވެ.
ހަސަންގެ ނިޒާމީ ނުކުތާ ބަލައިގަނެ، ރިޔާސަތުން ވަނީ މައްސަލާގައި ބަންޑާރަ ނާއިބު ޖަވާބުދާރީވުމުގެ ފުރިހަމަ ފުރުސަތެއް ލިބިލައްވަން ޖެހޭނެ ކަމަށް ވިދާޅުވެފައެވެ. އެހެންކަމުން، ބަންޑާރަ ނައިބު ގެ ލަފާއާއި ނުލައި ދެން މައްސަލަ ކުރިއަށް ގެންދެވޭނެ ކަމަށް ފެނިވަޑައިނުގަންނަވާ ކަމަށް ނަޝީދު ވިދާޅުވިއެވެ.
އެއާއެކު ސަރުކާރަށް ތާއީދު ކުރައްވާ މެންބަރުން ވަނީ، ލިޔުމުން ޖަވާބުދާރީ ވުމަކީ ވަޒީރަށް ލިބިގެންވާ ހައްގެ ކަމަށާ، އަދި މަޖިލީހަށް ހާޒިރު ނުވެ ލިޔުމުން ޖަވާބު ދާރީވުމުން، މީގެ ކުރިންވެސް މަޖިލީހުގެ އިދާރާއިން ކަން ކޮށްފައިވަނީ ލިޔުމުން ފޮނުވި ޖަވާބު ކިޔުއްވައިގެން ކުރިއަށް ދިޔުން ކަމަށް ވިދާޅުވެފައެވެ.
އެކަމާއި ގުޅިގެން ރިޔާސަތުން ވިދާޅުވީ އަމަލުކުރައްވާނީ ޑިމޮކްކްރަސީގެ ހަމަތަކާއި ގާނޫނު އަސާސީއާއި އެއްގޮތަށްކަމަށެވެ. އަދި މީގެ ކުރިން މަޖިލީހުން ކަންކޮށްފައިވާ ގޮތަށް ރިޔާއަތްކުރައްވާނެކަމަށްވެސް ވިދާޅުވިއެވެ.
އެއަށްފަހުވެސް ގިނަ މަނެބަރުންތަކެއް ނިޒާމީ މައްސަލަ ނަންގަވާ އެކި ހިޔާލު ހުށަހަޅުއްވަމުން ގެންދެވިއެވެ. އެގޮތުން އިހަވަންދޫ ދާއިރާގެ މެންބަރު މުހައްމަދު ޝިފާއު ވަނީ، މަޖިލީހުގެ މެޖޯރިޓީ ލީޑަރާއި މައިނޯރިޓީ ލީޑަރާއި މަޝްވަރާ ކުރެއްވުމަށްފަހު މައްސަލަ ކުރިއަށް ގެންދެވުމަށް އެދިލައްވާފައެވެ.
ޝިފާއުގެ ނިޒާމީ ނުކުތާ ބަލައިގަންނަވާކަން ހާމަކުރައްވައި ރިޔާސަތުން ވަނީ މަޖިލީހުގައި ތިއްބެވި މެޖޯރިޓީ އަދި މައިނޯރިޓީ ލީޑަރާއި މަޝްވަރާކުރެއްވުމަށް މަޖިލީސް މެދުކަނޑާލާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
